Read Ntcham Psaumes 96 Bible Online

Psaumes 96 - Ntcham bible

Psaumes 96

¹Gāāmaan nlampɔɔn kí pàkà ti-Dindaan, duulinya kɔkɔ nib, gāāmaan ilan kí pàkà ti-Dindaan.

²Gāāmaan ilan kí pàkà ti-Dindaan, ní nyɔ̄ŋkìmaan u-yindi. Ní nīn sòoǹ u-fiil pu ŋwiin kamaa.

³Ní māafìmaan u-nyooti atimbun poon, kí māafì maamaacib bin u ŋáaǹee anibul kɔkɔ poon.

⁴Di sá ti-Dindaan sá ukpaan ní ki máaǹ inyɔŋki, úǹ di sá kuwambiiu ki jítiǹ inimbɔti kɔkɔ.

⁵Anibul ŋin kíǹee nimbɔtii kɔkɔ sá fám ní, ama ti-Dindaan di náań yilpu.

⁶Tinyool nì jilma bí u-nimbiin, mpɔn nì kunyaaŋŋu gbí u-kɔŋkooŋŋun.

⁷Kitiŋ pu nibuliŋ, tīīmaan ti-Dindaan u-nyooti kí sòoǹ u-pɔŋŋu pu.

⁸Tīīmaan ti-Dindaan u-yindi nyooti, ní cáaḿmaan ni-saraabi, ní kɔ́maan u-cindin.

⁹Bòom̄maan taapu ti-Dindaan nimbiin, ŋyunti ŋun ní u yaa lēē u nín bí circir puee ki dàkēe. Nín̄ jìkìmaan nì tifaandi u-nimbiin, kitiŋ pu nib kɔkɔ.

¹⁰Tùkùmaan atimbun nib kɔkɔ yii: «Ti-Dindaan jīǹ dibeel, duulinya bá ki pɔ̄ɔ̄, kaa cìŋkī. U sòoǹ anibul bɔti nì ibaamɔn ní.»

¹¹Yilpu ń nīn fàal̀, kitiŋ ń nīn bí dipɔɔpindin, tiŋku ń nīn gà kuwoou, ki kpáaǹ tin kɔkɔ bí u-poonee!

¹²Tisati ń nīn fàal̀ ki kpáaǹ tin kɔkɔ bí ti-poonee! Isufi in yú kubambaŋŋunee ń nīn kūuntí nì dipɔɔpindi

¹³ti-Dindaan nimbiin. Di sá yii u dòoń, u dòoń kí dāá sòoǹ kitiŋ pu nib bɔti. U làá dū deedee kí sòoǹ duulinya bɔti, kí dū u-baamɔŋyi kí sòoǹ anibul bɔti.