Read Ntcham Proverbes 15 Bible Online

Proverbes 15 - Ntcham bible

Proverbes 15

¹Unil yaa kíí u-juti dinyɔɔbummɔɔndee, án sɔ̀ŋkī u-ŋuul ní, ama u yaa kíí mpɔn nì mpɔnee, án gbítí u-ŋuul ní.

²Biciŋfitiibi yaa bíi sòon̄ee, an nyàatī unil ń bīfì ní, ama bigbaambi bíǹ yaa wāaǹ bi-nyɔkɔee, tigbaambɔti ŋma di nyēē.

³Ti-Dindaan nimbiliŋ làaǹ an kɔkɔ, ki kpèé binikpitib nì binimɔntiibi kɔkɔ.

⁴Dinyɔɔbundi din sɔ̀ŋkī dipɔbilee sá kii busubu bun tìì dimaŋfalee ní, dinyɔɔbuŋkpil yaa ŋmàl̄ tibɔtinee, an yòontí unil pɔbil ní.

⁵Ugbaan kaa fātìi tɔ́ u-baa dàkatam, ama un là bí kpòotī-uee sá uciŋfiti ní.

⁶Tigaajati tikpaandi di bí deedeedaan dumpu, ama ní unikpiti gaajawanti cāabìń-u nnaabu.

⁷Biciŋfitiibi nyɔɔbuŋŋi tìì binib dinyil, ama an kaa sá míǹ bigbaambi cee.

⁸Ti-Dindaan ná binikpitib saraabi, ama deedeedambi bíǹ wimmeem tìì-u mmɔn.

⁹Ti-Dindaan ná binikpitib bimbim, ama ní ki néeń unil un nóó deedee saŋŋuee.

¹⁰Un yaa fá nsammɔntee làá ká ditafadaaldi, unil un kaa là bí wòoǹ-uee làá kpú.

¹¹Ti-Dindaan nyí tin bí ki jītí ditaŋkpiil poon poon kábuee, ŋma nín yíiń tin ní unil dàkafī u-pɔbilinee.

¹²Ulambidaan kaa là bí kpòotī-u, an pu ní waa cá biciŋfitiibi cee.

¹³Dipɔɔpindi bútí nnimbiin ní, ama dipɔɔbiildi cāabìń diwuŋyɔtil ní.

¹⁴Unil un cáá iciinee nyàab̀ dinyil ní, ama bigbaambi nyɔmmunee, tigbaambɔti di gbí.

¹⁵Unandaan ceeyee, iwiin kɔkɔ pée pɔ̄ɔ̄ ki tīī-u ní, ama un pɔbil sɔ̀m̀ee ceeyee, ŋwiin kamaa sá-u jiŋaal ní.

¹⁶An sɔ́ unil ń nīn cáá tigaajawan fiii kí nīn fàŋkí ti-Dindaan, ki jítiǹ ú nīn cáá tigaajati tikpil ki bí iyaliŋki poon.

¹⁷An sɔ́ unil ń ŋmɔ́ tikaŋkaŋfaal tin bi tɔ́kɔǹ nì dineendee ki jítiǹ unaa un bí màlmalee nanti tin bi dū kináŋ ki ŋāāyee.

¹⁸Unil un kaa pɔ̄ɔ̄ diŋuul digiilee sàal̄ kujaau ní, ama un kaa gífí diŋuul malaayee pèefī kujaau ní.

¹⁹Uwutijoodaan saŋŋu sá kii ikuŋkumee ní, ama deedeedaan saŋŋu ŋúǹ pée tèen̄ ní.

²⁰Kibiki kin cáá iciinee yàntī ki-baa pɔbil pīiǹ ní, ama ugbaanee, úǹ kpèé u-na fám ní.

²¹Unil un kaa cáá iciinee fàal̀ u-gbaandi pu ní, ama unil un cáá dinyilee nóó deedee saŋŋu ní.

²²Unil yaa kaa bàlifī isaŋkee, tin u bɔ́ntée kaa còom̄, ama bisaŋkiliibi yaa wīikée an còom̄ ní.

²³Unil yaa kíí tibɔti tì nín sá puee, an tìì mmɔn ní, dinyɔɔbundi yaa nyáń ŋyunti ŋun di máaǹ kí nyēe, di cáá mpɔn ní.

²⁴Unil un nyée nóó nsan ŋun jɔ́ḿ ki cá dimaŋfal laŋkee ní. Waa nōotí ŋun sìntī ditaŋkpiilin taapuee.

²⁵Ti-Dindaan nàantí bilambidambi diiŋŋi, ama u mɔ́tí ukpiipu tampaaŋŋu pu.

²⁶Ti-Dindaan ná ilandɔkɔkpiti, ama u fáatì anyɔɔbummɔnti.

²⁷Unil un néeń animbil tikpilee kɔ̄ntí u-dicaŋku agìńni ní. Ama un ná dinyɔɔŋeebil jimee cáá mmaŋfafɔkɔn ní.

²⁸Deedeedaan dàkafī kí wàatī ní kí nín kíí tibɔti, ama binikpitib bíǹ wùliŋkī tibɔfan ní.

²⁹Ti-Dindaan dátiǹ binikpitib, ama u pílifí deedeedambi wimmeem.

³⁰Nnimbiin ŋun bútèe tìì mmɔn, ní tibɔmɔntiil tìì mpɔn.

³¹Unil un pílifí isaŋki in tìì dimaŋfalee cáá u-kɔŋkooŋŋu biciŋfitiibi kansikin.

³²Unil un kaa là bí kpòotī-uee ná u-ba ní, ama un fòol̄ iwoonee béetí iciin.

³³Á fàŋkì ti-Dindaanee, an bífí iciin ní. Kí wàatī á ká tinyoolee, see á sìntīǹ a-ba.