Read Ntcham Psaumes 88 Bible Online

Psaumes 88 - Ntcham bible

Psaumes 88

¹Koora dicaŋkun yab di ŋmàn̄ nlan nee ki tīī bilaŋgaaliibi kpiliu. Eeman un sá Seera naantiiuee di dàkā nlan gbanti.

²Ti-Dindaan Unimbɔti m-Fiiliu, m kūuntí ki yíì-si ŋwiimpu nì kunyeeu.

³Yàntī m-wimmeem ń bàń-si, kpòon̄ a-tafal kí pīlifì m-gbaamii.

⁴Di sá yii agìń ŋma poon ní m bí, ní maa ti dátiǹ ŋkúm.

⁵Bi kàaǹ-mi ki kútí bin bí dikaakulinee pu ní, m bí kii unil un wuntin mpɔn dóòyee.

⁶M-paaŋŋu kíǹ ki bí bitaŋkpiibi kansikin ní, m kpántì kii bin bi kūū bi dɔ̄ dikaakulinee ní, aa ti téetí bíǹ pu, di sá yii aa ti ŋáań tiba kí tīī-bi.

⁷A dū-mi ki bíl̀ dikaakulin taapu taapu, laakin dibɔmbɔŋkpaandi bée.

⁸A-ŋuul nyìm̀ m-pu, a dū a-nyiŋgbanti kɔkɔ ki léeǹ m-pu.

⁹A jìn̄ bin m nyée ki wāatì-mi, m kíǹ ki cáá-bi titantan ní. M kpántì usarkadaan ní, maa ti ŋūǹ kí nyā.

¹⁰Falaa ŋmɔ́ ki bíil̀ m-nimbiliŋ. Baabadalee, m kūuntí ki yíì-si ní, m-Dindaan, m yòontí m-ŋalii yilpu ki túl̀ a-watil pu[131].

¹¹Bitaŋkpiibi ní a làá ŋá maamaacib kí tīīii? Bin dɔ̄ bi-ŋalii puee làá yīkì kí nyɔ̄ŋkì-saaa?

¹²Dikaakulin ní unil ŋūǹ kí sòoǹ a-neeŋkpaandi puɔɔɔ, ditaŋkpiilin ní u ŋūǹ kí sòoǹ a-deedeeu pu ní[132]?

¹³Ŋma nyí a-maamaacib pu dibɔmbɔndi gbanti poon? Ŋma nyí a-deedee tuuŋŋi pu binib bin pu bi súntèe tiŋkin?

¹⁴Ama mamee, sii ti-Dindaan ní m gbáà ibiil ki yíì, kutaafaauee, m-wimmeem bàń a-nimbiin.

¹⁵Ti-Dindaan, ba pu ní a dū-mi ki fá, kaa ti là kí wāl̀-mi ní?

¹⁶Doooo m-biyatin ní m gbí falaa kaa dátiǹ ŋkúm, a kɔ́ǹ-mi dinyoondin ní maa ti nyí tin poon m bée.

¹⁷A-ŋuul din fòol̄ lìblibee jítì m-pu, a-nyoondi nāaǹ-mi kɔkɔ.

¹⁸Dì māntìi tú-mi baabadal kii nnyimee, di māntìi tú-mi an kɔkɔ pu.

¹⁹A yāntì m-bɔɔbi nì m-jutiibi dū-mi ki fá. Dibɔmbɔndi baba di kíǹ ki nyí-mi.