Read Ntcham Proverbes 24 Bible Online

Proverbes 24 - Ntcham bible

Proverbes 24

¹Taa nín̄ cáá bikpitiŋaliibi pu nnimbitaataam, taa nyàab̀ si nì bi ń nīn bɔ́ɔtí.

²Di sá yii bi pée dàkafī kí ŋá tipɔmbɔti ŋma ní, ní ki sòoǹ tikpitil tin bi làá ŋée ŋma pu.

³Nì iciin ní bi māā kudii, nì dinyil ní bi dùú tīī-ku mpɔn.

⁴Nì nlandɔkɔ ní bi gbēentí kudii tigaajawammɔntiil nì tin cáá kunyampoouee.

⁵Uciŋfiti cáá mpɔn ní. Unil un cáá dinyilee cáá mpɔn mili pu ní.

⁶A yaa làá cù kujaauee, a bɔ́ntí tiŋan ní, di sá yii bisaŋkiliibi wíiŋŋu di yì dijajil.

⁷Iciin bɔti pɔ̄ɔ̄ ki tīī ugbaan ń ŋmā kí gbìl̄ taapu. Bi yaa kpáfì kí sòoǹ kitiŋ pu bɔtee, u kā ki ŋmí ní.

⁸Unil un pée dàkafī kí ŋá tikpitilee, bi yíì-u uŋmatinli ní.

⁹Ugbaan pée dàkafī kí ŋá tin kaa ŋān̄ee, ní binib ná un bèel̄ binibee.

¹⁰A-wunti yaa yɔ̄tì dinimbinaamandi dalee, á nīn nyí yii a-pɔŋŋu kaa náaǹ dee.

¹¹Fīī bin bi dàtī ki cáǹ ŋkúminee, bin bi dàtī ki cáǹ kí kpɔ̀ee, ŋá tiba kí fīī-bi.

¹²Án yaa yíì a làá lì yii: «Taa nìn béè míǹ!» Un di nyí tin kā unil pɔbilinee gbìl̀ taapu. Un kpèé-see pée nyí-tì, ní ki làá pà báà ŋma u-tuuŋŋi nín sá puee paati.

¹³Ŋmɔ́ tisiil, m-biki, kun puee an ŋān̄ ní. Kisikampiŋ mɔ̄ kinyɔkɔn ní.

¹⁴Ama á nīn nyí yii míǹ ní iciin ŋān̄ ki tīī-si. A yaa cáá-iee, a-foolbooŋwu làá nīn ŋān̄ ní dimákal din a cááyee kaa làá gbíntí fám.

¹⁵Unikpiti, taa nákań deedeedaan diiku boon kí fūkul̀ u-wanti kɔkɔ u-dumpu.

¹⁶Di sá yii deedeedaan yaa lítì miluli pu, u làá fàtīí yīkì, ama digìńdi di làá jēetí binikpitib pu.

¹⁷A-nannanliu yaa lítèe, án taa nín̄ mɔ̄ǹ-si, u yaa gbéetèe, á taa nín̄ fàal̀.

¹⁸An yaa kaa sá míǹ, ti-Dindaan làá ká ní án kaa làá mɔ̄ɔkiǹ-u, ní ú páatí u-ŋuul u-pu.

¹⁹Taa gíí binikpitib pu diŋuul, taa nín̄ cáá bikpitiŋaliibi pu nnimbitaataam.

²⁰Di sá yii binikpitib foolbooŋwu kaa làá nīn ŋān̄, ní bikpitiŋaliibi bí kii fitila un bíi kúùyee.

²¹M-biki, fàŋkì ti-Dindaan nì ubɔti. Á taa nín nōotí binib bin là tikɔkɔ ń kpántée.

²²Di sá yii nnaabu làá jēetí bi-pu dicilpu dicilpu, ní ŋma nyí ditafadaaldi din bi-liitil bɔ́ntì bi-puee?

²³Biciŋfitiibi saŋkii iba mun gíti sɔ̀. An kaa ŋān̄ unil ń sòoǹ kí pɔ̀ digàndi.

²⁴Ubɔsoonli yaa tùkū unikpiti yii: «A-bɔti ŋān̄ee», diniwul tòó-u mbusu, ní samaa kɔkɔ kíǹ ki ná-u.

²⁵Ama bin yaa kūū unikpiti bɔtee bí mmɔnni. Binib làá nīn mèé tiŋan ki bìintí bi-pu.

²⁶Unil yaa kíí tibɔti nì ibaamɔnee, u dàkā kubɔɔtiiu kumɔntiiu dee.

²⁷Tɔ̄ mmɔŋki tuuŋŋi kí dóó, kí bɔ́ntí asaatuun kí wàatī ní kí nín mā kudii.

²⁸Taa túń a-juti pu dibɔgabil fám. A là kí sòoǹ kí mɔ̄ntàaa?

²⁹Taa lì yii: «U nín ŋá-mi puee, míǹ ní m làá ŋá-u. M làá téeǹ-u tin u ŋée pu.»

³⁰M cōom̀ ki kpākaǹ uwutijoodaan ubɔ saaku, m kpākaǹ unil un kaa cáá dinyilee fiinyi sufii kpaabu.

³¹M kpēēyee ikuŋkum di pée múkú an kɔkɔee, kumoou di nyáń ki jíń mpaan bukpaa kɔkɔnee, ataŋkpee gundi din māntìi tú-buee di dɔ̄ kitiŋee.

³²M nín ká mimmee ní m dākafì an pu, m kpēēyee ní an dàkā-mi tibɔti nee.

³³A là kí gèeǹ fiii, a là kí dáb́ fiii, a là kí dòon̄ fiii kí kpàl̄ iŋal.

³⁴A dɔ̄ mimmee ní disool ń cíliń a-pu kii unaayuuyee, ní falaa ń cúú-si kii bin fúkuĺ binibee.