Read Ntcham Proverbes 25 Bible Online

Proverbes 25 - Ntcham bible

Proverbes 25

¹Ubɔti Saloomɔn laŋkpaŋŋi aba gíti sèé. Juuda bɔtiu Eeseekiyaasi nib di ŋmàn̄-ŋi.

²Unimbɔti nyooti di sá bí taa nín̄ gbìl̀ tin u ŋáańee taapu, bibɔtiibi nyooti di sá bí ŋmā kí lēē tin kɔkɔ binib ŋáańee taapu.

³Taa nyí kutaa nín dátìń-ti puee, kaa nyí kitiŋ nín nyóò puee. Míǹ mbaantiim ní taa ŋūǹ kí béé tin kā bibɔtiibi pɔbiliŋinee.

⁴A yaa lēē tijɔkɔndi tin bí animbil kúti puee, bi làá ŋmā kí dūú mɔ́ɔ́ tiwan tin cáá kunyaaŋŋuee.

⁵Jà binikpitib kí nyāntí ubɔti cee, ní deedee ń tīī u-beel mpɔn.

⁶Taa nín̄ yòontí a-ba ubɔti nimbiin, kí taa nín̄ fòol̄ binikpaambi paaŋŋu.

⁷Di sá yii an sɔ́ ubɔti ń tùkù-si yii: «Jɔ̄mìń kí kāl̀ m-cee doo!» ki jítiǹ bí sìntīǹ-si taapu unikpaan ubɔ nimbiin[24].

⁸Tin a-nimbil kée, taa jìkì kí lì-tì ni yaa bí ibɔsoonni. A-juti yaa kpákáǹ-si yii aa cáá ibaamɔn, a làá ŋá mana.

⁹Sii nì a-juti yaa cáá tɔbee, ní kpèè kí ŋāŋkì, ama á taa dū tin ubɔ tùkū-si dibalinee kí māafì.

¹⁰An yaa kaa sá míǹ, ubɔ ŋūǹ kí gbìl̄ ní kí kɔ́ǹ-si icoo, ní tin a sòon̄ee, aa ti ŋūǹ kí gítí boon.

¹¹Dinyɔɔbundi din nyáń ŋyunti ŋun máaǹee ŋān̄ kii sindaariya wanti tin bi dū animbil kúti ki nyɔ̄kɔntèe ní.

¹²Unil un pílifíǹ uciŋfiti wooŋyee bí kii sindaariya bɔmbil nì sindaariyamɔnti léeŋkaatee ní.

¹³Kii utaa nín nì kí sɔ̀ŋkì tikɔkɔ kutuntuŋu yuntiŋu puee, míǹ ní deedee tuuŋŋu sɔ̀ŋkī ŋu-kpiliu ŋun túń-ŋuee pɔbil.

¹⁴Unil un pōoǹ kí pɔ̄ tiba ní kaa púee náań nì atagban nín lúntí, kubuŋu ń jītí utaa kaa nì puee ní.

¹⁵Unil un cáá kimɔtii tikpilee ŋūǹ kí kpántí ubɔsoonli landɔkɔŋu, míǹ ní dilimbil din pɔ̀fèe ŋūǹ kí wīī dikpabil.

¹⁶A yaa ká tisiilee, á taa ŋmɔ́ kí lákatí a-ba pu, an yaa kaa sá míǹ, án làá núutíǹ-si ní á wùliŋkì.

¹⁷Taa nín̄ cá a-bɔɔ dumpu múlmul, an yaa kaa sá míǹ u-naŋki dāa nyēē-si, ní u kíǹ ki ná-si.

¹⁸Unil un lēē u-juti pu nnyimɔn seerauee bí kii ditambɔndi àá kitàataajiki àá mpiin ŋun cɔ́m̀ líkí likee ní.

¹⁹Dinimbinaamandi yuntiŋu un yaa dū u-mákal ki páaǹ un nyēē binib boonee puee bí kii unil un dù u-nyindi din cìŋkēe kí jú tiwan, àá un còom̄ u-taal din wùee puee ní.

²⁰Á gāā un bí kunimbaaunee dipɔɔpindi laŋyee bí kii a cúú u-bɔkutil ki pēetì tiwool yuntiŋu àá a dū ndaam min nyàm̀ee ki sītì mbuun puee ní.

²¹Ŋkùm yaa cáá a-nannanliu, á tīī-u tijin ú jī, nnyinnyoo yaa tí cáá-u, á tīī-u nnyim ú nyɔ̀.

²²A yaa ŋá mimmee, an bí kii amɔsiŋkoon ní a cáa pāantí u-yil puee[25], ní ti-Dindaan ń dāá pà-si.

²³Kubuŋu kun nyēeń ŋgan púee cāabìń utaa, ní tinyimɔmbɔti kɔ̄ntí binib diŋuul.

²⁴An sɔ́ á nīn kóò digunlɔkɔlin ki jítiǹ si nì unimpu un néeń kujaauee ń nīn kóò.

²⁵Dinyɔɔbummɔɔndi din nyánní ndandatee bí kii nnyinsɔm min sɔ̀ŋkī nneenee ní.

²⁶Nnyimbul ŋun gbātèe àá dinyimbɔbil din nyim bíil̀ee sá kii deedeedaan un mátifí unikpiti nimbiinee ní.

²⁷An kaa ŋān̄ unil ń ŋmɔ́ tisiil tikpil, míǹ ní an kaa tí ŋān̄ unil ń nyàab̀ tinyool tikpil.

²⁸Kitiŋ kin dɔ̄ ki wāā fám kaa cáá digundi din māntì ki tú-kèe bí kii unil un gíí diŋuul kaa ŋūǹ kí cúú u-bee ní.