Read Ntcham Proverbes 20 Bible Online

Proverbes 20 - Ntcham bible

Proverbes 20

¹Ndaam yàntī unil ń kpántí ulambidaan, ní ndaam min pɔ̄ɔ̄yee yàntī ú kpántí kufuudaan. Unil un nyù-mì tikpilee kaa cáá iciin.

²Ubɔti yaa gíí diŋuulee, an bí kii gbikinti nín sūǹ puee ní. Unil un yaa gbítì ubɔti ŋuulee nyàab̄ tibɔti ki tɔ́ u-ba pu ní.

³An sá jilma ní ki tīī unil un yíití kunikpɔŋkpɔkɔuee. Ama ugbaan úǹ néeń kujaau ní.

⁴Ukpaayoon yaa kaa kùn̄ tikpaal ti-yuntiŋu, waa dāa kāntí tiba kí cā kudiceeu.

⁵Unil landɔkɔi sá kii lɔkɔ un nyóòyee nyim ní. Unil un cáá dinyilee di ŋūǹ kí dáaĺ-i kí nyāntí.

⁶Binib tikpil lì yii bíǹ di sá bimɔntiibi. Ama ŋma di baasii ŋūǹ kí ká unil un bí deedeeyee?

⁷Deedeedaan còom̄ deedee saŋŋu ní, u-kpátam boonee u-biyaamu làá nīn bí mmɔnni!

⁸Ubɔti yaa kāl̀ kubɔsoondiin kí sòoǹ tibɔtee, dicilpu malaayee, u kpáàa pée wál̀ tin kaa ŋān̄ee.

⁹Ŋma ŋūǹ kí lì yii: <M fíntì m-pɔbil píil̀ káŋkaŋ, m fíntì m-ba ki nyáń m-kpitiin?>

¹⁰Unil ń nīn cáá ataŋkpee ŋin bi cáa ŋmàntī tiwan nyiŋfiŋuee nì tiwaŋŋmantikaal mili mili pu kí nīn cáa mùul̄ee, an sá tiwan tin ti-Dindaan née ní.

¹¹Kibiki tuuŋŋi pu ní unil béetí yii kun kì ŋée ŋān̄ ki bí deedee.

¹²Ti-Dindaan di náań atafal bí nīn cáa pílifí nì animbil bí nīn cáa kpèé.

¹³Taa nín̄ néeń ŋgeem, a làá dāá kpántí usoodaan. Nín̄ wāĺ ní kí ká kí jī kí díkí.

¹⁴Uwandal lì yii: <Tiwan pɔ̄ɔ̄ kudaau>, ama u yaa līkiǹee ní u kíǹ ki pàkà u-ba yii an mɔ̄ kudaau.

¹⁵Sindaariya gbōō, ní abeedimbil dɔ̄ tilèel, ama iciin nyɔɔbuŋŋi di sá tin pée cáá kunyampoouee.

¹⁶Unil yaa yúl̀ unil un waa nyée boon kí pìnnì tibee, á fōō u-bɔkutil kí yóoń. U nín yúl̀ unicaan boonee puee, á fōō u-cee toolima kí yóoń.

¹⁷Tinaayujin dá láá mɔ̄ unil nyɔkɔn ní. Ama boon kinyɔkɔ yaa gbée, an kpántí itaŋkpabiiti ní.

¹⁸Isaŋki di yàntī unil ń ŋmā kí ŋá tin u bɔ́ntèe. A yaa làá cù kujaauee, a bɔ́ntí tiŋan ní.

¹⁹Unil un cāab̀ u-juti disambiilee kaa bāal̀ tibɔti. Á taa nín̄ nōotí unil un di néeń kubɔcaauee.

²⁰Unil un di yaa kpēē ki sīŋkiǹ u-baa nì u-nee, u làá kpú kii fitila nín kúù dibɔmbɔndin puee ní.

²¹Unil yaa jíń difakal malaayee, kí dāá kúntée, dàa cáá dibiindi.

²²Taa lì yii a làá téeǹ ikpiti in bi ŋá-see. Nín̄ pée máká ti-Dindaan pu, u làá dāá fīī-si.

²³Ti-Dindaan ná tiwaŋŋmantikaal tin kaa bí deedeeyee. Saniya un kaa ŋmàntī tiwan deedeeyee mun kaa ŋān̄ u-cee.

²⁴Ti-Dindaan di kpòotī unil u-saŋkindi poon. Nisaaleen làá ŋá mana kí béé laakin u cée.

²⁵An sá kutaliŋŋu ní unil ń lì u-nyɔkɔn fám yii: <M dū tiwan nee ki sú Unimbɔti,> àá kí pòon̄ Unimbɔti ipoon kí wàatī kí nín dàkafì[22].

²⁶Ubɔti un cáá iciinee béetí kí gàntì binikpitib malaa, ní kí yàntī bí dáaĺ bi-tafal ŋkpitim pu.

²⁷Unil fam sá fitila ní ti-Dindaan dūu tīī-u, ú nīn cáa ŋmíntí ki wāĺ u-poon fɔ́ŋfɔŋ.

²⁸Ubɔti ŋanti nì u-baamɔŋyi di wúń u-pu, tiŋan tin u ŋáańee di tíkí u-beejal.

²⁹Mpɔn di sá binipɔmbi nyooti, ní tiyikpipin sá bitikpilib nyaaŋku.

³⁰Tigbati buuŋyi sá tikpitil nyɔkɔŋu ní, míǹ mbaantiim ní i kóò kí bà unil poon fɔ́ŋfɔŋ.