Read Ntcham Proverbes 11 Bible Online

Proverbes 11 - Ntcham bible

Proverbes 11

¹Ti-Dindaan ná saniyab bin kaa ŋmàntī tiwan deedeeyee, ama tiwaŋŋmantikaal tin bí deedeeyee di fáatì ti-Dindaan pɔbil[21].

²Dilambil di cāabìń icoo, ama binib bin sīntiǹ bi-ba taapuee di cáá iciin.

³Deedeedambi bulcinti di kpòotī-bi, ama biibiidambi saŋkiŋkpitiŋ di nàantí-bi.

⁴Ti-Dindaan ŋuul dalee, tigaajati kaa dāa kèetī, ama deedee saŋŋu di dāa nyāntí unil ŋkúmin.

⁵Bibulcinnib deedeeu di tàntī bi-saŋŋu, ama ní binikpitib bíǹ lítí bi-tuŋkpitiŋ pu.

⁶Deedeedambi deedeeu di fìil̄-bi, ama biibiidambi nimbitaataam di fàtīi sàtī-bi kii kutaliŋŋuee.

⁷Unikpiti yaa kpíìyee, u-mákal mun kúntì dee, ní dimákal din u cáá u-gaajati puee mun ń ŋá fám.

⁸Deedeedaan làá nyā dinimbinaamandin, ní unikpiti ń fōō u-yil kí kɔ́ di-ni.

⁹Unyimɔndaan nyɔkɔ ní u cáa kù u-juti, ama deedeedambi nyil pu ní bi kāntí difiil.

¹⁰An yaa bútì deedeedambee, ifaal bí kitiŋin ní, ama binikpitib yaa kpíìyee, bi kūuntí ní ki fàal̀.

¹¹Deedeedambi biindi di yì-tì ní an bútí bi-tiŋki, ama binikpitib nyɔɔbuŋŋi di nàantí-kì.

¹²Unil un kpèé u-juti fámee kaa nyí tiba, ama unil un cáá dinyilee ŋmí ní.

¹³Unil un cāab̀ u-juti disambiilee kaa bāal̀ tibɔti, ama unil un pu bi mákée kaa sòoǹ.

¹⁴Dinibul din baa kpòotī tiŋanee lítí ní, din cáá bisaŋkiliibi kupaauee di ŋmátí.

¹⁵A yaa fáá ubɔ ŋaan ki pōoǹ kí pà a-juti pɔndee, án píl̀-si ní, ama a yaa yíì kaa dū a-ba ki kɔ́ǹ an bɔtinee, a làá ŋùŋfì.

¹⁶Unimpu un cáá kunyaaŋŋuee, bi pàkà-u ní, ama uninja un cáá difaŋgiilee kāntí tigaajati.

¹⁷Unil un ŋáań binib tinitee ŋáań ki tìì u-ba ní, ama unil un cáá ntoomee kɔ̄ntí u-ba ní digìńdi.

¹⁸Unikpiti tundi kaa cáá tipaal, ama tipaal dɔ̄ ki cí un tūǹ deedee tundee.

¹⁹Deedee saŋŋu cáǹ unil dimaŋfalin, ama unil un yaa nóó ikpiti saŋŋuee cá ŋkúmin ní.

²⁰Ti-Dindaan ná milimilidambi, ama bibulcinnib bɔti fáatiǹ-u ní.

²¹Kí sɔ̄ kí lā, unikpiti kaa làá lóó ditafadaaldi, ama tiba kaa làá gbēē deedeedambi maaliŋun yab.

²²Unimpunyaan un kaa nyí tibee sá kii ugbeeti un túuń sindaariya bɔmbil u-maŋfalee ní.

²³Tin deedeedambi nyàab̀ee di sá tiŋan, ama tin binikpitib pée ŋūǹ kí nīn kā ki cée di sá ti-Dindaan ŋuul.

²⁴Unil un ŋal tàntēe mɔ̀tīi kpántí ugaaja ní, ama un kpáafí tigaajati tikpilee kpántí usoodaan ní.

²⁵Án làá dāá bútí unil un di cáá tinitee, ní bí dāá pɔ̄ un pūǹ bin kíǹee bi nyùee ú nyɔ̀.

²⁶Binib tòó bin kpáafí bi-kpaajinti kí dāá nyāfì boonee mbusu, ama ní ki mèé ki bìintí bin nyáfí-tì malaa malaayee pu.

²⁷Binib pàkà unil un nyàab̀ kí nīn ŋáań tin ŋān̄ee ní, ama un nyàab̀ kí ŋá tikpitilee, tikpitil ní udaan làá ká.

²⁸Unil un máká u-gaajati puee làá lítí, ama án làá bútí deedeedambi kii busubu bun túkú tifaapɔnee ní.

²⁹Unil un cāabìń fikil fikil u-dicaŋkunee dāa yáatí nì iŋaŋkulim ní. Ugbaan làá dāá kpántí uciŋfiti yumbuu.

³⁰Atuun ŋin deedeedaan tūǹee sá kii busubu bun tìì dimaŋfalee ní. Uciŋfiti fìil̄ binib.

³¹Deedeedaan fòol̄ u-paati kitiŋ pu doo ní, míǹ mbaantiim ní unikpiti nì ukpitiŋal mun fòol̄ bi-paati kitiŋ pu doo.