Read Ntcham Psaumes 73 Bible Online

Psaumes 73 - Ntcham bible

Psaumes 73

¹Asaafi di ŋmàn̄ nlan nee. Tiŋman, Unimbɔti ŋān̄ ki tīī Isirayeel, u ŋān̄ ki tīī bin pɔbil bí diba nì uee.

²Ama fiii di pée kpá ḿ bàà tāā kí lántí, pɔpɔnaajuba, m ŋātì ki lítì ki dóò.

³Di sá yii m nín ká an bútì bilambidambi puee, ní m kíǹ ki cáá binikpitib gbanti pu nnimbitaataam.

⁴Tiba kaa pée páb̀-bi áli bi-kúm dal, ní bi bí gbàlgbal ki cáá laafiya.

⁵Bíǹ kaa jīǹ falaa kii bin kíǹee nín jīǹ puee, agìŋ́kpaan ŋin jēetí binib puee kaa gbèetī-bi.

⁶An pu ní dibayoondi kpántì-bi tiwanléeŋkaal, ní tipɔmbɔti kpántì tiwampeeŋkaal bi cáa pèentí.

⁷Bi-nimbiin sá ŋkpam ŋma ní, tin bi dàkafī bi-pɔbilinee gíti lákatì.

⁸Bi bèel̄ binib ní ki sòoǹ tibɔkpitil ŋma. Bi yòontí bi-ba yilpu ní ki bɔ́ntí ki wɔ́b̀ bin kíǹee.

⁹Bi wàantí bi-nyɔmmu kí já nì Unimbɔti, ní bi-limbiliŋ sòoǹ tikɔkɔ kitiŋ pu.

¹⁰An pu ní Unimbɔti nib fātì bi-ba ki túĺ bi-watil pú, ní ki fòol̄ bi-nyɔɔbuŋŋi ki nyù kii nnyimee.

¹¹Bi lì yii: «Mana ní Unimbɔti làá béé? Yilpu fɔ́ŋŋŋ Nimbɔtiu pée nyí tin bíi jītéeee?»

¹²Kpèèmaan binikpitib gbanti, tiba kaa pée páb̀-bi ní an bútí-bi ki kútí.

¹³Mimmee m pée ŋá m-pɔbil circir ki fíntì m-ŋalii kí dàkà yii m sá maanyiiba fám deeyaa!

¹⁴Falaa bà-mi baabadal, ní m bí ditafadaaldin kutaafaau kamaa.

¹⁵Báà m yaa bàà bí yii: «M làá sòoǹ kii bíǹ nín sòoǹ pueeyaaa,» m nyáń a-nibul boon dee.

¹⁶Ní m dākafì kí gbìl̄ taapu, ama ní m ká yii an pɔ̄ɔ̄ m-cee.

¹⁷See m nín kɔ́ kunimbɔtidiinee ní m gbìl̄ tin dɔ̄ ki cí binikpitibee taapu.

¹⁸Tiŋman, a làá dū-bi kí tɔ́kɔń dijɔnjɔndi pu, ní kí yàntī bí lítí kí nàan̄.

¹⁹Ba ní an nāaǹ-bi dicilpu dicilpu mimmee! An dóò bi-pu dee, dinyoondi nāaǹ-bi!

²⁰Ti-Dindaan, a yaa yíkèe, bi làá wāŋkì kii unil nín dámintí pu kí fìntī kí súntée ní.

²¹Ŋyuntee, m-pɔbil nìn bí ntuntunni ní m-poon kaam nìn cɔ́tì.

²²M nìn sá ugbaan ní kaa gbìl̀ báà tiba taapu, m nìn bí kii kuwaŋkuluuee ní a-cee.

²³Nì míǹ kɔkɔee, m pée bí a-cee ní. A cúú m-ŋaŋgiil,

²⁴ki dàkā-mi nsan ŋun m máaǹ ki nóóyee, ní boonee á dāá fōō-mi nì tinyool.

²⁵Ŋma ní m làá nīn cáá yilpu beelin? M nín bí a-cee nee, ba ní m gíti là kitiŋ pu?

²⁶M-wunti nì m-pɔbil ŋūǹ kí bɔ́ń, ama Unimbɔti di sá m-taŋkpal din pɔ̄ɔ̄yee, ní ki sá m-fakal kí nīn cáa cá jaanjaan.

²⁷Di sá yii bin kɔkɔ fātì bi-boon ki tīī-see làá kpú kí céetí, a làá nàan̄ bin kaa yú nì si deedeeyee.

²⁸Ama kun tìì-mi mmɔnee di sá ḿ nīn bí ki pìlīǹ Unimbɔti. Ti-Dindaan Unimbɔti, m sáǹ ki kɔ́-si ní kí ŋmā kí sòoǹ a-tuuŋŋi pu.