Read Ntcham Proverbes 23 Bible Online

Proverbes 23 - Ntcham bible

Proverbes 23

¹Sii nì unikpaan yaa kāl̀ kí jī tijinee, á nīn nyíǹ a-ba nì un kā a-nimbiinee.

²A yaa kpàà jīǹ tikpilee, á bàtī a-pool pu.

³Taa yàntī u-jinti gbanti ń cúú-si nnimbitaataam. Tì ŋūǹ kí nīn sá-si kutaliŋŋu.

⁴Taa bìǹ kí nyàab̀ tigaajati, pée lēē a-landɔkɔŋu an pu.

⁵A tin lì yii a-nimbil pāantí tigaajati puee, tì wáŋkì. Di sá yii tì túkù ifeen kii ukaalunee ní kí kɔ́ kutaa.

⁶Á taa jī ukummunti jinti, ní kí taa yàntī u-jimmɔntiiti ń cúú-si nnimbitaataam.

⁷Di sá yii waa sá un ní ni dàkafī yii u sée. U làá pée tùkù-si yii: <Jī kí nyɔ̀>, ama waa sòoǹ nì míǹ nì dipɔbil diba.

⁸A làá wùliŋkì tijin tin a jíńee kɔkɔ kí fá, ní anyɔɔbummɔnti ŋin a sòon̄-uee ń kúntíǹ fám.

⁹Taa sàaǹ a-ba yii a bíi kútí ugbaan tibɔti, kun puee u làá kpèè iciin nyɔɔbuŋŋi ŋin a sòoǹee fám ní.

¹⁰Taa cóotí ditaŋkpal din bi cóoǹ kikpaanyɔkɔee kí nìkī[23], kí kɔ́ kí fōō ataŋkpiibil kpaatanti.

¹¹Di sá yii Unimbɔti un mɔ́tí bi-puee sá mpɔndaan ní. Úǹ di làá yūĺ bi-boon kí sòoǹ kí pɔ̀-bi ní kí kpɔ̀ a-bɔti.

¹²Pìitī a-pɔbil kí fōō tin ní bi dàkà-see, ní kí ŋátí a-tafaliŋ kí pīlifì tin bi bíi bífí-see.

¹³Taa gùkufì kí dáaĺ kibiki tafal. A yaa dū mbambaan ki gbáń-kì, kàa làá kpú.

¹⁴A yaa gbáń-kì nì mbambaanee gba ní a làá fīī-kì kí nyāntí ditaŋkpiilin.

¹⁵M-biki, a-pɔbilin a yaa cáá iciinee, ma mun pɔbil làá nīn pīiǹ ní.

¹⁶Án làá nīn baasii mɔ̄ǹ-mi tikpil, a yaa bíi sòoǹ deedee bɔtee.

¹⁷Taa nín cáá bikpitiŋaliibi pu nnimbitaataam a-pɔbilin, ama kutaa kamaayee, á nīn fàŋkí ti-Dindaan.

¹⁸Niinee a-foolbooŋwu làá nīn ŋān̄, ní dimákal din a cááyee kaa làá gbíntí fám.

¹⁹M-biki, pīlifiǹ-mi kí kpántí uciŋfiti, ní kí nīn nóó deedee saŋŋu.

²⁰Taa nín̄ tāatí binib bin nyù ndaam tikpilee, àá binib bin néeń ki sàfī tinanee.

²¹Di sá yii disool cútí udanyɔgbil nì unaŋŋmɔl, ní unil un néeń ŋgeemee dāa pèentí ikpalcati.

²²Pīlifiǹ a-baa un di màl̄-see, kí taa kpèè a-na fám yii u nín púĺee pu.

²³Nyàab̀ kí ká ibaamɔn nì iciin nì nlandɔkɔmɔnti nì dinyil. A yaa ká tiwan gbantee, á ŋúb́-tì tiŋan.

²⁴An mɔ̄ǹ deedeedaan baa ki tin lákatì, ní unil un màl̄ uciŋfitee fàal̀.

²⁵Yàntī a-baa nì a-na ń nīn fàal̀, ní kí yàntī a-na un màl̄-see ń nīn bí dipɔɔpindin.

²⁶M-biki, dū a-pɔbil kí tīī-mi, ní kí yàntī m-bimbim ń nīn sá-si ŋabika.

²⁷Á nīn nyí yii kinimpulaakpaai sá kpaalaa, ní ubɔ nimpuu sá lɔkɔ un nyɔkɔ kaa wāāyee.

²⁸Bi mun nākantí ki cí kii digaŋgandambee. Aa ŋūǹ kí kàaǹ bininjab bin an nimpoobee yāntì bi nyáń bi-nimpoobi boonee.

²⁹Ŋma bí falaa poon? Ŋma bí iyaliŋki poon? Ŋma néeń kujaau? Ŋma bí ki gbáà diniindi an kaa kúntí? Ŋma fòol̄ tiweendi fám? Ŋma nimbiliŋ máǹ cínciŋee?

³⁰An sá bin kàal̀ ndaam taapu ki yúntée, an sá bin ŋmàlintí idafi in pɔ̄ɔ̄yee ki nyùee.

³¹Á taa kpèè ndaam nyaaŋku nì mì nín tòó cábcab pu kuyuunee. A yaa nyù-mèe, mì sìntī ní soooo a-neen.

³²Án dāa kúntée, mì dāa júntí-si kii ukoobuee ní, a lì kii ukoowaati nín júntí puee.

³³A-nimbiliŋ dāa kíǹ ki kpèé ki wāĺ maamaaci wanti, ní a kíǹ ki sòoǹ fám fám.

³⁴Án dāa bí-si kii unil un dɔ̄ tiŋku kansikinee, àá unil un lúń ndɔ ŋun pu bi sàkantí meela satau yilpu kúnti kuntee ní.

³⁵A làá lì yii: «Bi gbáń-mi, ama an kaa píĺ-mi! Bi tāfì-mi tiŋan, ama maa gbìl̄ tiba! Ŋyunti ŋulɔŋu ní m làá fìntī ní kí gíti bàlifì bí cáań-mi ní?»