Read Ntcham Psaumes 85 Bible Online

Psaumes 85 - Ntcham bible

Psaumes 85

¹Koora dicaŋkun yab di ŋmàn̄ nlan nee ki tīī bilaŋgaaliibi kpiliu.

²Ti-Dindaan, a dàkà a-tiŋki a-neendi, a fātìi gíiǹní Jaakɔb naantiibi bin nìn bí kuyuŋuee.

³A pítì a-nibul yìntitam, a dū di-kpitii kɔkɔ ki pú-dì.

⁴A nín nìn gíí ti-pu diŋuul diŋyee kúntì, a páatì ti-pu mbum min a nìn fōō ti-puee.

⁵Unimbɔti ti-Fiiliu, fàtīí gíiǹní-ti, kúntí diŋuul din a gíí ti-puee.

⁶A làá gíí ti-pu diŋuul kí nīn cá jaanjaanaaa? A-bum kaa bí ki làá gbèen̄ dalba dalbaaa?

⁷Kéè a làá fàtīí tīī timbi a-nibul dimaŋfal, kí yàntī tí fàtīí nīn fàal̀ a-pueeee?

⁸Ti-Dindaan, yàntī tí ká a-neeŋkpaandi, ní kí tīī-ti a-fiil.

⁹M làá pīlifì tin ti-Dindaan Unimbɔti sòoǹee, di sá u bí yii u làá tīī u-nibul, nì bin sí nì u deedeeyee ŋgbansɔŋfi, ama bí taa ti fàtīí gítí digbaandin.

¹⁰Tiŋman u-fiil kaa ti dátiǹ bin fàŋkí-uee, ní tinyool làá nīn bí ti-tiŋkin.

¹¹Tiŋan nì ibaamɔn làá kpāfì, ní deedee nì ŋgbansɔŋfi ń kpàl̄ tɔb.

¹²Ibaamɔn làá nyānní kitiŋin kii iwamboolee ní deedee ń nyānní yilpu kí kpákatiń.

¹³Ti-Dindaan di lafun tìì tin ŋān̄ee, ní ti-tiŋki lòoǹ tikpaajin.

¹⁴Deedee līī ti-Dindaan nyɔkɔpu, ní ki ŋàtī nsan ŋun pu u còom̄ee.