Read Ntcham Proverbes 31 Bible Online

Proverbes 31 - Ntcham bible

Proverbes 31

¹Isaŋki in Maasa bɔtiu Leemuyeel fōō u-na ceeyee sèé:

²«Áù, m-jipɔɔn! Áù, m-poon biki! Áù, kibiki kin m mēē ki kée!

³Taa dū a-pɔŋŋu kí fìtīǹ binimpoobi, taa nóó bin di yàntī bibɔtiibi wáŋkée.

⁴Leemuyeel, bibɔtiibi kaa máaǹ kí nyɔ̀ ndaam, abɔtibil mun kaa máaǹ kí nyɔ̀ ndaam min pɔ̄ɔ̄yee.

⁵Bi yaa nyùn̄ee, bi súntí marab pu, ní kaa ti mɔ́tí binandambi pu.

⁶Dūmaan ndaam min pɔ̄ɔ̄yee kí tīī bin làá kpúee, kí dū ndamam kí tīī binib bin di bí kunimbaaunee.

⁷Udaan yaa nyùn̄ee u làá súntí u-falaau pu, ní kaa ti làá téetí u-nimbaaku pu.

⁸Siiyee, sii máaǹ kí sòoǹ kí tīī binib bin yaa sòoǹ baa pílifíǹ-bee, binib bin bi dūu fée.

⁹Á nīn sòoǹ tibɔti nì ibaamɔn, kí mɔ̄tì biwɔfib nì binandambi pu[29].»

¹⁰Ŋma ŋūǹ kí ká unimpu tiŋman pu yɔu? U pɔ̄ɔ̄ kudaau ki jítiǹ abeedimbil.

¹¹U-cal cáá u-pu dimákal. Waa ŋáań u-cal gaajati fám fám.

¹²U-maŋfal wiiŋyi kɔkɔ poonee, u ŋáań u-cal tiŋan ŋma ní, waa ŋáań-u tikpitil.

¹³U nyàab̀ ipii kuti nì gulfa un bí fálfalee, ní ki tūǹ ditundi nì difaŋgiil.

¹⁴U sá kii meela un tūntí tinyampuwanee ní, u cāabìń u-jikaati ndandati ní.

¹⁵U fìntī ntaafaabɔmbɔm ní. U ŋáań tijin kí tīī u-dicaŋku, ní ki tìì u-tɔntɔnliibi bi-tundi.

¹⁶U kàal̀ ní kí dàkafì ní kí dā u-ba nì u-nimbiliŋ kusaau ní kí cóoń fiinyi sufii ku-pu.

¹⁷U tūǹ ditundi nì difaŋgiil, waa ŋūǹ kí nīn kā iŋal jòon̄ fám.

¹⁸U ká yii u-tundi còom̄-u tiŋan. U-fitilau pée wāĺ ní kunyeeu kɔkɔ ní u tūǹ ditundi.

¹⁹U pée ŋúb́ kigulfajantilii u-ŋaan, ní ki ŋál̀ tiwan.

²⁰U pūǹ bisoodambi tiwan, ní ki tútúǹ binandambi.

²¹Tiwool yuntiŋuee, waa fàŋkí u-dicaŋku pu, kun puee u-dicaŋkun yab kɔkɔ cáá tiwool bɔkutiŋ.

²²U lù u-ba ndoo pu satab, ní ki pèentí iŋaamɔnti in bí fálfal ki máǹ cínciŋee wanti.

²³Akpambal yaa kpáfèe, bi tìì u-cal tinyool. U-cal kútí bitindaŋkpilib pu bi kpáfí ki kpèé kitiŋ pu bɔti.

²⁴Unimpuee ŋál̀ tiwampeeŋkaal ki nyáfí, ki lù dambalab ki nyáfíǹ binyampoobi.

²⁵U cáá mpɔn ní binib tìì-u jilma, u cáá dimákal foolboon pu.

²⁶U sòoǹ nì iciin ní ki tìì isaŋkimɔnti nì tiniti.

²⁷U-nimbil cɔ́ tin kɔkɔ pée jītí u-dicaŋkunee pu, ní waa jīǹ tijin tin pu waa nyántì kutuntuŋuee.

²⁸U-biyaamu pàkà-u binib nimbiin, ní u-cal mun tìì-u tinyool.

²⁹U lì yii: «Binimpoobi tikpil bí ki sá tiŋman pu nimpoobi, ama sii jítiǹ bíǹ kɔkɔ!»

³⁰Unimpu un bí gbàlgbalgbalee ŋūǹ kí ŋmàtiǹ unil, ní kunyaaŋŋu mun kaa yúntí, ama unimpu un fàŋkí ti-Dindaanee di máaǹ tinyool.

³¹Bi máaǹ kí tīī-u u-faŋgiil paati. Binib kɔkɔ máaǹ kí pàkà-u u-tundi pu.