Read Ntcham Proverbes 18 Bible Online

Proverbes 18 - Ntcham bible

Proverbes 18

¹Unil un dàkafī u-baba puee kaa kàal̀ bin kíǹee cee, bi yaa là kí tūtuǹ-uee, ní ú gíí diŋuul.

²Tin mɔ̄ǹ ugbaanee kaa sá yii ú gbìl̄ tibɔti taapu, ama ú lēē u-landɔkɔi kí bíĺ mpaampiin pu.

³Atuŋkpiti di cāabìń kpeefam, ní icoo yàntī unil ń fá u-nyooti.

⁴Unil nyɔɔbuŋŋi sá kii nnyim min nyóòyee, mbun ŋun gbée nì nnyimbul ŋun nyim sá kii iciin ki pùub̀ee ní.

⁵An kaa ŋān̄ bí dī dibɔkpil daan boon kí sòoǹ kí kpɔ̀ deedeedaan un cáá ibaamɔnee bɔti.

⁶Ugbaan nyɔɔbuŋŋi cāabìń kunikpɔŋkpɔkɔu, ní tibɔti tin nyēē u-nyɔkɔnee dāa kúntí nì kujaau.

⁷Ugbaan nyɔkɔ di nàantí-u, u-nyɔɔbuŋŋi sàtī-u kii kutaliŋŋuee ní.

⁸Ubɔmbɔtukul nyɔɔbuŋŋi sá tijin tin mɔ̄ee ní, tì kóò unil poon ní fíŋfiŋ.

⁹Unil un ŋáań diwutijool u-tundinee nì unil un bíiĺ ditundee sá kuyuu nì ku-bukul ní.

¹⁰Ti-Dindaan yindi di wúń m-pu, deedeedaan yaa sáǹ kí kɔ́-uee, u bí ŋgbansɔŋfin ní.

¹¹Ugaaja gaajati sá-u kii kitiŋ kin bi máń digundi ki túee ní. U-landɔkɔŋu poonee, tì sá digundi din fɔ̀kɔ̀ yilpu yilpu baa ŋūǹ kí dàb̄ee ní.

¹²Kí wàatī án nàan̄ unilee, u yòontí u-ba yilpu ní. Ama kí wàatī unil ń ká tinyoolee, see ú sìntī u-ba taapu.

¹³Unil un kíikí tibɔti kí wàatī kí nín gbìl̄-tèe dàkà u-gbaandi ní ki kɔ̄ntí u-ba icoo.

¹⁴Unil mákal di tīkintí-u u-weeŋyi poon, ama u yaa kaa ti cáá dimákalee, ŋma di gíti ŋūǹ kí tūtuǹ-u?

¹⁵Unil un cáá dinyilee kāntí dinyil ní, ní un cáá iciinee nyàab̀ iciin ki kútí.

¹⁶Tiwampɔkaal pìitī unil nsan ú ŋmā kí cù binikpaambi cee.

¹⁷Unil un péé ki sòon̄ tibɔtee yati di bí kii tì ŋān̄ee. Ama u nì un cáá tɔbee yaa sòon̄ u-yatee ní bí ká yii an nyáń ti-ba.

¹⁸Bi tòó kasi ní kí kúntí kujaau, ní kí pàtī bipɔɔbi.

¹⁹An pɔ̄ɔ̄ unil ń sòoǹ nì kinabiki kin u yīntèe ki jítiǹ ú já kí fōō kitiŋ kin bi máń digundi ki túee. Kujaau táb̀ unil nyɔkɔ kii kudii kun pɔ̄ɔ̄yee punuubee ní.

²⁰Unil nyɔɔbuŋŋi di yì-tì ní ú ká kí jī. Tibɔti tin u sòoǹee di yàntī ní ú díkí.

²¹Ibɔsoon ŋūǹ kí cáań dimaŋfal àá ŋkúm, unil un néeń ki sòoǹee máaǹ kí kíí kí fōō isoon paati.

²²Unil un ká unimpu ki cááyee ká tiwammɔntiil dee. An sá tiŋaŋkpaandi ní ti-Dindaan ŋá ki tīī-u.

²³Unandaan sòoǹ ki gbàam̄, ama ní ugaaja kíikí nì mpɔn.

²⁴Unil yaa cáá bibɔɔtiibi tikpilee, án ŋūǹ kí bīil̀-u, ama ubɔɔti ubɔ bí ki ŋūǹ kí nīn nákáǹ-si ki jītíǹ kinabiki.