Read Ntcham Proverbes 4 Bible Online

Proverbes 4 - Ntcham bible

Proverbes 4

¹M-biyaamu, pīlifìmaan ubaati dàkatam. Ní pīlifì tiŋan ní kí kpántí binyiliibi.

²Di sá yii dinyil din sá dimɔntiilee ní m bíi tìì-ni, ní taa dū tin m bíi dàkà-ni nee kí fá.

³Ma mun nìn sá m-baa jipɔmmɔntiu ní, ní m-na nìn néeń-mi tikpil kii dijipɔmbaabilee.

⁴M-baa nìn dàkà-mi ki lì yii: «Cúú m-nyɔɔbuŋŋi kí ŋá a-pɔbilin, kí nīn nóó m-bɔkpaaŋi tiŋan, mimmee a làá kàl̄ kitiŋ pu kí yúntí.

⁵Ká iciin nì dinyil, kí taa súntí m-nyɔɔbuŋŋi puɔɔɔ, kí taa fàtī a-boon kí tīī-ŋi mun.

⁶Taa dū iciin kí fá, i làá nīn cí-si, nín̄ néeń-i, i làá nīn wúń a-pu.

⁷Iciin kílilaŋki di sá á pɔ́ɔǹ kí bīfì kí béé-i, dū tin kɔkɔ a cááyee kí sú kí ŋmā kí ká dinyil.

⁸Dū iciin kí nákáǹ a-ba kpátí kpati, i làá yòon̄ a-yindi yilpu. Bìb̄ iciin, i làá tīī-si tinyool.

⁹I làá nīn sá kii ŋŋaamɔntee ki yíĺ a-yil, ní kí nīn sá kii kibeefuulii kimɔmmɔntiiyee ki cíkí a-yil pu.»

¹⁰M-biki, pīlifiǹ-mi, fōō m-nyɔɔbuŋŋi ní kí kàl̄ kitiŋ pu kí yúntí.

¹¹M bíi dàkà-si iciin saŋŋu, m kpòotī-si á nīn còom̄ deedee sàmbiyaamu pu ní.

¹²Mimmee a yaa bíi còom̄ee, tiba kaa làá lìkin̄-si, a yaa tí bíi sáńaaa, aa làá gbéetí.

¹³Nín̄ ŋúb́ tin bi dàkā-see, taa dū-tì kí fá. Nín̄ ŋúb́-tì, kun puee tíǹ di sá a-maŋfal.

¹⁴Taa fōō binikpitib bimbim, kí taa nóó bikpitiŋaliibi saŋŋu.

¹⁵Yàntī-ŋu, taa nóó-ŋu. Gɔ́ntí-ŋu ní kí cùú dī laaba.

¹⁶Di sá yii an nibee yaa kaa ŋá tin kaa ŋān̄ee, baa ŋūǹ kí gèeǹ, bi yaa kaa yāntì ubɔ lítì, ŋgeem kaa cútí-bi.

¹⁷Di sá yii bi ŋáań ikpiti ní ki kāntí ki jīǹ, tipɔmbɔti ní bi ŋáań ki kāntí ki nyù.

¹⁸Nsan ŋun deedeedambi nóóyee sá kii ntaafaabɔmbɔm walifiŋuee ní, ŋu pée nyàatī ní ki pɔ́ɔkí ki cá áli kutaa ń dāá wúntí kɔkɔ.

¹⁹Ama binikpitib bíǹ saŋŋu sá dibɔmbɔndi ní. Baa wāĺ tin dɔ̄ nsanni bi làá cùú gbéetée.

²⁰M-biki, pīlifì m-nyɔɔbuŋŋi tiŋan, kpòon̄ a-tafal kí pīlifì m-saŋkii.

²¹A-nimbiliŋ ń nīn pée cɔ́ i-pu, dū-i kí ŋá a-pɔbil poon poon.

²²I sá dimaŋfal ní ki tīī bin ká-iee, ní ki sá ŋgbampɔn ki tīī bi-wunti kɔkɔ.

²³Kpèè a-pɔbil tiŋan, di sá yii díǹ di sá a-maŋfal nyeeŋu.

²⁴Cúú a-nyɔkɔ kí taa pée sòoǹ tinyimɔmbɔti, kí taa pée sòoǹ kí bīil̀ a-juti.

²⁵Á nīn pée kpèé a-nimbiin, yàntī a-nimbikpeeŋu ń nīn pée bá nyɔkɔpu.

²⁶Á kpèè nsan ŋun a làá dēe tiŋan, a-sàmbiyaamu ń nīn sá mun tèen̄ee[14].

²⁷Taa kpèetī kí cù ŋgiil puɔɔɔ, kí taa kpèetī kí cù ŋgan pú. Sāǹ kí wàatī tin kaa ŋān̄ee.