Read Ntcham Proverbes 22 Bible Online

Proverbes 22 - Ntcham bible

Proverbes 22

¹Diyimmɔntiil jítiǹ tigaajakpaandi, disíndi jítiǹ sindaariya nì animbil kúti.

²Ugaaja nì usoodaan sá ubaanti ní, ti-Dindaan di pée náań bi-liitil kɔkɔ.

³Un nyíǹ u-bee yaa ká nnaabu dòońee, u sáń kí báĺ ní. Ama bin kaa nyí tibee cáǹ bi-ba kí tɔ̄ poon ní án píĺ-bi.

⁴Unil un sīntì u-ba taapuee fàŋkí ti-Dindaan ní. U-paatii di sá tigaajati nì tinyool nì mmaŋfafɔkɔn.

⁵Ikuŋkum nì titalindi bí milimilidaan saŋŋu pu ní, un là kí fīī u-maŋfalee gɔ́ntí an wanti ní.

⁶Dàkà kibiki nsan ŋun kì máaǹ kí nóóyee, báà kì yaa láa púĺ, kì kpá kí fá-ŋu.

⁷Ugaaja cáá mpɔn bisoodambi pu, ní un jíń dipɔndee sá un u jíń dipɔndee yumbuu.

⁸Unil un yaa búĺ tin kaa bí deedeeyee, agìŋ́kpaan ní u làá cā, di sá yii mpɔn ŋun u cáa ŋáań tipɔmbɔtee làá kúntí.

⁹Unil un cáá tinitee làá ká Unimbɔti biindi, di sá yii u kpīintí unandaan.

¹⁰Jà ulambidaan ní kunikpɔŋkpɔkɔu ń gbèen̄, mimmee kujaau nì asiibil mun kúntì dee.

¹¹Un néeń unil un pɔbil bí diba nì Unimbɔti ní ki sòoǹ nì dineendee bɔɔ di sá ubɔti.

¹²Ti-Dindaan nimbiliŋ pée bá dinyil pu ní, ama waa fòol̄ biibiidambi bíǹ nyɔɔbuŋŋi.

¹³Uwutijoodaan di lì yii: «Gbikinti bí mmɔŋki! M yaa nyáń u làá tin cúú-mi nsanni!»

¹⁴Ubɔ nimpuu nyɔkɔ sá kpaalaa ní, unil un ti-Dindaan dūu fée di jēetí u-poon.

¹⁵Digbaandi jíń kibiki pɔbilin. Mbambaan ŋun bi cáa dátí ki-tafalee di nyāntí-kì digbaandin.

¹⁶Bi yaa bíi wɔ́b̀ unandaanee, bi bíi tìì-u tigaajati ní, bi yaa tí pú ugaaja tiwanee, bi bíi kɔ̄ntí-u disool ní.

¹⁷Kpòon̄ a-tafal kí pīlifì biciŋfitiibi bɔti, pìitī a-pɔbil kí fōō tin m nyí kí dàkà-see.

¹⁸A yaa dū-tì ki kpáafì a-pɔbilin ní ki yaa nyí-tì ki yóoǹ, án làá mɔ̄ɔkiǹ-si.

¹⁹M là á dū a-mákal kí ŋá ti-Dindaan ni ní. An pu ní m làá dū tibɔti gbanti kí dàkà si mun díǹ.

²⁰M ŋmàn̄-si alaŋkpan mmuŋku nì saalaa ŋin sá isaŋki nì dinyilee.

²¹Ŋi làá dàkà-si tin ŋān̄ ki sá ibaamɔnee, án nín làá ŋá pu bi yaa tú-see, á sòoǹ tibɔti ti-púee.

²²Taa fūkul̀ uwɔfi wanti yii u nín sá uwɔfee pu, kí taa wɔ́b́ unandaan ibɔsoon laŋki, u nín kaa cáá ubɔee pu.

²³Di sá yii ti-Dindaan di làá dāá mɔ̄tì bi-pu, ní kí dāá lēē binib bin fìkī-bee maŋfal.

²⁴Taa bɔ́ɔtí unil un cáá diŋuulee. Taa nīn tāatí unil un fòol̄ mbum malaayee.

²⁵Yaa sá fám a làá fōō bi-bimbikpitim, ní án sàl̄-si kii kutaliŋŋuee.

²⁶Taa fáá ubɔ ŋaan kí pòon̄ kí pà a-juti pɔndi.

²⁷A yaa kaa ká kí téeǹee, a dāa dɔ̄ a-lambaŋki pu ní bí dāá cúú kí tíkití.

²⁸Taa cóotí ditaŋkpal din a-baabi nìn cóoǹ kikpaanyɔkɔee kí nìkī.

²⁹Kpèè unil un di nyí u-tundi tiŋanee. U ŋūǹ kí cù bibɔtiibi cee kí tɔ̄ ditundi. Waa làá nīn sá utɔntɔnli un pu baa nyée.