Read Ntcham Proverbes 1 Bible Online

Proverbes 1 - Ntcham bible

Proverbes 1

¹Daafiidi jipɔɔn Saloomɔn un sá Isirayeel bɔtiuee laŋkpaŋŋi[1].

²Alaŋkpan nee yàntī unil ń béé iciin kí dàkà-u ú nīn nyí tibɔti tin cáá taapuee.

³Ŋi yàntī unil ń ká didàkamɔntiil, kí nīn bí deedee, kí nīn cáá tibulcin ní kí nīn nóó ibaamɔn saŋŋu.

⁴Ŋi yàntī sɔkɔmii nib ń nīn wálifì, ki tìì binipɔmbi dinyil nì nlandɔkɔ.

⁵Uciŋfiti pílifí-ŋi ní ki mɔ̀tīi cíkití iciin, ní ŋi kpòotī unyil ki tàkantí nsammɔnti pu

⁶ú ŋmā kí béé alaŋkpan nì ipɔɔn nì biciŋfitiibi bɔti tin bí dibalin bi lèekī ki dàkèe.

⁷Á fàŋkì ti-Dindaan di sá iciin kílilaŋki[2]. See bigbaambi tafal di kaa fātìi tɔ́ didàkal nì biciŋfitiibi saŋkii.

⁸M-jipɔɔn, pīlifì a-baa dàkal, taa kpèè a-na dàkatam fám.

⁹Án di dāa sá kifuunyaaŋŋi ki cíkí a-yil, nì tiléeŋkaal tin a lá a-neenee.

¹⁰M-jipɔɔn, bikpitiŋaliibi yaa là kí kīil̀-see, á taa kíí.

¹¹Bi yaa lī yii: «Dāan̄ kí nóó-ti tí cùú nákań nsanni, binib yaa jītée tí kpɔ̀-bi. Tí cùú píĺ kpaalaa kí cúú maanyiiba un kaa ŋá-ti tibee.

¹²Tí yàntī bí sìntī ditaŋkpiilin nì bi-nimbiliŋ, bí kɔ́ dikaakulin nì bi-laafiyau.

¹³Ti làá ká tiwan tin pɔ̄ɔ̄ kudaauee nì ti-bulifi. Ti làá gbéeǹ ti-dumpui nì tiwan tin ti fúkúl̀ee.

¹⁴Sii mun wanti làá nīn bí poon, kun puee ti làá dū ti-kɔkɔ yati kí kpāfì dicilpu ní!»

¹⁵M-jipɔɔn, taa nóó an nib gbanti, sii nì bi ń taa pèen̄ nsan.

¹⁶Di sá yii bi sáń ki cá kí ŋá ikpiti ní, bi yáb̀ nnikpaakoon pu.

¹⁷An sá fám ní bí píĺ kutaliŋŋu unoon nimbilin.

¹⁸Ama bíǹ pīil̀ bi-ba ní kutaliŋŋu, bíǹ bi-ba maŋfal ní bi pīil̀ kpaalaabi.

¹⁹Míǹ ní an sá ki tīī un kamaa yù bunaayubuee. Bu làá dāá lēē bin ni bu bée maŋfal.

²⁰Iciin[3] bíi kūuntí mpɔn adan pu, i bí ki sòoǹ mpɔn mpaampiin pu.

²¹Iciin kūuntí ki yíì binib sampaambi pu, i sòoǹ ki báakí tin i cáá kí lèe ntimu punyɔmmu nyɔkɔpu[4].

²²Iciin téeń ki lī yii: «Nimbi nnaatuumu làá nīn néeń inaatuu kí tin sāā ŋyunti ŋulɔŋu dee? Nimbi bibeeliliibee, ni làá nīn bèel̄-mi kí tin sāā ŋyunti ŋulɔŋu ní? Nimbi bigbaambi làá nīn ná dinyil kí tin sāā la?

²³Pīlifìmaan tin m cáá kí wòoǹ-nee. M làá yàntī m-fam ń kpákatí ni-pu ní kí yàntī ní béé m-bɔti.

²⁴Ama m yíì-ni ní naa pílifí, m tāntì m-ŋal ni-watil pú ní ni-kansikin báà ubɔ kaa fātìi tɔ́.

²⁵Ni fá m-saŋkii kɔkɔ, kaa kíí ḿ wòoǹ-ni.

²⁶Dinimbinaamandi yaa láa jéetì ni-puee, ma mun làá dāá lā-ni. Ni yaa láa kɔ́ dinyoondinee, m làá dāá bèel̀-ni.

²⁷Di sá yii ŋwindalee dinyoondi làá dāá jēetí ni-pu kii umɔfiintaayee. Dinimbinaamandi làá dāá jēetí ni-pu kii kunaakpaabuŋŋuee, ní kunimbaau nì nnaabu ń dāá kɔ́-ni an kaa cáá bí lì.

²⁸Niinee ni làá dāá yíiń-mi, ama maa làá dāá kíí-ni, ni làá dāá nyàab̀-mi, ama naa làá dāá ká-mi[5].

²⁹Kun puee ni ná dinyil, ní kaa lēē kí nīn fàŋkí ti-Dindaan.

³⁰Naa fōō m-saŋkii, kaa fātìi tɔ́ tin ní m kpáafì-nee.

³¹Mimmee kun ní ni-bimbikpitim búĺee, kúǹ ní ni làá cā, atuŋkpiti ŋin ni bɔ́ntì ki làá ŋée di làá kpíiǹ-ni.

³²Di sá yii nnaatuumu nín kaa bífí iciin puee di làá kpɔ̀-mu, ní tiba nì tiba nín kaa ká bigbaambi puee di làá nàan̄-bi.

³³Ama un kamaa di yaa pílifì-mee làá nīn bí ŋgbansɔŋfin, ní kaa làá fàŋkì nnaabu.»