Read Ntcham Proverbes 21 Bible Online

Proverbes 21 - Ntcham bible

Proverbes 21

¹Ubɔti pɔbil sá kii mbunee ní ti-Dindaan ŋaan, ní laakin pú ní u yaa lèe, ú kpòotī-dì kí túĺ.

²Unil dàkafī yii tin kɔkɔ u ŋáańee ŋān̄ ní, ama un nyí tin kā unil pɔbilinee di sá ti-Dindaan.

³Mbimbim min ŋān̄ ki bí deedeeyee ŋān̄ ti-Dindaan cee ki jítiǹ saraabi.

⁴Dibadakal nì dilambil di sá tin lèekī binikpitib kpitii ki dàkēe.

⁵Ufaŋgiifiti landɔkɔi kɔ̄ntí-u digbilin ní, ama kujinjikilaapaau daan kóò disoolin ní.

⁶Binib bin mɔ́ntì inyimɔn ki ká tigaajatee sá bin sáń ki kóò ŋkúm ŋaanee ní. Bi kāntí tiwan tin kaa bí tiban kaa yúntée ní.

⁷Tipɔmbɔti tin binikpitib ŋáańee di kù-bi, kun puee bi yíì kí tɔ̄ deedee tuuŋŋi.

⁸Unikpiti nóó nsan ŋun gɔ́ĺee ní, ama maanyiiba úǹ nóó nsan ŋun tèen̄ee ní.

⁹An sɔ́ á nīn kóò digunlɔkɔlin ki jítiǹ si nì unimpu un néeń kujaauee ń nīn kóò.

¹⁰Unikpiti úǹ pée nyàab̀ kí ŋá ikpiti ŋma ní, waa sūǹ u-bɔɔ gba saai.

¹¹Bi yaa dáaĺ ulambidaan tafalee, un kaa nyí tibee cíikí ní. Bi yaa dàkā uciŋfitee, u-nyil mɔ̀tīi kútí ní.

¹²Deedeedaan nyí tin jītí unikpiti dicaŋkunee. U làá téé-bi kí tɔ̄ nnaabun.

¹³Unil un yaa kpáá u-tafal kaa pílifì unandaan kuŋkuuntiiyee, u mun yaa láa bíi kūuntí ki nyàab̀ dijòońdee, baa làá dāá pīlifiǹ-u.

¹⁴Tiwan tin bi yaa pú unil un gíí diŋuulee dibalinee sɔ̀ŋkī dipɔbil ní. Tiwampɔkaal tin a dūu nēeǹ udaan lookunee sɔ̀ŋkī diŋuul ní.

¹⁵Kí ŋá tin tèen̄ee sá mmɔn ní ki tīī deedeedaan, ama ní ki sá tifaandi ki tīī bikpitiŋaliibi.

¹⁶Unil un yaa kākatì u-ba ki wāatì dinyil saŋŋuee làá cùú ŋàl̄ bitaŋkpiibi ní.

¹⁷Unil un néeń ki jīǹ mmɔnee làá kpántí usoodaan. Un néeń ki nyù ndaam ki jīǹ tijin tin mèeǹee kpá kí kpántí ugaaja.

¹⁸Unikpiti làá fōō deedeedaan paaŋŋu kí kɔ́ nnaabun, ní biibiidaan ń fōō ibaamɔndaan paaŋŋu.

¹⁹An sɔ́ unil ń nīn kóò u-baba kuteeun ki jítiǹ u nì unimpu un néeń kujaau u-nyɔkɔ pɔ̄ɔ̄yee ń nīn kóò.

²⁰Uciin dumpuee, tigaajamɔntiil nì ŋkpam bí ní, ama ugbaan úǹ yati kaa dɔ̀.

²¹Unil un nyàab̀ kí nīn nóó deedee saŋŋu ki ŋáań tiŋanee làá dāá ká mmaŋfafɔkɔn nì deedee nì tinyool.

²²Uciŋfiti ŋūǹ ki kɔ́ bibaatandambi tiŋkin, kí gbá kí wīī digundi din bi máń ki tú-kì bi máká di-puee.

²³Unil un ŋúb́ u-nyɔkɔ nì u-limbilee nyāntí u-ba tibɔtin ní.

²⁴Kpeefam daan di cáá dilambil ní ki dàkà u-ba, tin kamaa ní u yaa ŋáańee, dibadakal di līī.

²⁵Tin uwutijoodaan bàà là ní kaa ŋūǹ kí kée di yì u-kúm, di sá yii waa kíikí kí dū u-ŋalii kí tɔ̄ ditundi.

²⁶Ŋyunti kamaayee u-nimbiliŋ pée máń tiwan pu ní, ama deedeedaan úǹ pūǹ kaa kpáàa dàkafī u-ba pu.

²⁷Binikpitib saraau sá ntimbiil ní, ŋma nín yíiń bí ŋá an saraabi nì ilandɔkɔkpiti.

²⁸Unil un lèekī nnyimɔn seerauee làá kpú, ama unil un gbìl̄ tibɔtee yaa làá sòoǹee, bi yàntī ú sòoǹ ní.

²⁹Unikpiti ŋáań kii u máká u-ba puee, ama ní deedeedaan úǹ máká u-saŋkindi pu.

³⁰Unil ciiŋyi àá u-nyil àá u-landɔkɔŋu kaa bí tiban ti-Dindaan nimbiin.

³¹Bi bɔ́ntí utaamu kí yóoń dikɔ̀ndi wiiŋŋu pu ní, ama dijajil díǹ nyēeń ti-Dindaan baba cee ní.