Read Ntcham Proverbes 27 Bible Online

Proverbes 27 - Ntcham bible

Proverbes 27

¹Taa nín̄ pàkà a-ba fool wiiŋŋu pu, di sá yii saa nyí tin làá jītí díǹ wiiŋŋuee[27].

²Yàntī ubɔ ń pàkà-si, taa pàkà a-ba, yà unicaan ń pàkà-si, án taa nín̄ sá sisi a-ba!

³Ditaŋkpal nì dibul nyìm̀ tikpil, ama ugbaan ŋuul nyìm̀ nì tiwan liitil gbanti.

⁴Mbum ŋáań tipɔmbɔti ní diŋuul bí kii mbun ŋun gbée, ama ŋma ŋūǹ kí yūĺ ipoompoon íǹ nimbiin?

⁵Á wòoǹ unil mpaampiin pu sɔ́ nì á nīn néeń-u dibalin ubɔ kaa wāĺ.

⁶A-bɔɔ yaa tīī-si tiweendee, án cáá dimákal, ama a-nannanliu yaa kpàl̄-see, á nīn nyíǹ a-ba.

⁷Unil un jíń ki díkée yaa ká tisiilee, u yákafí ditaal ní, ama un ŋkùm cááyee ceeyee, tin tūee mɔ̄ ní.

⁸Kii kinɔmbiki nín yìiǹ kí cù ndan kí fá ki-diiku puee, míǹ ní unil un yìiǹ kí cù ndan kí fá u-dicaŋkuee bí.

⁹Ikpafi nì talaalub tìì unil pɔbil mmɔn, ama ní kubɔɔtiiu kun mɔ̄ee jítiǹ talaalumɔmmɔnti.

¹⁰Taa fá a-bɔɔ, kí taa fá a-baa mun bɔɔ. Digìńdi yaa kɔ́-see, á taa cù a-nabiki cee. A-kɔŋkɔnnaatɔ un pìlīǹ-see sɔ́ǹ kinabiki kin bíń ndandatee.

¹¹M-biki, nín̄ cáá iciin kí tīī-mi dipɔɔpindi. Niinee ubɔ yaa bíi kpākantí-mee, ḿ ŋmā kí kíí-u.

¹²Un nyíǹ u-bee yaa ká nnaabu dòońee, u sáń kí báĺ ní. Ama bin kaa nyí tibee cáǹ bi-ba kí tɔ̄ poon ní án píĺ-bi.

¹³Ubɔ yaa yúl̀ unil un waa nyée boon kí pìnnì tibee, á fōō udaan bɔkutil kí yóoń, u nín yúl̀ unicaan boonee puee, á fōō u-cee toolima kí yóoń.

¹⁴Unil yaa téeń ki jáam̀ u-juti mpɔn kutaafaau pɔ̀lpɔlee, udaan jaamii gbanti kpántí mbusu ní.

¹⁵Utaa yaa bíi nì nnyim nín còol̀ kaa gúǹ puee, míǹ ní unimpu un néeń kujaauee bí.

¹⁶Unil ń ŋmā kí cúú-uee bí kii u bíi cútí kubuŋuee ní, àá kii ŋkpam ní u bíi nyàab̀ kí dū u-ŋal kí cúúyee.

¹⁷Tikúti ní bi cáa lòontí tikúti, unil nākantí u-juti ní kí cíkití.

¹⁸Unil un kpèé u-fiigi subu tiŋanee làá dāá ŋmɔ́ bu-bil. Bi làá tīī utɔntɔnli un ŋúb́ u-kpiliu tiŋanee jilma.

¹⁹Kii unil nín kpèé nnyimin kí wāl̀ u-ba puee, míǹ ní a kpèé unil nimbiin ní kí wāl̀ u-landɔkɔi nín sá puee.

²⁰Taapu taŋkpiil nì Mbookpaan kaa gbéè, míǹ ní unil nimbil kaa kpèé kí díkí.

²¹Ŋŋmi ní bi cáa cɔ́ŋkí kí béé animbil kúti timɔntiil nì sindaariyamɔnti, ama bi nín pàkà unil puee di dàkà dinicil din ní u sée.

²²Báà a yaa dū ŋkuntudɔ ki sáń ugbaan kukuntuu poon kii bi nín cùkutī tijimpin puee, u-gbaandi kaa làá nyā u-ni.

²³Nín̄ nyí a-waŋkuti tiŋan, kí nīn kpèé a-picaŋkpunti tiŋan.

²⁴Di sá yii tigaajati kaa bí kí nīn cá jaanjaan kaa kúntí, míǹ ní dibeel kaa bí kí nīn cá abin abin.

²⁵Á gāā timool tisatin, ní timɔpɔn yaa bíi nyēēyee, á cù dijool pu kí kùliń timɔkulindi.

²⁶Kpàà ipii kí cā i-kuti kí dūú ŋáĺ tiwampeeŋkaal, ní kí kpàà iŋɔjaa kí nyāfì kí dā kitiŋ kí kpɔ̀ tikpaal.

²⁷Kpàà iŋɔsal tikpil kí ká ŋŋɔbiim kí kpíiǹ a-ba, kí kpáaǹ a-dicaŋkun yab nì a-tɔntɔnliibi binimpoobi.