Read Ntcham Proverbes 2 Bible Online

Proverbes 2 - Ntcham bible

Proverbes 2

¹M-biki, fōō tin ní m dàkà-see, kpāafì m-marab a-ni.

²Kpòon̄ a-tafal kí pīlifì iciin, kpòon̄ a-pɔbil kí gíiǹ dinyil watil pú.

³Mèè dinyil dí tūtuǹ-si, yíiń tibɔti taapu digbilindi dí jòoń-si.

⁴Nyàab̀ an wanti kii animbilee, nyàab̀-tì kii tigaajawan tin bí dibalinee[6].

⁵Niinee a làá gbìl̄ unil ń nīn fàŋkí ti-Dindaanee taapu, ní á ŋmā kí nīn nyí Unimbɔti.

⁶Di sá yii ti-Dindaan di tìì iciin, u-cee ní dinyil nì tibɔti taapu digbilindi nyēeń[7].

⁷Úǹ di tútúǹ deedeedambi, ní ki wúǹ bibulcinnib pu kii digbampɔɔlee.

⁸U tíkí bin nóó deedee saŋŋuee, ki cí bin yú nì u deedeeyee.

⁹A yaa pílifiǹ-mee, a làá béé yii á nīn bí deedee, kí nīn cáá tibulcin ní kí nīn nóó ibaamɔn saŋŋuee di sá nnaam sàmbiki.

¹⁰Niinee ní iciin ń kɔ́ a-pɔbilin, ní dinyil ń yàntī a-naŋki ń nīn bí mmɔnni.

¹¹Nlandɔkɔmɔnti làá nīn wúń a-pu, ní dinyil ń nīn cí-si.

¹²Tiwan gbanti làá tūtuǹ-si á taa ŋá tin kaa ŋān̄ee. Tì làá fīī-si binib bin sòoǹ tinyimɔmbɔtee ŋaan.

¹³Tì làá fīī-si binib bin féeń ibaamɔn saŋŋu ki kíǹ ki nóó dibɔmbɔndi sàmbiyaamuee ŋaan.

¹⁴An mɔ̄ǹ-bi bí nīn ŋáań tin kaa ŋān̄ee, bi tūǹ atuŋkpiti ki fàal̀.

¹⁵Bi-sàmbiyaamu gɔ́ĺ, ní bi-saŋyi kaa tèen̄.

¹⁶Mimmee a làá nyā ubɔ nimpuu ŋaan, uninjamɔnnil un cáá nyɔɔmálmalee.

¹⁷U yāntì u-taafaabɔɔn, ní ki súntì dipoondi din u pōoǹ u-Nimbɔtiu nimbiinee pu[8].

¹⁸U-bimbim cáǹ-u ŋkúmin, ní u-ŋáaǹtam cáǹ-u ditaŋkpiilin.

¹⁹Ubɔ kaa cūtì u-cee ki fātìi gítìń, ki kíntì dimaŋfal saŋŋu.

²⁰An puee fōō binimɔntiibi bimbim, dī deedeedambi tabɔbiliŋ.

²¹Di sá yii deedeedambi di làá nīn kóò kitiŋ pu, bibulcinnib di làá gbíntí ki-pu.

²²Binikpitib bíǹ làá nyā kitiŋ pu, bi làá jà bin kaa bí deedeeyee kí nyāntí kitiŋ pu.