Read Ntcham Psaumes 72 Bible Online

Psaumes 72 - Ntcham bible

Psaumes 72

¹Saloomɔn di ŋmàn̄ nlan nee. Unimbɔti, yàntī ubɔti ń nín sòoǹ binib bɔti kii siiyee, kí tīī ubɔti jipɔɔn a-deedeeu.

²Ú nīn kpòotī a-nibul nì deedee ní kí nīn sòoǹ biwɔfib bɔti nì ibaamɔn.

³Deedee puee, ajoon nì ŋgbantamu ń cáań a-nibul ŋgbansɔŋfi.

⁴Ubɔti ń sòoǹ kí pɔ̀ dinibul wɔfib, ú nīn sá bifalaadambi fiiliu ní kí nà bin wɔ́b́-bee[87]!

⁵Ŋwìiń nì uŋmal yaa làá nīn pée bí ki ŋmíntée, binib làá nīn pée fàŋkí-si ní kí nīn cá jaanjaan!

⁶Ú kpákatiń kii utaa nín nì kusaaun puee, kii utaa nín nì tikpil ki sɔ̀ŋkī kitiŋ puee!

⁷Án bútí deedeedaan u-maŋfal wiiŋyi poon ní digbíl ń nīn bí kí cáá sāā daliŋkin uŋmal kaa ti làá nīn bée.

⁸Ú jī dibeel kí yòon̄ tiŋku ubɔ kí cáá sāā un kíǹee[88], ní kí yòon̄ Eefiraati mɔɔl kí cáá sāā kitiŋ gbeennyɔkɔ!

⁹Bin kóò kuteeunee làá dāá gbàan̄ u-nimbiin, ní u-nannanliibi ń dāá ŋmɔ́ ntam.

¹⁰Taarsiisi tiŋki nì ntimu mun nnyim māntìi túee bɔtiibi làá dāá cáań-u tiwampɔkaal, Sabaa nì Seeba timmu bɔtiibi làá dāá pà lampoo kí tīī-u.

¹¹Bibɔtiibi kɔkɔ làá dāá gbàan̄ u-nimbiin, atimbun kɔkɔ làá dāá nīn bí u-taapu.

¹²Di sá yii u làá dāá fīī uwɔfi un gbáà ibiilee, ní kí dāá fīī unandaan un kaa cáá ubɔ ń tūtuǹ-uee.

¹³U làá dāá sɔ̄ uwɔfi nì ufalaadaan saai, u làá dāá fīī bifalaadambi maŋfal.

¹⁴U làá dāá fīī-bi kí nyāntí diwɔ́bil nì tipɔmbɔtin, di sá bi-maŋfal cáá kunyampoou u-nimbiin.

¹⁵Ubɔti ń ká mmaŋfafɔkɔn! Bi làá dāá tīī-u Sabaa tiŋki sindaariyau. Bi làá dāá nīn mèé ki tìì-u ŋyunti kamaa, ní kí nīn mèé baabadal yii Unimbɔti ń bìin̄ u-boon!

¹⁶Kitiŋ ń lòoǹ tiŋan, tikpaajin ń bìin̄ ajoon pu kí nīn cáá abil kii Leebanɔn jool puee, ní binib ń gbí kitiŋin kii kusaaun mɔsɔŋkuee.

¹⁷Ubɔti yindi ń nīn bí ki cá jaanjaan, u-yindi ń nīn bí kii ŋwìiń nín bí pu jaanjaanee! Binib ń nīn cáá u-yindi ki mèé ki bìintí tɔb pu, ní atimbun kɔkɔ nib ń lì yii u bí mmɔnni.

¹⁸Tí nyɔ̄ŋkì ti-Dindaan Unimbɔti, Isirayeel Nimbɔtiu, úǹ baba di ŋáań maamaacib.

¹⁹Tí nyɔ̄ŋkì u-yindi din cáá tinyoolee kí nīn cá jaanjaan! U-nyooti ń gbí kitiŋ kɔkɔ pu! Án ŋá míǹ, án lafun ŋá míǹ.

²⁰Jeesee jipɔɔn Daafiidi wimmeem nín kúntí laakiŋyee sɔ̀.