Read Ntcham Proverbes 28 Bible Online

Proverbes 28 - Ntcham bible

Proverbes 28

¹Báà ubɔ yaa kaa bíi jì unikpiti, u sáń ní. Ama deedeedaan úǹ cáá dipɔbil kii digbikintipɔmbilee ní.

²Binib yaa yíkì kaa kíí bi-ba pu kitiŋ kin poonee, bikpilib wīintí ní. Ama unil un cáá iciin nì dinyilee yaa bée, kitiŋ sɔ̀m̀ ní.

³Upɔɔl un di cáá ntoom ní ki wɔ́b̀ binandambee bí kii utaa un nì ki bíiĺ tikpaajinee ní.

⁴Binib bin féeń Unimbɔti marauee pàkà binikpitib ní, ama ní binib bin ŋúb́ Unimbɔti marauee jáà nì bi.

⁵Binikpitib kaa gbìl̀ tin bí deedeeyee taapu, ama bin nyàab̀ ti-Dindaanee gbìl̀ tikɔkɔ taapu ní.

⁶Unil un sá usoodaan ki còom̄ deedee saŋŋunee sɔ́ǹ unil un di sá ugaaja ki nóó isaŋkpitee.

⁷Kibiki kin ŋúb́ Unimbɔti marauee sá unyil ní, ama un nōotí biyipɔɔdambee kɔ̄ntí u-baa ní icoo.

⁸Unil un pìntí binib animbil kí dāá fōō kí páań kí kpántí ugaajee kōontí u-gaajati gbanti ki yōontí un sūǹ biwɔfib saayee ní.

⁹Unil un yaa lēē u-tafal Unimbɔti maraunee, ti-Dindaan ná udaan wimmeem gba ní.

¹⁰Un yaa kíil̀ deedeedambi ki tɔ́ nsaŋkpitinee làá dāá jēetí mbòó ŋun úǹ u-ba gbìn̄ee poon. Ama bibulcinnib làá dāá jī nnaam.

¹¹Ugaaja kā ki dàkafī yii úǹ di cáá iciin, ama usoodaan un cáá dinyilee nyí kun ní u sée.

¹²Deedeedambi di yaa fōō mpɔnee, an sá ifaal ní. Ama binikpitib yaa fōō mpɔnee, báà ŋma bāal̀ ní.

¹³Unil un yaa cáá u-kpitii ki bāal̀ee, an kaa bútí-u. Ama unil un bìitī u-kpitii pu kí dū-i kí fée kāntí u-kpitii pɔ̄tam.

¹⁴Unil un fàŋkí kí taa pée ŋá ikpitee bí mmɔnni, ama un yaa cáá mpɔɔgbifinee làá ká nnaabu.

¹⁵Kii gbikinti nín sūǹ pu àá digbiŋgbil nín wúlìń puee, míǹ ní unikpiti un wɔ́b̀ dinibul din sá binandambee bí.

¹⁶Uyidaan un kaa cáá dinyilee fìkì binib wanti ní. Ama un kaa néeń ki mùul̄ ki jīǹee kāntí mmaŋfafɔkɔn ní.

¹⁷Unil un kūū u-jutee sáń ki cá dikaakulin ní, ubɔ ń taa cúú-u.

¹⁸Unil un cáá tibulcinee làá ká difiil, ama un nóó mili mili saŋŋuee làá lítí ŋubɔ poon.

¹⁹Unil un kù u-saakuee jīǹ ki díkì ní, ama unil un jòó ki pá tin kaa bí tibanee boonee làá nīn pée sá usoodaan ní.

²⁰Unil un bí deedeeyee làá ká dibiindi, ama un jìkì kí ká tigaajatee kaa làá lóó ditafadaaldi.

²¹An kaa ŋān̄ unil ń pɔ̀ digàndi, ama fiii un bi làá nyíĺ kí ŋá-u ú jēe puee, unil ŋáań ikpiti gbanti.

²²Unil un cáá nnimbitaataamee jòó ki pá tigaajati boon ní. Waa nyí yii disool làá kɔ́-u.

²³Unil yaa wòon̄ u-jutee, kí dāá kúntée, úǹ ní u làá dāá jāam̀ ki jítiǹ un nìn pàkā-uee.

²⁴Un yaa yù u-baa nì u-na ki lì yii: «An kaa sá ikpitee!» udaan nì digaŋgandambi sá ubaanti ní.

²⁵Un cáá binib wanti pu nnimbitaataamee jāantí binib ní, ama un máká ti-Dindaan puee, an bútí-u ní.

²⁶Unil un máká úǹ u-ba puee sá ugbaan ní, ama un còom̄ nì iciinee làá ká difiil.

²⁷Un yaa pūǹ biwɔfibee, tiba kpá kí lóó udaan. Ama un yíì kaa fātìi tɔ́-bee làá kɔ́ mbusukpaanni.

²⁸Binikpitib yaa fōō mpɔnee, báà ŋma bāal̀ ní. Ama bi yaa kúntèe, deedeedambi bùtī tikpil ní.