Read Ntcham Psaumes 83 Bible Online

Psaumes 83 - Ntcham bible

Psaumes 83

¹Asaafi[128] di ŋmàn̄ nlan nee.

²Unimbɔti, taa pée ŋùŋfì báà fiii, taa nín̄ kā ki ŋmí kaa bíi ŋáań tiba.

³Kpèè a-nannanliibi cáá bi-ba ki yāŋkí an kɔkɔ pu, bin ná-see bíi gántí ayil.

⁴Bi bíi bɔ́ntí kí ŋá a-nibul tikpitil, bi kpáfì kinyɔkɔ kí ŋá bin pu aa mɔ̄ee tikpitil.

⁵Bi bíi lì yii: «Dāam̄maan tí kúntí bi-timbundi, bí taa ti téetí dalba dalba Isirayeel pu!»

⁶Bi sòon̄ ki ŋá kinyɔɔbaantii, bi ŋá mpèé kí já nì si.

⁷An sá Eedoom yab nì Isimaayeel yab, Moowaab yab nì Agaar naantiibi,

⁸Geebaal yab nì Amɔn yab nì Amaleeki yab, Fiiliistii yab ní kí kūtì bin kóò Tiir tiŋkinee.

⁹Ki kpáaǹ Asuur yab kútì bi-pu, kí tūtuǹ Looti yab.

¹⁰Ŋá-bi kii a nín nìn ŋá Madiyan yab puee, kii a nín nìn ŋá Siseela nì Jabiini Kiisɔn buŋŋun puee.

¹¹A nìn nāaǹ-bi Eeni-Dɔɔr, ní bi wūtì ki tīī kitiŋ ntiŋkpam.

¹²Ŋá bi-bɔtibiliŋ kii a nín nìn ŋá Ooreeb nì Seeb puee, ní kí ŋá bi-kpilib kii a nín nìn ŋá Seeba nì Saalmuuna puee.

¹³Binib gbanti di nìn lī yii: «Tí fōōmaan Unimbɔti nakpaapɔɔku.»

¹⁴M-Nimbɔtiu, yàntī bí kpántí ntam min kunaakpaabuŋŋu yòontée, àá tifeel tin kubuŋu yòontí ki féeńee.

¹⁵Kii ŋŋmi nín wù kupɔɔu puee, kii aŋmilimbil nín fòol̄ ajoon pu puee,

¹⁶dū a-buŋku kí jà-bi, dū a-buŋkpaaŋku kí fàaǹ-bi.

¹⁷Ti-Dindaan, yàntī icoo ń cúú-bi, án nín làá ŋá pu ní bí nyàab̀-see!

¹⁸Yàntī icoo nì dinyoondi ń nīn táá-bi ki cá talku, bí fá bi-jilimau kí kpú!

¹⁹Yàntī bí béé yii sii ní bi yíì ti-Dindaan, sii un baba sá Yilpu Fɔ́ŋŋŋ Nimbɔtiu kitiŋ kɔkɔ puee!