Read Ntcham Psaumes 89 Bible Online

Psaumes 89 - Ntcham bible

Psaumes 89

¹Eetan un sá Seera naantiiuee di dàkā nlan nee.

²Ti-Dindaan, a-ŋanti puee, m làá nīn gà ilan ki nyɔ́ŋkí-si baabadal, m làá sòoǹ kí yàntī binib ń béé a-baamɔŋyi kí nīn cá jaanjaan.

³Di sá m lī yii: «A-ŋanti bí ní baabadal, a dū a-baamɔŋyi ki ŋá yilpu ní.»

⁴A lī yii: «M pūtì ki pōoǹ un m lēēyee dipoondi, m pūtì ki tùkū m-tɔntɔnliu Daafiidi yii:

⁵A-naantiibi kansikin ubɔ làá nīn pée sá ubɔti ní, m làá tīī a-beel mpɔn dí nīn bí ki cá jaanjaan[133].»

⁶Yilpu tuuŋyi nyɔ́ŋkí a-maamaaci tuuŋŋi, nì a-baamɔŋyi circirdambi kpafiŋin.

⁷Ti-Dindaan, ŋma sá a-juti yilpu? Si nì ŋma náań inimbɔti kansikin?

⁸Unimbɔti, circirdambi kpafil poonee, bi fàŋkí-si ní yɔ́kɔ́ yɔkɔ. A sá kuwambiiu ki jítiǹ bin kɔkɔ māntìi tú-see.

⁹Ti-Dindaan Unimbɔti Mpɔŋkɔdaan, ŋma di cáá mpɔn kii siiyee? A-baamɔŋyi māntìi tú-si.

¹⁰Sii di cáá tiŋku un cáá dilambilee pu mpɔn, u-nyiŋgbanti yaa yíkèe, sii di yàntī tí dòon̄ soooo.

¹¹Sii di nàn̄ Raab[134] kupeebiliŋŋu kun a kūūyee, nì a-kpabil ní a dūu gbáń ki yāaǹ a-nannanliibi.

¹²Sii di yì yilpu, sii di yì kitiŋ mun, sii di tí náań duulinya nì tin kɔkɔ bí u-puee.

¹³Sii di náań ŋgan pú nì ŋgiil pú, Tabɔɔr nì Eermɔn jooŋŋi gà ilan ki nyɔ́ŋkí a-yindi.

¹⁴Sii di yì ŋŋal ŋun cáá mpɔnee, ŋŋaŋgiil ŋun a yōoǹ yilpu kí dàkà a-kpabilee.

¹⁵A-beejal tɔ́kɔ́ deedee nì tin tèen̄ee pu ní, ní dineendi nì ibaamɔn līī a-nyɔkɔpu.

¹⁶Ti-Dindaan, binib bin nyí bi nín nyɔ́ŋkí-si puee bí mmɔnneeee! Bi còom̄ a-nimbiin walifiŋun ní.

¹⁷A-yindi puee, bi fàal̀ ní baabadal, a-deedeeu puee, bi-yindi yíkí yilpu.

¹⁸Sii di sá ti-pɔŋkpaaŋŋu, a-ŋanti pu ní ti còom̄ ti-yil gáań.

¹⁹Tiŋman ti-Dindaan di yì ti-gbampɔɔl, Isirayeel circir Nimbɔtiu di yì ti-bɔtiu.

²⁰A sòon̄ dalba dileedakal diban ki tùkū bin sí nì si deedeeyee yii: «M tútúǹ ubaatandaan ubɔ, m yōoǹ m-nibul kansikin unaacimpɔɔn ubɔ yilpu.

²¹M ká Daafiidi m-tɔntɔnliu, m bātì m-circir kpam ki sītì u-yil pu[135].

²²M-ŋal làá nīn ŋúb́-u gbīŋgbim, m-ŋal làá tīī-u mpɔn.

²³Unannanli ubɔ kpá kí túuǹ-u, unikpiti ubɔ mun kpá kí já kí pɔ̄ɔkiǹ-u.

²⁴M làá nà u-nannanliibi dúsi dusi u-nimbiin, m làá kpɔ̀ bin kɔkɔ ná-uee.

²⁵M-baamɔŋŋu nì m-neeŋkpaandi làá nīn bí u-cee, m-yindi puee, u làá nīn còom̄ u-yil gáań.

²⁶M làá dū tiŋku kí ŋá u-ŋaan, u làá nīn cáá ibun pu mpɔn.

²⁷U làá dāá yíiń-mi yii: <M-baa, sii di sá m-Nimbɔtiu nì kutaŋkpanaakoou kun fìil̄-mee!>

²⁸M làá yàntī ú kpántí m-jipɔŋkpiliu, kí nīn sá ukpaan ki jítiǹ kitiŋ pu bɔtiibi kɔkɔ[136].

²⁹M làá dàkà-u m-neeŋkpaandi kí nīn cá jaanjaan, ní ki kpá kí kpìtī dipoondi din m pōoǹ-uee.

³⁰U-naantiibi kansikin ubɔ làá nīn pée sá ubɔti ní, ní u-beel ń yúntí kii kutagbɔŋu nín làá yúntí puee.

³¹«Báà u-naantiibi yaa dū m-marab ki fá kaa nóó m-saŋŋu,

³²bi yaa yīntiǹ m-bɔkpaaŋi ní kaa ŋúb́ m-koobiliŋee,

³³m làá dū ndɔ kí gbá-bi bi-yìntitam pu ní kí dū dinaalabil kí dáaĺ bi-tafal bi-kpitii pu.

³⁴Ama maa làá ŋmìntī-bi m-neeŋkpaandi, kaa tí làá fàtī m-boon kí tīī m-poondi.

³⁵Maa làá kpèè m-poondi fám, kaa tí làá kpántí tin nyáń m-nyɔkɔnee.

³⁶M pūtì m-circir yindi dibaba ja yii maa làá mɔ̄ntì Daafiidi nnyimɔn.

³⁷U-naantiibi làá nīn bí ki cá jaanjaan, ní u-beel ń nīn pée bí m-nimbiin baabadal kii ŋwìińee.

³⁸U-beel làá nīn bí ki pɔ̄ɔ̄ ki cá jaanjaan kii uŋmal un bí atagban poon ki sá deedee seeradaaŋwuee.»

³⁹Ama a fātì a-boon ki tīī ubɔti un a lēēyee ki dū-u ki fá, ní ki gíí u-pu diŋuul.

⁴⁰A nyáń dipoondi din a nìn pōoǹ a-tɔntɔnliuee boon, ní ki dū u-beefuuliiki ki lúkú kitiŋ ki kɔ́ǹ-kì tijɔkɔndi.

⁴¹A yāntì digundi din māntìi tú u-tiŋkee bátì bátì ki lítì, u-tiŋki kin bi máń digundi ki túee kpántì adigbuŋkati.

⁴²Bisanjitiliibi fúkúl̀-u pílpil, ní u-kɔŋkɔnnaatɔb bèel̄-u.

⁴³A tīī u-nannanliibi mpɔn, a yāntì u-pulincɔntiibi bí ki fàal̀.

⁴⁴A fātì u-tàataajiki ki túĺ-u kaa tútúǹ-u kujaaun.

⁴⁵A yāntì u fá u-nyooti, ní ki téé u-beejal ki lúkú.

⁴⁶A bātì u-naacimpɔnti wiiŋyi pu, ki kɔ́ǹ-u icoo.

⁴⁷Ti-Dindaan, kí cáá sāā ŋyunti ŋulɔŋu ní a làá dū a-ba kí báĺ-ti ní? Kí nīn cáa cá jaanjaanaaa? Kí cáá sāā ŋyunti ŋulɔŋu ní a-ŋuul din fòol̄ lìblib kii ŋŋmi nee làá gbèen̄ ní?

⁴⁸Téetí m-pu, unil maŋfal wiiŋyi kaa náaǹ! A náań nisaal kí kúntíǹ fám ní.

⁴⁹Unil ulɔu di bí kaa làá kpú dalba dalba, ki làá ŋmā kí fīī u-maŋfal kí taa kɔ́ ditaŋkpiilin?

⁵⁰Ti-Dindaan, dineeŋkpaandi din a nìn dàkā doooo cannaaku, din a nìn pūtì ki pōoǹ Daafiidee bí la?

⁵¹Ti-Dindaan, téetí a-tɔntɔnliibi siibiliŋ pu, asiibil ŋin ní anibul tikpil sīī-mee.

⁵²Ti-Dindaan, a-nannanliibi bí ki sìí-mi, man ubɔti un a lēēyee yaa jītée bi tíiĺ timɔtan ní.

⁵³Tí nyɔ̄ŋkìmaan ti-Dindaan kí nīn cá jaanjaan! Án ŋá míǹ, án lafun ŋá míǹ!