Read Ntcham Psaumes 94 Bible Online

Psaumes 94 - Ntcham bible

Psaumes 94

¹Ti-Dindaan, sii Unimbɔti un tɔ̀ ipɔntoonee, lēē a-ba kí dàkà, sii Unimbɔti un tɔ̀ ipɔntoonee.

²Yīkìm̄, kitiŋ pu nib bɔsoonliu, kí pà bilambidambi bi-tuuŋŋi paati.

³Kí cáá sāā ŋyunti ŋulɔŋu ní binikpitib làá nīn bí ki fàal̀ ní? Kí cáá sāā ŋyunti ŋulɔŋu ní, ti-Dindaan?

⁴Bi yòontí bi-ba yilpu ki sòoǹ tilambibɔti, bikpitiŋaliibi nee kɔkɔ dàkà bi-ba.

⁵Ti-Dindaan, bi wɔ́b̀ a-nibul, bi sàantí bin sá a-yabee.

⁶Bi kù ukpiipu nì unicaan, ki kù ataŋkpiibil.

⁷Ní ki bí ki lì yii: «Ti-Dindaan kaa wāĺ, Jaakɔb Nimbɔtiu kaa fātìi tɔ́[141].»

⁸Nimbi bigbaambi nee, ní cúúmaan ni-ba, nimbi bin kaa dàkafī nee, ba dal ní ni làá gbìl̄ taapu ní?

⁹Un di ŋá unil tafalee kaa gbìl̀aaa? Úǹ un náań unil nimbilee kaa wāĺaaa?

¹⁰Úǹ un dátí atimbun tafalee di kaa ŋūǹ kí dáaĺ unil tafalaaa? Ti-Dindaan un tìì unil dinyilee,

¹¹u nyí unil landɔkɔi kɔkɔ! U nyí i nín kaa bí tibanee[142].

¹²Ti-Dindaan, unil un tafal a dátí, ki cáá a-marab ki dàkà-uee bí mmɔnneeee!

¹³Dinimbinaamandi yuntiŋuee, a yàntī u bí ŋgbansɔŋfin, ki cí bí gbà mbòó kí cīití binikpitib.

¹⁴Di sá yii ti-Dindaan kaa dù u-nibul kí fá, waa fàtī u-boon kí tīī bin sá u-yabee.

¹⁵Bi làá dāá fàtīí sòoǹ binib bɔti nì ibaamɔn, ní bin kɔkɔ pɔbil bí dibee ń dāá kíí míǹ.

¹⁶Ŋma di làá sòoǹ m-bɔti bikpitib nee cee kí tīī-mi? Ŋma di làá mɔ̄tì m-pu bikpitiŋaliibi nee cee?

¹⁷Ti-Dindaan yaa kaa bàà jòoń-mi, an bàà kíǹ fiii m-naŋki ń kɔ́ diŋmiŋŋmidikil tiŋkin[143].

¹⁸M yaa bí yii: «M-taaŋi bíi yɔ̀tēe», ní sii ti-Dindaan neeŋkpaandi ń tíkiń-mi.

¹⁹Ilandɔkɔ yaa bàà wíiǹ m-ni ki nyīŋfì m-puee, ní á ŋméeǹ-mi kí tīī-mi dipɔɔsɔŋkil.

²⁰Sii nì bibɔsoonliibi binikpitib nee ŋá mpèéee? Bíǹ bin nāantí falaa kaa dū mara ki yíiń tibee.

²¹Bi kpáfí kinyɔkɔ ki lèekī deedeedaan maŋfal, ki sòoǹ maanyiiba bɔti ki kù-u.

²²Ama ti-Dindaan di nìn kpántì m-balilaŋki. M-Nimbɔtiu di nìn sá kutaŋkpanaakoou kun m sáǹ ki kɔ́ee.

²³U yāntì bi-kpitii gítì bi-pu, u dū bi-kpitii ki nāaǹ-bi. Ti-Dindaan ti-Nimbɔtiu di nāaǹ-bi.