Read Ntcham Proverbes 17 Bible Online

Proverbes 17 - Ntcham bible

Proverbes 17

¹Laakin ní a làá ká kinɔkatii kikuliŋŋi kí pɔ̀kɔ̄ ní ŋgbansɔŋfi bée sɔ́ǹ dicindi din poon busamɔntiibu bun pu tinan pée gbí, ama ní kujaau bée.

²Uyumbu un wálifèe làá dāá fōō u-dindaan jipɔɔn un kɔ̄ntí-u icooyee paaŋŋu, ní u nì u-dindaan jipɔmbi ń dāá yàkatī difakal din u yóoǹ-bee.

³Ŋŋmi ní bi cáa cɔ́ŋkí kí béé animbil kúti timɔntiil nì sindaariyamɔnti, ama ti-Dindaan di cɔ́ŋkí unil pɔbil kí béé di nín sá diŋyee.

⁴Unikpiti pílifíǹ binib bin sòoǹ anyɔɔbuŋkpitee, ní unyimɔndaan pílifíǹ bin sòoǹ ki bíiĺ bi-jutiibee.

⁵Unil un bèel̄ usoodaanee sìí u-náanliu ní. Un juti yaa bí dinimbinaamandin an mɔ̄ǹ-uee kaa làá lóó ditafadaaldi.

⁶Bitikpilib naantiibi di yì bi-nyooti, ama ní bibaatiibi yì bi-jipɔmbi yati.

⁷Tibɔmɔntiil kaa máaǹ ugbaan, míǹ ní inyimɔn kaa máaǹ unil un bi tìì disíndee.

⁸Bin cáá tiwan kí pɔ̄ee ceeyee, tiwampɔkaal sá kii diyimɔɔl sabilee ní. Laakin pú ní u yaa fātèe, an bútí-u ní.

⁹Unil un súntí u-juti nín yìntīǹ-u puee kāntí bibɔɔtiibi, ama un pée téetí ki sòoǹ múlmulee yàkatī bibɔɔtiibi ní.

¹⁰Á wòoǹ unyil dibaba ja làá tɔ̄ u-ni ditundi ki jítiǹ á gbá ugbaan anaalab dilaataal.

¹¹Unikpiti pée nyàab̀ kí nīn ŋáań tikpitil ŋma ní, ní un kaa ŋān̄ee bí ní ki gbì bin kíǹee taapu, ama bi làá dāá dū ntuun ŋun cáá ntoomee kí tɔ̄ u-pu.

¹²Á tū digbiŋgbil din biyaamu bi cúúyee nsanni sɔ́ǹ ugbaan un bí ki tūǹ agbaantuunee.

¹³Unil yaa dū tikpitil ki pàn̄ tiŋan tin bi ŋá-uee, u-dicaŋkun tikpitil làá nīn pée bí ní ki cá talku.

¹⁴Á kíĺ kunikpɔŋkpɔkɔu sá kii á pìitī nnyimbilkaam kí pɔ̄-mì nsan mí pùub̀ee ní. Dūú gbèen̄ kí taa yàntī án kpántí kujaau.

¹⁵Unil un pɔ̀ dibɔkpil daanee nì unil un kù ibaamɔndaan bɔtee, ti-Dindaan ná binib gbanti liitil.

¹⁶Animbil yaa bí ugbaan ŋaanee, u làá dūú ŋá nì ba? Ú cáá dā iciinaaa? Míǹ kaa bí u-yilin.

¹⁷Ubɔɔti dàkà u-neendi ŋyunti kamaa ní, ama kinabiki kíǹ bí kí tíkiń dinimbinaamandin ní.

¹⁸Unil un kaa cáá iciinee di fátí ubɔ ŋaan kí pòon̄ kí pà u-juti pɔndi.

¹⁹Un néeń kujaauee néeń ikpiti ní, un yòontí u-ba yilpuee dāa lítí.

²⁰An kaa bútí milimilidaan, ní nnaabu làá jēetí un kaa sòoǹ ibaamɔnee pu.

²¹Un màl̄ ugbaanee pée bí kunimbaaun ŋma ní. Un kaa nyí tibee baa kaa ŋūǹ kí nīn bí mmɔnni.

²²Dipɔɔpindi cāantí iween ní, ama kunimbaau bàtī unil pɔŋŋu ní.

²³Unikpiti fòol̄ tiwampɔkaal dibalin, kí taa sòoǹ tibɔti ti-pú.

²⁴Unyil nimbikpeeŋu pée cɔ́ iciin pu ní, ama ugbaan úǹ nimbikpeeŋu cɔ́ ndandati ní kaa wāĺ tiba.

²⁵Ugbaan tìì u-baa kunimbaau, ní ki tìì u-na un màl̄-uee nnyɔɔtun.

²⁶An kaa ŋān̄ bí dáaĺ maanyiiba tafal báà fiii pu, an kaa tí ŋān̄ yii bí gbá jilmadaan u-baamɔŋyi pu.

²⁷Unil un kaa sòoǹ tikpilee di cáá iciin, ní un dàkafī kí nín sòoǹee di cáá dinyil.

²⁸Ugbaan gba yaa kā ki ŋmí, a làá dū-u kí yíiń uciŋfiti ní. U yaa kā ki táb́ u-nyɔkɔ, a làá lì yii unyil ní.