Read Ntcham Proverbes 12 Bible Online

Proverbes 12 - Ntcham bible

Proverbes 12

¹Unil un néeń ikpootee néeń dinyil ní. Ama unil un kaa là bí wòoǹ-uee sá ugbaan ní.

²Unimɔnti bɔti fáatiǹ ti-Dindaan ní, ama u kù ilandɔkɔkpiti daan bɔti.

³Unikpiti kaa bá ki pɔ̄ɔ̄, ama deedeedaan úǹ yú atajal ali ní.

⁴Unimpu tiŋman pu yɔu tìì u-cal tinyool ní, ama unimpu un kɔ̄ntí u-cal icooyee sá-u iween in ŋmóò ki bùkù akpabee ní.

⁵Deedeedambi pée dàkafī kí ŋá tin bí deedeeyee, ama ní binikpitib dàkafī kí mùul̀.

⁶Binikpitib nyɔɔbuŋŋi sá titalindi tin kùee ní, ama deedeedambi nyɔɔbuŋŋi cāabìń difiil.

⁷Binikpitib yaa lítèe, bi-yindi kúntì dee, ama deedeedambi dicaŋku kpá kí kúntí jaanjaan.

⁸Unil un cáá dinyilee, bi pàkà-u ní, ama bi kpèé un kaa nyí tibee fám.

⁹An sɔ́ á nīn cáá utɔntɔnli ubɔ ja bí kpèè-si fám ki jítiǹ á nīn néeń a-ba timɔn kaa cáá kí jī.

¹⁰Deedeedaan nyí kun lóò u-waŋkutee, ama unikpiti úǹ poon tū ní.

¹¹Unil un kù u-saakuee jīǹ ki díkì ní, ama unil un jòó ki pá tin kaa bí tibanee boonee sá ugbaan ní.

¹²Unikpiti cáá bikpitiŋaliibi wanti pu nnimbitaataam, see deedeedambi pɔ́ɔǹdi baba di kèetī.

¹³Unikpiti bɔkpitii sá-u kutaliŋŋu ní, ama deedeedaan úǹ nyēē tibɔtin ní.

¹⁴Unil nyɔɔbuŋŋi ŋūǹ kí yàntī ú ká tiwammɔntiil kii unil tundi nín yàntī ú fōō tipaal puee ní.

¹⁵Ugbaan dàkafī yii tin u ŋáańee di pée ŋān̄, ama un fòol̄ isaŋkee di sá uciŋfiti.

¹⁶Ugbaan di yàntī bí béé dicilpu yii u gíí diŋuul, ama unil un nyí nì u-bee, báà bi yaa sīī-u waa gífí diŋuul.

¹⁷Unil un sòoǹ ibaamɔnee nyāntí deedee mpaampiin pu, ama un lèekī inyimɔn seerabee nyāntí diyìntil ní mpaampiin pu.

¹⁸Unil un sòoǹ kaa dàkafēe tìì tiweendi kii kitàataajikee ní, ama biciŋfitiibi bíǹ nyɔɔbuŋŋi cāabìń dicáaǹdi ní.

¹⁹Ibaamɔn bɔti bí kí nīn cá jaanjaan, ama tinyimɔmbɔti kaa pée súŋkí ní kí wāŋkì.

²⁰Inyimɔn bí bin dàkafī kí ŋá ikpitee pɔbiliŋin, ama ní dipɔɔpindi bí bin nyàab̀ ŋgbansɔŋfee yaŋin.

²¹Digìńdi báà diba kaa bàń deedeedaan, ama ní binikpitib bíǹ pée kāntí agìŋ́kpaan.

²²Ti-Dindaan ná binyimɔndambi, ama ní ki néeń ibaamɔndambi.

²³Unil un cáá iciinee bāal̀ tin u nyée ní, ama ugbaan úǹ bāakì u-gbaandi ki tùkù báà ŋma ní.

²⁴Unil un cáá difaŋgiilee làá dāá nīn cáá mpɔn bin kíǹee pu, ama unil un yaa cáá diwutijoolee làá dāá kpántí uyumbu.

²⁵Digìńdi yaa bàn̄ unilee, an nyìitī-u kí múĺ ní, ama dinyɔɔbummɔɔl di ŋūǹ kí sɔ̀ŋkì u-pɔbil.

²⁶Deedeedaan dàkà u-juti nsammɔnti ní, ama binikpitib saŋŋu cáǹ bíǹ bi-ba diyìntilin ní.

²⁷Ukpan un sá uwutijoodaanee kaa kāntí upeel kí púĺ, ama unil un cáá difaŋgiilee cáá tigaajati.

²⁸Deedee saŋŋun ní dimaŋfal bí, nsan gbanti ŋúǹ kaa cáǹ unil ŋkúmin.