Read Ntcham Psaumes 76 Bible Online

Psaumes 76 - Ntcham bible

Psaumes 76

¹Asaafi[92] di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ tibati ní ki gà-ŋu. Nlan.

²Unimbɔti yāntì binib béè-u Juuda tiŋkin. U-yindi sá dikpaandi Isirayeel tiŋkin.

³Saleem[93] tiŋkin ní u-tantiu bí, u-kɔŋkooŋŋu bí Siiyɔn jool pu ní.

⁴Niin ní u kɔ́fì ipiin in fòol̄ ŋŋmee nì agbampɔɔ nì ntàataajimu, ní ki yāntì kujaau gbēeǹ.

⁵A jìl̀ ki ŋān̄ tikpil, ajoon ŋin a jáń ki fōōyee pu.

⁶Bi fúkúl̀ bijanjaliibi bin cáá dipɔbilee wanti pílpil, bi gèen̄ kaa ti fīntì, bibaatandambi gbanti kɔkɔ ŋalii kpíì[94].

⁷Jaakɔb Nimbɔtiu, a nín tāā ki bíikèe, bitanjakaliibi nì itaamu wunti kpíì ní.

⁸Sii di sá kuwambiiu. A yaa gíí diŋuulee, ŋma di ŋūǹ kí yūĺ a-nimbiin?

⁹Doooo yilpu ní a yàntī bi gbìl̀ a nín sòoǹ binib bɔti puee. Kitiŋ pu nib fàŋkí ní kí ŋmīĺ díkí diki,

¹⁰ŋyunti ŋun ní sii Unimbɔti yaa yíkì ki bíi sòoǹ binib bɔti, kí fīī bin sá binandambi kitiŋ puee.

¹¹Ibaamɔnee, binib ŋuul sá inyɔŋki laŋyi ní ki tīī-si, ní a dù bin gbíntì diŋuul gbantinee ki gbìǹ a-caŋ kii dambalee.

¹²Pòom̄maan ti-Dindaan ni-Nimbɔtiu ipoon, ní kí ŋá kii ni nín pōoǹ puee. Nimbi bin kɔkɔ māntìi tú-uee, ní cáaḿmaan ni-wampɔkaati kí tīī Unimbɔti un cáá tifaandee.

¹³U sìntī abɔtibil ŋin cáá dilambilee taapu, ní ki yàntī kitiŋ pu bɔtiibi fàŋkí-u yɔ́kɔ́ yɔkɔ.