Read Ntcham Psaumes 90 Bible Online

Psaumes 90 - Ntcham bible

Psaumes 90

¹Unimbɔti niliu Mooyiisi wimmeem. Ti-Dindaan, sii di sá ti-balilaŋki doooo abin abin.

²Kí wàatī ajoon ń nīn bée, kí wàatī á náań kitiŋ nì duulinyee, sii di nìn sá Unimbɔti ní ki làá nīn pée sá Unimbɔti.

³A yàntī unil fàtīi gítí ntamin[137], di sá a lī yii: «Nisaal, fàtīí gítí laakin a nyánnée.»

⁴Sii ceeyee, abin kutuku sá kii ŋwiin ŋubɔee ní, a lì kii fool un jítì nee, àá ŋyunti ŋun bijanjaliibi dūú sīĺ sintil kunyeeuee ní[138].

⁵A kúntí unil maŋfal wiiŋyi. I bí kii ŋgeemee ní, ní kutaafaauee í wāŋkì kii kumoouee.

⁶Kutaafaauee kumoou màtī ní kí wíiǹ, kujoouee ní kú fáaḿ kí kpā.

⁷Tiŋman, a-ŋuul púntí-ti, a-bum fàantí-ti.

⁸A dū ti-yìntitam ki bíl̀ a-nimbiin, a-walfiŋu ŋmíntì ti-kpitii in ti ŋáań dibalinee pu.

⁹A-ŋuul pu ní ti-maŋfal wiiŋyi kúntí, ti-maŋfal wiiŋyi kúntí malaa kii diniindee ní.

¹⁰Unil yaa tin yúntèe di sá u bàn̄ abin imuŋku ita nì saalaayee. Un pɔ̄ɔ̄yee di bà abin imuŋku inaa. Ama kun ti kāntí ŋi-poonee di sá agìń nì falaa. Ti-maŋfal wiiŋyi jītí malaa ní tí búntí.

¹¹Ŋma di ŋūǹ kí béé a-ŋuul pɔŋŋu? A-bum sá ŋkpaami kii an nín máaǹ bí fàŋkì-si puee ní.

¹²Yàntī tí béé yii ti-maŋfal wiiŋyi kaa náaǹ, án nín làá ŋá pu tí ká iciin ti-pɔbil poonee.

¹³Ti-Dindaan fàtīí gítiń, kí cáá sāā ŋyunti ŋulɔŋu ní a-ŋuul làá nīn gbíntìi bí ti-pu ní? Sɔ̄ timbi a-tɔntɔnliibi saai.

¹⁴Dàkà-ti a-neendi kutaafaau, ní tí nīn gà ilan ki fàal̀ ti-maŋfal wiiŋyi kɔkɔ poon.

¹⁵Yàntī tí fàal̀ iwiin in nyɔkɔm a sīntiǹ-ti taapuee, abin ŋin nyɔkɔm ti ká nnaabuee.

¹⁶Yàntī timbi a-tɔntɔnliibi ń ká a-tuŋkpaaŋŋi, ní ti-biyaamu ń ká a nín sá ukpaan puee.

¹⁷Ti-Dindaan ti-Nimbɔtiu, yàntī a-saasɔl ń nīn bí ti-pu, yàntī án bútí-ti ti-tuuŋŋi kɔkɔ poon, tiŋman, yàntī án bútí-ti.