Read Ntcham Proverbes 10 Bible Online

Proverbes 10 - Ntcham bible

Proverbes 10

¹Saloomɔn laŋkpaŋŋi. Kibiki kin cáá iciinee yàntī ki-baa bí mmɔnni ní, kin kaa cáá iciinee sá kunimbaau ní ki tīī ki-na.

²Tigaajati tin bi dī isaŋkpiti pu ki kée kaa kèetī, ama deedee saŋŋu nyāntí unil ŋkúmin.

³Ti-Dindaan kaa yàntī deedeedaan ń kpú ŋkùm, ama waa yàntī binikpitib ń ká tin bi lèe.

⁴Iŋal in jòon̄ee cāabìń disool ní, iŋal in tūǹ ditundee tìì tigaajati.

⁵Unil un cēē tikpaajin dipeel puee sá ulandɔkɔdaan ní, ama un dɔ̄ ki gèeǹ ŋyunti ŋun bi cēē tikpaajinee cāabìń icoo ní.

⁶Unimbɔti bìintí deedeedaan pu, ama tipɔmbɔti nyɔɔbuŋŋi di gbí binikpitib sooŋyi poon.

⁷Bi téetí deedeedaan pu nì kupampakau, ama ní kí súntí binikpitib pu kí kpáaǹ bi-yiŋŋi.

⁸Uciŋfiti kíikí kí nóó marab kí nīn tɔ́-bi, ama unil un sòoǹ kaa dàkafēe làá nàan̄ u-ba ní.

⁹Un cáá tibulcinee còom̄ nì ŋgbansɔŋfi, ama un dī isan in gɔ́ĺee, Unimbɔti làá nyāntí udaan kí páań mpaampiin pu.

¹⁰Unil un cáá ibaamɔn ki bāal̀ u-jutiibee sàantí-bi ní, ní un sòoǹ kaa dàkafēe nàantí u-ba.

¹¹Deedeedaan nyɔɔbuŋŋi sá kii nnyimbul ŋun tìì dimaŋfalee ní, ama tipɔmbɔti nyɔɔbuŋŋi di gbí binikpitib sooŋyi poon.

¹²Kináŋ cāabìń kujaau binib kansikin ní, ama dineendi díǹ bìintí ikpiti kɔkɔ pu ní[19].

¹³Iciin bí unil un cáá dinyilee nyɔɔbuŋŋin, ama mbambaan dɔ̄ ki cí ugbaan boon ní.

¹⁴Biciŋfitiibi kpáafí dinyil kii tigaajatee ní, ama bigbaambi nyɔɔbuŋŋi làá nàan̄-bi dicilpu dicilpu ní.

¹⁵Ugaaja wanti wúń u-pu kii digundee ní, ama bisoodambi sool di nàantí-bi.

¹⁶Deedeedaan paati di sá dimaŋfal, ama unikpiti paati di sá ikpiti.

¹⁷Unil un kíikí bí kpāafì-uee tàkā dimaŋfal saŋŋun, ama un kaa là bí wòoǹ-uee wáŋkí ní.

¹⁸Un ná u-juti dibalinee sá mpɔnnyoondaan, ama un kúŋfí u-juti boonee sá ugbaan ní.

¹⁹Unil un sòoǹ tikpilee, see ú yìntī, ama un kaa sòoǹ tikpilee sá uciŋfiti ní.

²⁰Deedeedaan nyɔɔbuŋŋi sá kii animbil kúti timɔntiilee ní, ama binikpitib pɔbiliŋ kaa bí tiban.

²¹Deedeedaan nyɔɔbuŋŋi kèetī kunipaau ní, ama bigbaambi bíǹ kúù, kun puee baa nyí tiba.

²²Ti-Dindaan biindi baba di yì unil gaajati, u-pɔ́ɔǹtam kaa pée kútí tiba.

²³Kí ŋá ikpitee sá agbiil ní ugbaan cee, míǹ ní iciin mɔ̄ unyil cee.

²⁴Kun unikpiti fàŋkée di bàń-u, ama tin kā deedeedambi naŋki puee ní bi kāntí.

²⁵Utaafiiŋkaa tin lì yii u nì kí báatée, unikpiti kaa ti bí, ama deedeedaan úǹ yú kaa cìŋkī.

²⁶Kii ayeen nín nyàŋfī unil nyiŋŋi pu ní nnyiim kóò unil nimbiliŋin puee, míǹ ní uwutijoodaan sá ki tīī un yaa tú-uee.

²⁷Unil un fàŋkí ti-Dindaanee maŋfal làá fɔ̀kɔn̄, ama binikpitib kaa bà bi-wiiŋŋu ní kí kpú[20].

²⁸Deedeedambi mákal cāabìń-bi dipɔɔpindi ní, ama binikpitib bíǹ mákal dāa pée kúntí nì fám ní.

²⁹Ti-Dindaan saŋŋu sá kutaŋkpanaakoou ní ki tīī deedeedaan, ama ní ki sá dinàandi ki tīī binib bin di ŋáań ikpitee.

³⁰Tiba kpá ki cìŋkì deedeedaan dalba dalba, ama binikpitib bíǹ kaa làá kàl̄ kitiŋ pu.

³¹Iciin nyɔɔbuŋŋi di nyēē deedeedaan nyɔkɔn, bi làá dāá gíí kí tìl̄ bin sòoǹ tibɔkpitilee limbil.

³²Deedeedaan nyɔɔbuŋŋi mɔ̄ dipilifil, ama binikpitib bíǹ nyɔmmu nyēē tibɔkpitil ŋma ní.