Read Ntcham Proverbes 14 Bible Online

Proverbes 14 - Ntcham bible

Proverbes 14

¹Unimpuciŋfiti máń u-diiku, ama unimpugbaan dù úǹ u-ba ŋalii ní kí gbá kí wīī-ku.

²Unil un còom̄ deedee saŋkindee fàŋkí ti-Dindaan ní. Ama un dī isan in gɔ́ĺee kpèé-u fám dee.

³Ugbaan nyɔɔbuŋŋi poon ní a kāntí u-badakal, ama biciŋfitiibi nyɔɔbuŋŋi di wúǹ bi-pu.

⁴Unil un kaa cáá inaa í kpɔ̀-u tikpaalee, u-cakalaau yú ukulim ní, ama un cáá inaa pɔ̄ɔ̄yee cáá tijin tikpil ní.

⁵Deedee seeradaaŋwu kaa mɔ́ntí, ama inyimɔn seeradaaŋwu mɔ́ntí ŋma ní.

⁶Unil un dàkà u-bee nyàab̀ iciin ní kaa kāntí-i, ama an kaa pɔ̄ɔ̄ ulandɔkɔdaan úǹ ń ká dinyil.

⁷Kàkatī a-ba kí wàatī ugbaan, di sá yii aa làá pée ká dinyil diba u-nyɔɔbuŋŋi poon.

⁸Un nyí nì u-bee ciiŋyi di sá ú kpèè u-saŋkindi tiŋan, ama bigbaambi gbaandi di sá bí mɔ̄ntì bin kíǹee.

⁹Bigbaambi kaa fātìi tɔ́ yii bí ŋāŋkì bi-yìntitam. Ama deedeedambi kansikin ní a kāntí Unimbɔti saasɔl.

¹⁰Unil un bí kunimbaaunee baba di nyí u-nimbaaku. U yaa tí bí mmɔnee, u nì ubɔ kaa tí ŋūǹ kí yàkatī u-mɔŋŋu.

¹¹Binikpitib diiku làá dāá lítí kí nàan̄, ama ní deedeedambi tantiu ń nīn yú ki pɔ̄ɔ̄.

¹²Unil ŋūǹ kí dàkafì yii nsan ŋun u nóóyee ŋān̄, ama án dāá kúntée, ŋu cáǹ-u ŋkúmin ní.

¹³Unil ŋūǹ kí nīn lāā ama ní u-pɔbil poonee, u bí kunimbaaun, ní dipɔɔpindi ń dāá kúntí nì kunimbaau.

¹⁴Unil un pɔbil gáatèe làá dāá fōō digáatil paati, ní deedeedaan mun ń dāá fōō u-deedeeu paati.

¹⁵Kinaatuui di fòol̄ tin kɔkɔ bi tùkù-uee, ama unil un nyí nì u-bee kpèé u-saŋkindi tiŋan ní.

¹⁶Uciŋfiti fàŋkí tikpitil ní ki gɔ́ntí-tì, ama ugbaan úǹ ŋáań tikɔkɔ malaa malaa, kun puee u máká u-ba pu.

¹⁷Unil un gífí diŋuul malaayee ŋáań tigbaambɔti, ní biibiidaan dátí kináŋ ki tòó u-ba pu.

¹⁸Nnaatuumu fakal di sá digbaandi, ama binib bin nyí nì bi-bee nyooti di sá dinyil.

¹⁹Binikpitib làá gbàan̄ binimɔntiibi nimbiin, ní bikpitiŋaliibi ń dāá yūĺ deedeedambi punyɔkɔpu ki nyàab̀ dijòońdi.

²⁰Usoodaan kɔŋkɔnnaatɔb gba ná-u ní, ama bin néeń ugaajee wīikí tikpil ní.

²¹Unil un kpèé u-juti fámee ŋá ikpiti, ama un sūǹ binandambi saayee bí mmɔnni.

²²Binib bin dàkafī ilandɔkɔkpitee wáŋkì dee, ama bin dàkafī nlandɔkɔmɔntee làá ká tiŋan nì ibaamɔn bi-saŋŋu pu.

²³Unil ń tɔ̄ ditundi nì difaŋgiilee cáá tipaal ní, ama kubɔcaau cāabìń disool ní.

²⁴Biciŋfitiibi paatii di sá tigaajati, ama ní bigbaambi bíǹ gbíntíǹ bi-gbaandi.

²⁵Useeradaan un sòoǹ ibaamɔnee fìil̄ binib ní, ama un mɔ́ntí inyimɔnee nàantí binib ní.

²⁶Unil un fàŋkí ti-Dindaanee cáá dimákakpaandi, kun puee u sá kibalilaŋ ki tīī u-biyaamu.

²⁷Unil ń fàŋkì ti-Dindaanee di sá dimaŋfal nyimbuliŋu. An di yàntī ú gɔ́ntí ŋkúm talinti.

²⁸Dinibul din wīikée bɔtiu cáá tinyool ní, ama kitiŋ kin nib yaa bíi bàtēe bɔtiu beel bíi kúntí dee.

²⁹Unil un kaa gífí diŋuul malaayee cáá dinyil tikpil, ama un kaa pɔ̄ɔ̄ diŋuul digiilee dàkà u-gbaandi ní.

³⁰Dipɔɔsɔŋkil di yì ŋgbampɔn, ama ní ipoompoon sá iween in ŋmóò ki bùkù akpabee.

³¹Unil un wɔ́b̀ binandambee sìí bi-náanliu ní, ama un sūǹ usoodaan saayee tìì Unimbɔti ní tinyool.

³²Unikpiti tuŋkpitiŋ di yàntī ú lítí, ama deedeedaan cáá dimákal ki kpáaǹ u-kúmin.

³³Iciin bí unil un cáá dinyilee pɔbilin ní, ama ŋma di ŋūǹ kí ká iciin bigbaambi kansikin?

³⁴Ditimbundi din nóó deedee saŋŋuee yíkí yilpu ní, ama ní ikpiti íǹ kɔ̄ntí-dì icoo.

³⁵Ubɔti pàkà u-tɔntɔnliu un cáá dinyilee ní, ama u gífí diŋuul un kɔ̄ntí-u icooyee pu.