Read Ntcham Psaumes 92 Bible Online

Psaumes 92 - Ntcham bible

Psaumes 92

¹Inyɔŋki laŋŋu ŋun bi gà ŋwiŋŋuŋfikaa dalee.

²Ti-Dindaan, an ŋān̄ yii tí nyɔ̄ŋkì-si, kí gāā ilan kí tīī sii Yilpu Fɔ́ŋŋŋ Nimbɔtiu yindi tinyool!

³An ŋān̄ yii kutaafaauee tí sòoǹ a-neeŋkpaandi pu, ní kunyeeuee, tí sòoǹ a-baamɔŋyi pu,

⁴kí bɔ̀ɔ̀ iŋmii saalaa beeku nì saŋgu kí nyɔ̄ŋkì-si.

⁵Ti-Dindaan, a-tuuŋŋi tìì-mi mmɔn, atuun ŋin a ŋée puee, m làá gāā ilan kí fàal̀.

⁶Ti-Dindaan, a-tuuŋŋi sá akpaaneeee, a-landɔkɔi nyóò tikpil!

⁷Un kaa dàkafēe kaa nyí míǹ, ugbaan kaa ŋūǹ kí gbìl̄ taapu.

⁸Binikpitib nyēē ki bí fàlfal kii timoolee, an bútí bikpitiŋaliibi, ama an kaa làá sūŋkì, bi làá kpú kí céetí.

⁹Ama sii ti-Dindaan di tɔ́kɔ́ tikɔkɔ pu kí nīn cáa cá jaanjaan.

¹⁰Kpèè a-nannanliibi, ti-Dindaan, kpèè a-nannanliibi kɔkɔ làá kpú kí céetí, bikpitiŋaliibi kɔkɔ làá yàl̄.

¹¹A tīī-mi upɔɔnaa pɔŋŋu, a bātì ŋkpam min sɔ́fèe ki sītì m-pu.

¹²M-nimbil ká m-nannanliibi lítitam, m-tafal gbìl̄ bin jáà nì mee biilii pu.

¹³Deedeedaan wīintí kii bubabuee ní, u fɔ̀kɔntí kii Leebanɔn subu bun bi yíì seediree.

¹⁴U bí kii busubu bun bi cóoǹ kunimbɔtidiinee ní, bu pɔ̀kɔtī ti-Nimbɔtiu cindin.

¹⁵Báà bu yaa púĺaaa, bu gbíntìi lòoǹ ní, bu cáá ŋkpiim ní ki sɔ̀m̀.

¹⁶Bu sòoǹ ti-Dindaan deedeeu pu yii: «U sá m-taŋkpanaakooku ní! Baa kāntí tin kaa bí deedeeyee u-ni!»