Read Ntcham Psaumes 78 Bible Online

Psaumes 78 - Ntcham bible

Psaumes 78

¹Asaafi[98] di ŋmàn̄ nlan nee. M-nibul, pīlifì m-dàkatam tiŋan, kpòon̄ a-tafal kí pīlifì tin m cáá kí tùkù-see.

²M làá dū tibɔŋmantikaal kí sòoǹ, m làá sòoǹ tin jítì ki bí dibalinee pu[99].

³Kun ti gbìl̄ ki nyée, kun ti-baabi nìn máafì-tee,

⁴taa làá dūú báĺ ti-biyaamu, ama ti làá māafì bin làá páań ti-boonee kun pu bi máaǹ kí nyɔ̄ŋkì ti-Dindaanee. Ti làá māafì-bi u-pɔŋŋu nì u-maamaaci tuuŋŋi ŋin u ŋée.

⁵U tīī Jaakɔb naantiibi abɔkpaa, u yóoǹ marab Isirayeel tiŋkin. U nìn tīī ti-baabi mara yii bí dū tibɔti gbanti kí dàkà bi-biyaamu.

⁶An yaa ŋá mimmee, bin làá páanní boonee, mbiyaamu mun bi làá dāá màal̀ee làá dāá yīkì kí béé-tì kí dūú nàatī bíǹ bi-ba biyaamu.

⁷Mimmee bi làá dū bi-mákal kí páań Unimbɔti pu, kí taa súntí u-tuŋkpaaŋŋi pu ní kí nīn tɔ́ u-marab.

⁸Niinee baa làá nīn bí kii bi-naanjab bin pɔbiliŋ nìn pɔ̄ɔ̄ bi-yiliŋ gáatèe. Bi-pɔbiliŋ kaa nìn bí diba nì Unimbɔti ní baa nìn pée máká u-pu.

⁹Eefiraayiim yab nìn bàl̄ abaatan ki tòó ipiin, nì míǹ kɔkɔee bi sáǹ ki kátì kujaaun.

¹⁰Di sá yii baa nìn ŋúb́ Unimbɔti poondi, bi nìn yíì kaa tɔ́ u-marab.

¹¹Bi nìn súntì u-tuŋkpaaŋŋi nì u-maamaaci tuuŋŋi ŋin u nìn ŋá ki dàkā-bee pu.

¹²Bi-naanjab nimbiin ní u nìn ŋá maamaacib[100] Eejipiti tiŋkin, Soowan satin.

¹³U nìn cátì nsan tiŋkun bi cōom̀ ki jítì, u nìn yāntì nnyim gāā digundi[101].

¹⁴U nìn dū ditagbandi ki kpōotì-bi ŋwiimpu, ní ki dū ŋŋmi walifiŋu ki kpōotì-bi kunyeeu[102].

¹⁵U nìn búkutì ataŋkpee kuteeun nnyim nyáń ki pùub̄ tikpil tikpil ní bi nyùn̄.

¹⁶U yāntì kibùmbiki nyáń ditaŋkpalin ní nnyim pùub̄ kii ibuŋkpaanee[103].

¹⁷Ama bi nìn pée gbíntìi yìntīǹ-u, ní ki jáà nì Yilpu Fɔ́ŋŋŋ Nimbɔtiu kuteeun.

¹⁸Bi nìn lēē bi-pɔbilin kí cɔ̄ŋkì Unimbɔti kí kpèè ní ki bālifì-u ú tīī-bi tijin tin fáatiǹ-bee.

¹⁹Bi nìn nyáń Unimbɔti pu ki lī yii: «Unimbɔti lafun ŋūǹ kí tīī-ti tijin kuteeu nee poon tí jāaa?

²⁰Tiŋman u fáá ditaŋkpal nnyim nyáń ki pùub̄ tikpil tikpil. Ama u ŋūǹ kí tīī u-nibul tijin bí jī, kí tīī-bi tinan bí ŋmɔ́ɔɔ?»

²¹Ti-Dindaan nín gbìl̄ anyɔɔbun gbantee ní u gíí diŋuul. U nìn gíí Jaakɔb naantiibi pu diŋuul, u nìn fōō Isirayeel yab gbanti pu mbum.

²²Di sá yii baa nìn fōō Unimbɔti ki kíí, baa nìn máká u-pu yii u làá ŋmā kí fīī-bi.

²³U nìn tīī kutagbɔŋu kun dàn̄ nee mara, ní ki cúú yilpu punuubi ki pīitì.

²⁴U nìn yāntì maana nyánní yilpu ki lítì kii utaa nín nì puee bi jíń, u nìn tīī-bi yilpu jinti[104].

²⁵Báà ŋma nìn jíń Unimbɔti tuuŋyi jinti, u nìn tīiń-bi tijin bi jíń ki díkí.

²⁶U nìn yāntì ŋwìiń nyalaŋki pú buŋku jítì yilpu, u nìn dū u-pɔŋŋu ki cáań ŋgiil pú buŋku.

²⁷U nìn yāntì tinan nyánní yilpu ki lítì kii utaa nín nì puee, ki wīikí tikpil kii ntamee. Inoon nìn lítì ki wīikí tikpil kii tiŋku gbandi bulee.

²⁸U nìn yāntì i lítì bi-naapaal kansikin, ki māntìi tú bi-kɔŋkooŋyi.

²⁹Bi nìn jíń ki díkí tiŋan, di sá yii ti-Dindaan nìn tīī-bi kun bi lèe.

³⁰Baa nìn dá láá jíń ki bál̀, tijin nìn dáá gbí bi-nyɔkɔn,

³¹ní Unimbɔti ŋuul jéetì bi-pu. U nìn kūū bi-kansikin bin cáá dikpabilee, ní ki lúkufì Isirayeel nipɔmbi[105].

³²Nì míǹ kɔkɔee, bi nìn gbíntìi yìntīǹ-u. Baa nìn máká u-maamaaci tuuŋŋi pu.

³³Niinee ní u kúntì bi-maŋfal wiiŋyi kii kubuŋuee, ki yāntì bi-biŋŋi kúntì dinyoondin.

³⁴Unimbɔti yaa nìn bíi kù-bee ní bi kíǹ ki nyàab̀-u. Bi nìn kpántí bi-ba ní ki nyàab̀ u-jòońdi.

³⁵Bi nìn téetí yii Unimbɔti di sá bi-taŋkpanaakooku, yii Yilpu Fɔ́ŋŋŋ Nimbɔtiu di sá bi-fiiliu.

³⁶Ama bi nìn cáá bi-nyɔmmu ki ŋmàtíǹ-u, bi nìn cáá bi-limbiliŋ ki mɔ́ntí-u.

³⁷Bi-pɔbil kaa nìn bí diba nì u, baa nìn fōō u-poondi ki kíí.

³⁸Ama Unimbɔti úǹ poon nìn pée mɔ̄ ní, u nìn cáá bi-kpitii ki pūǹ-bi, kaa nìn nàantí-bi. Iyunti tikpilee, u nìn cútí u-ba u-ŋuul poon, kaa nìn fòol̄ mbum tikpil.

³⁹Waa nìn súntí yii bi sá binib nì nniwuŋgban, bi sá kubuŋu kun cá kaa ti gítińee.

⁴⁰Miŋa pu ní baa nìn jáń nì u kuteeun, kaa nìn táká-u laakin binib kaa kóòyee!

⁴¹Bi nìn pée cɔ́ŋkí Unimbɔti ní, ki nìn kɔ̄ntí Isirayeel Nimbɔtiu Circirdaan kunimbaau.

⁴²Baa nìn téetí tin u nìn ŋá ki tīī-bi ŋwiin ŋun u nìn fīī-bi ki nyántì unannanli ŋaanee.

⁴³U nìn ŋá maamaaci tuuŋŋi Eejipiti tiŋkin, u nìn ŋá maamaaci tuuŋŋi Soowan tiŋkin.

⁴⁴U nìn yāntì bi-buŋyi nyim kpántì fatiku, baa nìn gíti ŋūǹ kí nyɔ̀ bi-bùmbiyaamu nyim[106].

⁴⁵U nìn dū isii in júntée ki tɔ́ bi-pu i nyùn̄ bi-fatikuu, ki dū kpaabi ki tɔ́ bi-pu bi bíil̀ tikɔkɔ[107].

⁴⁶U nìn dū bi-kpaajinti ki líì nì inaakitoon, ki dū bi nín túń ditundi ki ká tiŋyee ki líì nì inaaki[108].

⁴⁷U nìn yāntì ataanyiŋkumbil lítì ki bíil̀ bi-fiinyi sati, ní ki yāntì utaaja nìn̄ ki bíil̀ Siikoomɔɔr sufii.

⁴⁸U nìn yāntì ataanyiŋkumbil kūū bi-naai nì bi-piii, ki yāntì utaa tɔ́ ki kūū bi-waŋkuti.

⁴⁹Kí kúntée ní Unimbɔti dū u-ŋuukpaandi nì u-bum nì dinimbinaamandi ki tɔ́ bi-pu kii nnaabu tuuŋyee.

⁵⁰U nìn gíti cúú u-ba u-ŋuul poon, kaa nìn fīī-bi ki nyántì ŋkúm ŋaan, ama u nìn dū-bi ki líì nì bìlbil kúm ní.

⁵¹U nìn kūū Eejipiti yab jipɔŋkpilib kɔkɔ, u nìn kūū Kaam[109] naantiibi biseebiyaamu bi-tantibin.

⁵²Boonee, u nìn nyántì u-nibul kii kupicaŋkpuŋuee, u nìn péetì-bi ki cūnnì kuteeun kii apibilee[110].

⁵³U nìn kpōotì-bi ŋgbansɔŋfin ní baa nìn fāŋkì, ŋyunti ŋun nnyim nìn gbí ki léeǹ bi-nannanliibi puee[111].

⁵⁴Míǹ boonee ní u cáá-bi ki kɔ́ǹ u-circir tiŋkin, dijool din u dū úǹ u-ba pɔŋŋu ki fōōyee.

⁵⁵U nìn jìn̄ atimbun ŋin nib kóò niinee ki wāatì-bi, ki nìn dū kitiŋ ki yākatì-bi an kpántì bi-fakal. U nìn fōō Kanaan yab tiŋki ní ki dū Isirayeel naakɔti ki kāaǹ[112].

⁵⁶Ama bi nìn cɔ́ŋkì Yilpu Fɔ́ŋŋŋ Nimbɔtiu, ki nìn jáń nì u, ní kaa tɔ́ u-bɔkpaaŋi[113].

⁵⁷Bi nìn fātì bi-boon ki tīī-u ki nyáń u-boon kii bi-naanjab nín nìn ŋá puee. Kii butɔbu bun gíì ki gbàkēe, baa ŋūǹ kí nīn cáá bi-pu dimákal.

⁵⁸Bi nìn máń iwaatootipaan ŋgbantamu pu ki gbítì ti-Dindaan ŋuul. Bi nìn dū bi-waaŋi ŋin bi kpítèe ki kɔ́ǹ-u ipoompoon.

⁵⁹Unimbɔti nìn ká míǹ ní ki gíí diŋuul, u nìn dū Isirayeel ki fá kɔkɔ.

⁶⁰U nìn dū u-kɔŋkooŋŋu ŋun bí Siiloo tiŋkinee, tanti un bi nìn gāā-u ú nīn kóò binib kansikinee ki fá[114].

⁶¹U nìn dū u-pɔŋŋu ki líì nì kuyuŋu, ki dū u-nyaaŋku ki ŋá binannanliibi ŋaan[115].

⁶²U nìn yāntì bi dū kitàataajiki ki kūū u-nibul, u nìn gíí binib bin sá u-yabee pu diŋuul.

⁶³Ŋŋmi wùn̄ bi-naacimpɔmbi, baa ti gà bisapɔmbi ilan[116].

⁶⁴Bi nìn dū ntàataajimu ki kūū bi-saraaŋaliibi ní bi-kpiipoobi kaa gāā ikpiisilan ki súń.

⁶⁵Niinee ti-Dindaan cúu fīntì kii unil un gèen̄ee, a lì kii ubaatandaan un nyùn̄ ndaam ní an nyāatì-uee.

⁶⁶U fáá u-nannanliibi bi-boon pú, ní ki kɔ́ǹ-bi icoo kí nīn cáa cá jaanjaan.

⁶⁷U nìn dū Jooseefi dicaŋku ki fá, kaa nìn lēē Eefiraayiim naakooku,

⁶⁸ama Juuda naakooku ní u lēē, Siiyɔn jool din u néeńee.

⁶⁹U máń u-Circir kɔŋkooŋŋu niin kii yilpuee, u máń-ŋu ŋú nīn bí ki cá jaanjaan kii kitiŋee.

⁷⁰U nìn lēē u-tɔntɔnliu Daafiidi, kunaabakaun ní u nìn lēeń-u.

⁷¹Ipii boon ní u páatìń-u ki cáań ki dū-u ki kpántì un kpàá u-nibul Jaakɔb naantiibee, dinibul din di sá u-yalee[117].

⁷²Daafiidi nìn kpāā-bi nì dipɔbil diba, ki nìn dū dinyil ki kpōotì-bi.