Read Ntcham Proverbes 26 Bible Online

Proverbes 26 - Ntcham bible

Proverbes 26

¹Kii an nín kaa máaǹ ntaayim ń lítí dipeel pu, utaa ń nì ŋyunti ŋun bi cēē tikpaajinee, míǹ ní tinyool kaa máaǹ ugbaan.

²Kii udiyaal àá kikoosiyaakpaai nín yíkí ki ŋàaǹ puee, míǹ ní mbusu kaa lítí maanyiiba pu.

³Utaamu máaǹ dinaalabil, ní kimaŋ máaǹ dikpàldi, ní ugbaan máaǹ ndɔ.

⁴Ugbaan yaa bālifì tibɔti ŋgbaaŋyaamin, á taa kíí-u kii si mun sá ugbaanee. An yaa kaa sá míǹ, a làá kpántí ugbaan kii úŋ̀wuee ní.

⁵Ugbaan yaa bālifì tibɔti ŋgbaaŋyaaminee, á kíí-u ŋgbaaŋyaamin, án nín làá ŋá pu ú taa dū u-ba ki yíiń uciinee.

⁶Un yaa dū tibɔti ki ŋúbiǹ ugbaanee ŋá kii unil un gāā ki gūutì a-taaŋi àá un dáaĺ agìń ki tɔ́ u-ba puee ní.

⁷Kii ufaliŋfaan taaŋi nín fáká puee, míǹ ní dilaŋkpandi fáká ki kā ugbaan nyɔkɔn.

⁸Á tīī ugbaan jilmee bí kii á dū ditaŋkpal kí fúuń kujaataafuŋun kí bóob́ kí nákańee ní.

⁹Kii udanyɔgbil nín ŋúb́ ikuŋkum u-ŋaan puee, míǹ ní dilaŋkpandi fáká ugbaan nyɔkɔn.

¹⁰Ukpil un di fòol̄ ugbaan àá udanyɔgbil un jītée ditundee sá un ŋáań báà ŋma tiweendee ní.

¹¹Kii kibɔkɔ nín wùliŋkī kí fàtīí gíiǹ kí ŋmɔ́ puee[26], míǹ ní ugbaan fàtīi gítí u-gbaandi pu.

¹²A yaa tin ká unil yíì u-ba uciinee, a yaa pūtì máká ugbaan pu gba, an sɔ́.

¹³Uwutijoodaan lì yii: «Upeecuncuti bí didandi pu! Gbikinti bí nsanni!»

¹⁴Kii punuu nín màntī tikúti tin pu u sàkēe puee, min ní uwutijoodaan dɔ̄ u-dooŋu pu ki lábití.

¹⁵Uwutijoodaan dùŋfī u-ŋal kí bɔ̄ disambilin, ama ní u-wutijool puee, an pɔ̄ɔ̄ ú fàtīí gíiǹní-ŋu u-nyɔkɔn.

¹⁶Uwutijoodaan yíì u-ba uciin ki jítiǹ binib biluli bin kíikí tibɔti nì dinyilee.

¹⁷Unil un dù u-ba kí kɔ́ǹ kujaau kun kaa sá u-yɔkɔee poonee bí kii unil un là kí cúú kibɔkɔ ki dūu cúú ki-tafalee ní.

¹⁸Kii unil un wáatèe nín tòó aŋmisaatee nì mpiin nì tiwan tin kùee puee,

¹⁹míǹ ní unil un kíiĺ u-juti, ní boonee kí lì yii: «M ŋáań-si tinaacinee» bí.

²⁰Idɔ yaa wùn̄ ki kúntèe, ŋŋmi kpíì dee, míǹ ní usambiidaan yaa kaa ti bée, kujaau mun kúntì.

²¹Akoon di tìì amɔsiŋkoon ní idɔ tìì aŋmilimbil, míǹ ní ubɔmbɔdaan nyàatī kujaau.

²²Ubɔmbɔtukul nyɔɔbuŋŋi sá tijin tin mɔ̄ee ní, tì kóò unil poon ní fíŋfiŋ.

²³Anyɔɔbummɔɔn ŋin nyēē dipɔɔkpitilinee bí kii animbil kúti tin cáá tijɔkɔndi bi dūu nákáǹ kuyɔkɔu sambil puee ní.

²⁴Unil un cáá kináŋee kaa sòoǹ kí dóó u-poon bɔti kɔkɔ, ama u-pɔbilinee, u bɔ́ntí tinyimɔmbɔti ní.

²⁵U yaa bíi sòoǹ nì si kinyɔɔmɔɔyee, taa fōō kí kíí, di sá yii u-pɔbilinee, tilandɔkɔkpiil di gbí.

²⁶U cáá nciin kí ŋmā kí bìin̄ u-náŋki pu, ama ŋwiinee u-tuŋkpitiŋ làá dāá nyā mpaampiin pu báà ŋma ń ká.

²⁷Unil un yaa gbìn̄ mbòóyee làá dāá lítí ŋu-poon, un yaa bíntí ditaŋkpalee, dì làá gítiń kí tàb̄-u ní.

²⁸Unil un mɔ́ntí u-jutiibee ná-bi ní ki ŋáań-bi tiweendi, ní un cáá nyɔɔmálmalee nàantí-bi.