Read Ntcham Proverbes 19 Bible Online

Proverbes 19 - Ntcham bible

Proverbes 19

¹Unil un sá usoodaan ki còom̄ deedee saŋŋunee sɔ́ǹ unil un di sá unyimɔndaan ki sá ugbaanee.

²An kaa ŋān̄ unil ń nīn bí kaa cáá nlandɔkɔ. Unil un di jìkì tikpilee làá lítí ikpitin.

³Unil u-ba gbaandi yaa nāaǹ-uee, ní ú dūú nyìntī ti-Dindaan pu.

⁴Tigaajati yàntī unil bɔɔbi mɔ̀tīi wīintí ní, ama ní unandaan úǹ nì u-bɔɔ ń yàkatīǹ tɔbin.

⁵Unil un lèekī nnyimɔn seerauee kaa làá lóó ditafadaaldi, ní unil un mɔ́ntée kaa làá nyā ditafadaaldin.

⁶Binib tikpil cáá nyɔɔmálmal ki ŋmàtíǹ binikpaambi, ní báà ŋma bɔɔ sá unil un pūǹee.

⁷Usoodaan nabiyaamu kɔkɔ kaa là u-bɔti, míǹ ní u-bɔɔbi mun sáń ki wàatī-u. U yaa bàà là kí sòoǹ nì bee, baa bí.

⁸Unil un yaa cáá iciinee néeń u-ba. Un di yaa pɔ́ɔǹ kí gbìl̄ tibɔti taapuee làá gbìl̄ mmɔn.

⁹Unil un lèekī nnyimɔn seerauee kaa làá lóó ditafadaaldi, ní án làá nàan̄ unil un mɔ́ntée.

¹⁰An kaa kítì yii ugbaan ń nīn bí mmɔnni, míǹ ní uyumbu kaa máaǹ kí nīn cáá bikpootiliibi pu mpɔn.

¹¹Unil un cáá dinyilee kaa gífí diŋuul malaa, tin yì u-nyootee di sá u súntí tin bi yīntiǹ-uee pu.

¹²Ubɔti yaa gíí diŋuulee, an bí kii gbikinti nín sūǹ puee ní. Ama u-ŋanti sá kii dimalindi nín tòó kumoou pu puee ní.

¹³Ugbaan sá dinimbinaamandi ní ki tīī u-baa. Unimpubɔmbɔdaan sá kii nnyim min còol̀ kaa gúǹee ní.

¹⁴Unil ŋūǹ kí jī u-baabi diiku nì animbil difakal, ama ti-Dindaan di tìì uninja unimpu un cáá iciinee.

¹⁵Diwutijool cāabìń ŋgeem, ní ŋkùm cútí un kā ki kpàl̄ iŋalee.

¹⁶Unil un tɔ́ marabee wúń u-maŋfal pu ní. Un kaa kpèé u-bimbim tiŋanee làá kpú ní.

¹⁷Unil un yaa pú unandaan tiwanee pīnnì ti-Dindaan ní, di sá yii ti-Dindaan làá dāá téeǹ-u.

¹⁸Dáaĺ a-biki tafal ŋyunti ŋun dimákal dáá béé, ama á taa nín gíí diŋuul kí tin nyàab̀ kí kpɔ̀-kì ní.

¹⁹Unil un yaa gíí diŋuul ŋkpitim puee máaǹ kí pà dipɔndi. Di sá yii a yaa yāntì-uee, a bíi tìì-u kunyannyaau ú fàtīí kíĺ dee.

²⁰Pīlifì isaŋki, kí kíí bí dàkà-si ní kí kpántí uciŋfiti.

²¹Unil pɔbil poonee, u bɔ́ntí tiwan tikpil tin u làá ŋée, ama ti-Dindaan nín là puee di làá dāá pée ŋá.

²²Tin bi cí kí ká unil ceeyee di sá u-niti. An ŋān̄ unil ń nīn sá usoodaan ki jítiǹ ú nīn sá unyimɔndaan.

²³Unil ń fàŋkì ti-Dindaanee tìì dimaŋfal. Udaan làá nīn bí digbilin ní kaa làá gbìl̄ tibɔkpitil tiba pu.

²⁴Uwutijoodaan dùŋfī u-ŋal kí bɔ̄ disambilin, ama ní kaa ŋūǹ kí gíiǹní-ŋu u-nyɔkɔn.

²⁵A yaa gbáń ulambidaanee, un kaa nyí tibee kíǹ ki nyí nì u-ba ní. A yaa wòon̄ uciŋfitee, u làá bīfì iciin kí kūtì ní.

²⁶Kibiki kin sāaǹ ki-baa ki jìn̄ ki-nee sá kibiki kin bíil̀-bi ki kɔ́ǹ-bi icooyee ní.

²⁷M-biki, a yaa gbēeǹ kaa ti bíi pílifí isaŋkee, a fātì a-boon ki tīī dinyil dee.

²⁸A yaa yíiń maabiiban ń dāá lēē seerayee, waa dù deedee bɔti ki yíiń tiba. Tikpitil ní binikpitib jīǹ ki bí.

²⁹Bi bɔ́ntì ditafadaaldi ki cíitì bilambidambi, ní ki bɔ́ntì bigbaambi boon ki cíitì tigbati.