Read Ntcham Psaumes 71 Bible Online

Psaumes 71 - Ntcham bible

Psaumes 71

¹Ti-Dindaan, sii ní m sáǹ ki kɔ́, taa yàntī icoo ń cúú-mi dalba dalba.

²Fīī-mi kí wúń m-pu a-deedeeu poon. Kpòon̄ a-tafal m-watil pú, ní kí fīī-mi.

³Nín̄ sá kutaŋkpanaakoou kun m làá nīn sáń ki kóò ŋyunti kamaayee. A lēē yii a làá fīī-mi. Tiŋman, a sá m-taŋkpanaakooku nì m-balilaŋki!

⁴M-Nimbɔtiu, fīī-mi binikpitib ŋaan, nyāntí-mi binikpɔliibi nì bin dàkà tipɔmbɔtee ŋaan.

⁵Ti-Dindaan Unimbɔti, sii pu ní m máká, doooo m-naacimpɔntin ní m máká a-pu.

⁶Daliŋkin bi màl̄-mee, sii pu ní m báká, sii di nyántìń-mi m-na poon. Sii ní m làá nīn pée nyɔ́ŋkí.

⁷M nìn sá ŋabika ki tīī binib tikpil, ama sii ní m sáǹ ki kɔ́.

⁸A-nyɔŋkii di pée gbí m-nyɔkɔn, ní m sòoǹ a-nyooti pu iwiin kɔkɔ.

⁹M-puti poon nee, taa fá-mi, m-pɔŋŋu nín bātì nee, taa fàtī a-boon kí tīī-mi.

¹⁰M-nannanliibi sòoǹ m-pu, bin cɔ́ŋkí-mee kpáfì kinyɔkɔ m-pu.

¹¹Bi lì yii: «Unimbɔti dū-u ki fá, jàmaan kí cúú-u, ubɔ kpá ki làá fīī-u!»

¹²Unimbɔti, taa nín̄ dátiǹ-mi, m-Nimbɔtiu, dāá jòoń-mi malaa.

¹³Bin kɔ́kɔĺ-mee, yàntī icoo ń cúú-bi án nàan̄-bi! Bin nyàab̀-mi tikpitilee, yàntī icoo ń cúú-bi bí fá bi-nyooti!

¹⁴Mamee, m làá nīn pée máká a-pu ní, m làá nīn pée gà ilan ní ki nyɔ́ŋkí-si.

¹⁵M-nyɔkɔ làá nīn sòoǹ a-deedeeu nì a-fiil pu baabadal, di sá yii maa ŋūǹ kí kàaǹ a-ŋanti gbanti.

¹⁶Ti-Dindaan Unimbɔti, m làá sòoǹ a-tuŋkpaaŋŋi pu, m làá téetí yii sii baba di sá deedeedaan.

¹⁷Unimbɔti, doooo m-naacimpɔntin ní a dàkā-mi, ní m sòon̄ a-maamaaci tuuŋŋi pu ki dāa sāā díǹ.

¹⁸Kɔŋkɔnnee m nín púĺ m-yikpiti píil̀ nee, Unimbɔti, taa fá-mi. Niinee m làá ŋmā kí sòoǹ a-tuŋkpaaŋŋi pu kí tùkù binipɔmbi, ní kí sòoǹ a-pɔŋŋu pu kí tùkù bin làá páanní bi-boonee.

¹⁹Unimbɔti, binib sòoǹ a-deedeeu pu kitiŋ kɔkɔ pu. Sii un di ŋá atuŋkpaanee, ŋma bí kii siiyee?

²⁰A yāntì m kántì dinimbinaamandi nì agìń, ama a làá fàtīí tīī-mi dimaŋfal. A làá dáaĺ-mi kí nyāntí taapu ditaŋkpiilin.

²¹A làá tí fàtīí ŋméeǹ-mi, ní kí gíiǹ m-nyooti kí tīī-mi.

²²Man làá bɔ̀ɔ̀ kubeeu kí nyɔ̄ŋkì-si, m-Nimbɔtiu, m làá nyɔ̄ŋkì-si a-deedeeu pu. M làá bɔ̀ɔ̀ kubeeu kí pàkà-si, Isirayeel deedee Nimbɔtiu!

²³M-nyunculiŋ làá tábití ḿ gāā ilan kí nyɔ̄ŋkì-si, m làá nīn tátí mpɔn ki fàal̀, di sá yii a fīī-mi.

²⁴Baabadalee, m-limbil làá nīn sòoǹ a-deedeeu pu, di sá yii icoo cúú bin nyàab̀-mi tikpitilee bi-yiliŋ tīntì.