Read Ntcham Proverbes 16 Bible Online

Proverbes 16 - Ntcham bible

Proverbes 16

¹Unil màkà, ama ti-Dindaan di lèekī min u làá ŋée.

²Unil dàkafī yii tin u pée ŋáańee kɔkɔ ŋān̄ ní, ama ti-Dindaan di kpèé ki wāĺ unil pɔbilin.

³Tin kɔkɔ a là kí ŋée, dūú ŋá ti-Dindaan ŋaan, ní kí ŋmā kí ŋá tin a bɔ́ntèe.

⁴Ti-Dindaan nyí kun pu ní u náań tiwan kɔkɔee. U náań unikpiti mun ki cíitì ŋwiin ŋun u làá dáaĺ u-tafalee ní.

⁵Ti-Dindaan ná bilambidambi, báà án ŋá pu, u làá dáaĺ bi-tafal.

⁶Dineeŋkpaandi nì ibaamɔn pu ní unil kāntí ikpiti pɔ̄tam. Unil un fàŋkí ti-Dindaanee sáń ikpiti ní.

⁷Unil bimbim yaa fáatiǹ ti-Dindaanee, u yàntī u nì u-nannanliibi gba ń mɔ̄ɔkì ní.

⁸Unil ń dī tibulcin pu kí ká tigaajawan fiiiyee sɔ́ǹ ú dī isaŋkpiti pu kí ká tigaajati tikpil.

⁹Unil pɔbil poon ní u bɔ́ntí nsan ŋun u làá còom̀ee, ama ti-Dindaan di lèekī ŋun u làá nóóyee.

¹⁰Unimbɔti bɔti di kā ubɔti nyɔkɔn ní u sòoǹ, an kaa cáá yii u sòon̄ ki yīntì ibɔsoon poon.

¹¹Ti-Dindaan cee ní saniyab bin bí deedeeyee nyēē, ataŋkpaŋmantikaa ŋin kā tilɔtinee kɔkɔ nyiŋfiŋu sá u-tundi ní.

¹²Bibɔtiibi ná binib bin ŋáań ikpitee, di sá yii deedee di tìì dibeel mpɔn.

¹³Bin sòoǹ ibaamɔnee bɔti di fáatì bibɔtiibi, bi néeń binib bin sòoǹ tibɔti deedeeyee ní.

¹⁴Ubɔti ŋuul sá ŋkpituun ní, ama uciŋfiti ŋūǹ kí sɔ̀ŋkì-dì

¹⁵Ubɔti nimbiin yaa ŋān̄ee, an sá dimaŋfal ní, u-ŋanti bí kii ukpaasiitaayee ní.

¹⁶Unil ń nīn cáá iciin sɔ́ǹ ú nīn cáá sindaariya. Unil ń nīn cáá dinyil sɔ́ǹ ú nīn cáá animbil kúti.

¹⁷Deedeedambi còom̄ nsan ŋun tèen̄ee poon ní ki gɔ́ntí tikpitil. Unil un nyí u nín còom̄ puee fìil̄ u-maŋfal ní.

¹⁸Dilambil cáǹ unil dinàandin, ní dibadakal cáǹ unil dilitilin.

¹⁹Unil ń sìntīǹ u-ba taapu kí nīn bí biwɔfib kansikinee sɔ́ǹ u nì bilambidambi ń nīn yàkatī tigaajawan.

²⁰Unil un yaa pílifí ti-Dindaan bɔtee, án làá bútí-u, un yaa máká ti-Dindaan puee bí mmɔnni.

²¹Unil un sòoǹ tibɔti nì iciinee ní bi yíì unyil. Dinyɔɔbummɔɔndi din u sòoǹee di kútí dinyil.

²²Iciin sá kii nnyimbul ŋun tìì dimaŋfalee ní ki tīī un cáá-iee. Bigbaambi bi-ba gbaandi di dátí bi-tafal.

²³Unil un cáá iciinee dàkafī ní kí nín sòoǹ, ní u-nyil mɔ̀tīi kútí tin u sòoǹee pu mpɔn.

²⁴Dinyɔɔbummɔɔndi sá kii tisiilee ní, tì mɔ̄ kinyɔkɔn ní ki tìì ŋgbampɔn.

²⁵Unil ŋūǹ kí dàkafì yii nsan ŋun u nóóyee ŋān̄, ama án dāá kúntée, ŋu cáǹ-u ŋkúmin ní.

²⁶Ŋkùm di yàntī utɔntɔnli ń tɔ̄ ditundi, di sá yii u-pool di páb̀-u ú tɔ̄ ditundi.

²⁷Unil un kaa bí tibanee dàkafī kí ŋá tikpitil ní, tibɔti tin nyēē u-nyɔkɔnee sèetī kii ŋŋmee ní.

²⁸Biibiidaan jāantí binib, ní ubɔmbɔtukul yàkatī bibɔɔtiibi.

²⁹Unil un ŋáań tipɔmbɔtee ŋmàtíǹ u-juti ní ki cáǹ-u nsaŋkpitin.

³⁰Unil yaa dū u-nimbiliŋ ki ŋúb́ ki dākafì kí tɔ̄ atuŋkpiti, ní ki ŋmáaḿ u-nyunculiŋee, u pée ŋá tikpitil ki dóò dee.

³¹Tiyikpipin sá tinyool beefuuliiki ní, bin nóó deedee saŋŋuee di kāntí-kì.

³²Unil un kaa gífí diŋuul malaayee jítiǹ ubaatandaan. Unil un ŋúb́ u-bee jítiǹ un di ŋūǹ kí já kí fōō kitimmɔŋee.

³³Bi ŋūǹ kí tɔ̄ kasi tiba pu, ama ti-Dindaan di lèekī tin u là án ŋée.