Read Ntcham Psaumes 7 Bible Online

Psaumes 7 - Ntcham bible

Psaumes 7

¹Daafiidi di gāā kunimbaau laŋŋu nee. Kuusi un sá Beenjameen naakookunee pu ní u nìn gāā-ŋu ki tīī ti-Dindaan.

²Ti-Dindaan m-Nimbɔtiu, sii ní m sáǹ ki kɔ́, jòoń-mi kí fīī-mi kí nyāntí bin jì-mee ŋaan.

³An yaa kaa sá mimmee, kii gbikinti nín cútí kuwaŋkuluu puee, míǹ ní bi làá cúú-mi kí cáá búntí kí tɔ̀ntī laakin ubɔ kaa ti ŋūǹ kí fīī-mee.

⁴Ti-Dindaan m-Nimbɔtiu, m yaa ŋá tin kaa ŋān̄ee, m yaa ŋá ubɔ ikpiti,

⁵m yaa nyáń m-bɔɔ boon, àá m yaa fúkúl̀ un di ná-mi an kaa cáá taapuee,

⁶á yàntī m-nannanliu ń jà kí cúú-mi, kí tāā-mi kí kpɔ̀, ní kí tāā-mi kí ŋmàliŋkì ntamin.

⁷Ti-Dindaan, yīkì nì a-ŋuul poon! M-nannanliibi díkíi gbí, yīkìi já nì bi, sii un là bí sòoǹ tibɔti nì ibaamɔnee, tūtuǹ-mi.

⁸Kóoǹ binib kɔkɔ kí kpāfì bí màntīí tū-si, kàl̄ a-beejal pu yilpu kí jī bi-pu dibeel.

⁹Ti-Dindaan, sii di sòoǹ dinibul kamaa bɔti, sòoǹ m-bɔti kí pɔ̀-mi, kun puee m sí deedee ní kaa ŋá tikpitil tiba mun.

¹⁰Sii un di sá deedee Nimbɔtiuee, sii un di nyí unil landɔkɔŋu nì kun kā u-pɔbilinee, kúntí bikpitiŋaliibi tuŋkpitiŋ kí yàntī án bútí deedeedaan[11].

¹¹Unimbɔti di sá m-gbampɔɔl, úǹ di fìil̄ bin pɔbil bí diba nì uee.

¹²Unimbɔti sá un sòoǹ binib bɔti nì ibaamɔnee, ní ki ŋūǹ kí dàkà u-ŋuul baabadal.

¹³Binikpitib yaa kaa kpántì bi-bee, Unimbɔti làá lòon̄ u-tàataajiki, ní kí píĺ u-tɔbu kí cīití-bi.

¹⁴U bɔ́ntì u-janjawanti tin kùee, ní ki dū u-piiŋyi in fòol̄ ŋŋmi lìblibee ki páaǹ.

¹⁵Unikpiti nāantí isan in pu u làá dī kí ŋá ikpitee, ní kí cáá u nín làá ŋá pu kí ŋá digaŋgamee pool, ní kí dāá màal̀ inyimɔn.

¹⁶U gbìn̄ mbòó ki bàà píĺ kí sàl̄ bin kíǹee ní an dūu sàl̄ úǹ u-ba.

¹⁷Úǹ u-ba tuŋkpitiŋ fātìi gítì u-pu, tipɔmbɔti tin u bàà bɔ́ntì ki cíitì bibee fātìi lítì u-pu.

¹⁸M làá jāam̀ ti-Dindaan kun puee u sá deedeedaan, m làá gāā ilan kí nyɔ̄ŋkì ti-Dindaan, Yilpu Fɔ́ŋŋŋ Nimbɔtiu.