Read Ntcham Psaumes 75 Bible Online

Psaumes 75 - Ntcham bible

Psaumes 75

¹Asaafi[91] di ŋmàn̄ nlan nee ki tīī bilaŋgaaliibi kpiliu.

²Ti nyɔ́ŋkí-si, Unimbɔti, ti nyɔ́ŋkí-si, ti báakí ki lì a nín sá ukpaan puee, binib sòoǹ a-maamaaci tuuŋŋi pu.

³Unimbɔti bí yii: «Ŋyunti ŋun m síiǹee yaa láa bàn̄ee, m làá dāá sòoǹ binib bɔti nì ibaamɔn.

⁴Kitiŋ yaa cīŋkì ki kpáaǹ tin kɔkɔ kóò ki-puee, man di ŋúb́ ki-jaantalkub an píkí.»

⁵M tùkù bilambidambi yii: «Taa ti nín̄ lámintímaan!» ní ki tùkù binikpitib yii: «Ní taa nín còom̄ ni-yiliŋ gáań.

⁶Ní taa nín còom̄ ni-yiliŋ gáań yilpu yilpu, ní taa nín̄ sòoǹ ki yòontí ni-ba yilpu.

⁷Aayee, an kaa sá ŋwìiń nyalaŋki pú àá ŋwìiń jeetilaŋki pú àá kuteeun ní tikpaandi nyēeń.

⁸Di sá yii Unimbɔti di sòoǹ binib bɔti, ki sìntī ubɔ taapu ní ki yòontí un kíǹee yilpu.»

⁹Ti-Dindaan ŋúb́ u-ŋaan binikpitib bɔsooŋyi yuku, ndaam min bi tɔ́ dinyaalee kā ku-poon. U bātì-mì ki tīī kitiŋ pu nikpitib kɔkɔ bí nyɔ̀, bi làá nyɔ̀-mì kí kpáaǹ tidakpati kɔkɔ.

¹⁰Mamee, m làá sòoǹ kí taa gbèen̄, m làá nīn gà ilan ki nyɔ́ŋkí Jaakɔb Nimbɔtiu.

¹¹Unimbɔti bí yii: «M làá yàntī binikpitib yiliŋ ń nīn tīī, ama ní deedeedaan yil ń nīn gáań.»