Read Ntcham Proverbes 13 Bible Online

Proverbes 13 - Ntcham bible

Proverbes 13

¹Kibiki kin cáá iciinee fòol̄ ki-baa dàkal, ama kin bèel̄ binibee kaa kíikí bí lìǹ-kì.

²Tin nyēē unil nyɔkɔnee pu ní u kāntí njimmɔntiim, ama tipɔmbɔti ní biibiidambi jīǹ ki bí.

³Unil un ŋūǹ ki ŋúb̀ u-nyɔkɔee wúń u-maŋfal pu ní, ama unil un sòoǹ pùsi pusi kaa dàkafēe nàantí u-ba ní.

⁴Uwutijoodaan kpèé ní làm kaa kāntí, ama ufaŋgiidaan úǹ kāntí tin kamaa u yaa lèe ní.

⁵Deedeedaan ná inyimɔn, unikpiti kɔ̄ntí binib icoo ní ki bíiĺ-bi.

⁶Tibulcin wúǹ ubulcindaan pu, ama ikpiti nàantí unikpiti.

⁷Binib biba yíì bi-ba bigaajab ní kaa cáá báà tiba, ní biba yíì bi-ba bisoodambi ama ní ki cáá tigaajakpaandi.

⁸Ugaaja gaajati di fìil̄-u, ama ubɔ kaa wɔ́b̀ usoodaan.

⁹Deedeedambi sá kii ŋwalifi ŋun wāĺ bɔ́iiyee ní, ama binikpitib bíǹ bí kii fitila un bíi kúùyee ní.

¹⁰Dilambil di yàntī unil tákà tibɔti, ama unil un fòol̄ isaŋkee di sá uciŋfiti.

¹¹Tigaajati tin unil ká malaayee kaa yúntí, ama tigaajati tin unil ŋá soooo soooo ki kée kaa kúntí.

¹²Unil yaa máká tiba pu ní kaa ká-tì malaayee, u-wunti yɔ̀tī ní, ama unil yaa ká tin fáatì u-pɔbilee, an bí kii busubu bun tìì dimaŋfalee ní.

¹³Unil un kpèé ki sìŋkīǹ isaŋkee làá kɔ́ agìń poon, ama un tɔ́ marabee làá ká ipaati.

¹⁴Uciŋfiti dàkatam sá dimaŋfal nyimbuliŋu ní. Ŋúǹ di yàntī unil ń gɔ́ntí ŋkúm talinti.

¹⁵Un cáá dinyil tikpilee bɔti fáatiǹ binib ní. Ama biibiidambi saŋŋu cáǹ dinàandin ní.

¹⁶Un nyí nì u-bee dàkafī ní kí nín ŋá tiba, ama ugbaan úǹ cáá u-gbaandi ki dàkà báà ŋma ní.

¹⁷Ntuun ŋun kaa ŋān̄ee cāabìń mbusu ní, ama ntuun ŋun sá mmɔntee cāabìń diŋaŋkil ní.

¹⁸Disool nì icoo dɔ̄ ki cí un kaa là bí dàkà-uee, ama un kíikí bí wòoǹ-uee làá fōō kupampakau.

¹⁹An sá mmɔn ní unil ń ká kun fáatiǹ-uee, an pu ní ugbaan kaa là kí fá atuŋkpiti.

²⁰Unil un nōotí biciŋfitiibee kpántí uciŋfiti ní, ama un nōotí bigbaambee kɔ̄ntí u-ba agìńni.

²¹Nnaabu kā bikpitiŋaliibi pu kàti kati, ama nnaam di sá deedeedambi bíǹ paati.

²²Unimɔnti naantiibi jīǹ u-gaajawanti difakal ní, ama unikpiti úǹ gaajatee, deedeedaan di jīǹ-tì.

²³Bisoodambi kpaaŋŋi lòoǹ tikpil, ama bin kaa bí deedeeyee kpaaŋŋi yɔ́l̀ ní.

²⁴Unil un kaa gbáà u-bikee ná-kì dee. Unil un néeń u-bikee dátí ki-tafal ní.

²⁵Deedeedaan cáá kí jī kí díkí, ama ní binikpitib pooŋi náká.