Read Ntcham Psaumes 74 Bible Online

Psaumes 74 - Ntcham bible

Psaumes 74

¹Asaafi[89] di ŋmàn̄ nlan nee. Unimbɔti, ba pu ní a dū-ti ki fá talku? Ba pu ní a-ŋuul dàn̄ a-picaŋkpuŋku kun a kpàáyee pu míǹ?

²Taa súntí a-nibul din a dá doooo ŋkilkaaminee, kunaakoou kun ní a fīī ku sá a-yɔkuee, Siiyɔn jool din a nìn dūu ŋá a-kɔŋkooŋŋuee pu.

³Còomìń kí dāá kpèè adigbuŋkati ŋin dɔ̄ doooo jaanjaan nee, unannanli gbáń ki bíil̀ tikɔkɔ Circir kɔŋkooŋŋun.

⁴A-nannanliibi fáá dijajil wiliilii a-circir kɔŋkooŋŋun. Bi dū bi-jajil ŋaabiki ki sākaǹ niin.

⁵Bi náań nì bidɔgaaliibi bin bí kubambaŋŋun ki gà isufi nì ncɔkɔmuee.

⁶Tiwan tin bi dū idɔ ki kpítèe, bi dū ncɔkɔmu nì akújal ki gbáń ki wīil̀ kɔkɔ.

⁷Bi sēē a-circir kɔŋkooŋŋu ŋŋmi. Bi gbáń ki wīī a-diiku, ki kɔ́ǹ-ku tijɔkɔndi.

⁸Bi lī bi-pɔbilin yii: «Tí nàam̄maan-bi dicilpu.» Bi wùn̄ ipaan in kɔkɔ bí kitiŋ nee poon bi kpáfí ki jáaḿ sii Unimbɔtee.

⁹Taa ti wāĺ a-bítam daanti, bibɔnaatiliibi gíti kpá, ní ti-kansikin ubɔ mun kaa nyí daliŋkin ní tíǹ gbanti kɔkɔ làá kúntée.

¹⁰Unimbɔti, kí cáá sāā ŋyunti ŋulɔŋu ní a-nannanliibi làá nīn bí ki lāā-si ní? Mimmee bi làá nīn pée bí ki kpèé a-yindi fám míǹ ki cáaa?

¹¹Ba pu ní a kóoǹ a-ŋal, a-ŋaŋgiil? Tàntī-ŋu kí kpɔ̀ kí céetí-bi!

¹²Ama sii Unimbɔti un sá m-bɔtiu doooo ŋkilkaaminee, a fīī-ti ŋfunyɔm kupaau kitiŋ pu.

¹³A dū a-pɔŋŋu ki yākatì tiŋku nyim mili, ki fáá ki mátì tipeebilindi tin bí nnyiminee yiliŋ.

¹⁴A gbáń ki wīī kupeebiliŋŋu Leefiyatan yil ní ki dū ku-wunti ki tīī kuteeun peelii ŋmɔ́.

¹⁵Sii di cátì nsan ki tīī inyimbul nì mbùmbiyaamu, sii di yāntì ibuŋkpaan in nyim kaa fóotée fóotì.

¹⁶Sii di yì ŋwiimpu, ní ki yì kunyeeu mun, sii di kāaǹ uŋmal nì ŋwìiń i-paaŋyi pu.

¹⁷Sii di yóoǹ kitiŋ kpaanyɔmmu kɔkɔ, sii di tí náań dipeel nì kuseeu.

¹⁸Ti-Dindaan, téetí yii unannanli bíi lāā-si, dinibul din nib sá bigbaambi nee bíi kpèé a-yindi fám.

¹⁹Taa dū a-nanjil[90] naŋki kí líiǹ upeecuncuti, taa súntí a-nandambi pu talku.

²⁰Téetí a-poondi pu, di sá yii tipɔmbɔti gbí kitiŋ nee saŋkaŋkpiliŋ laakin dibɔmbɔndi bée.

²¹Taa ti yàntī icoo ń cúú un bi wɔ́b́ee, ama yàntī ufalaadaan nì unandaan ń nyɔ̄ŋkì a-yindi!

²²Yīkìm̄ Unimbɔti, mɔ̄tì a-ba pu. Á taa súntí tiniyool nee nín sìí-si baabadal puee.

²³Á taa súntí a-nannanliibi kuŋkuuntii pu, á taa súntí bin jáà nì see tantatii in kaa kúntée pu.