Read Ntcham Proverbes 6 Bible Online

Proverbes 6 - Ntcham bible

Proverbes 6

¹M-biki, tí lì yii a fáá ubɔ ŋaan ki pōoǹ kí pà a-juti pɔndi,

²ní tin nyáń a-nyɔkɔnee dūu bóob́-si ki sàl̄-si kii kutaliŋŋuee.

³M-biki, kii a nín kɔ́ a-juti ŋaanee, ŋá tin bí nee kí nyā u-bɔtin. Cù u-cee kí lítí u-nimbiin kí gbàam̀-u.

⁴A yaa kaa ŋúń ki ŋá míǹ, á taa pée púkuń ní kaa nín gèen̄.

⁵Fōō a-ba kí líí kii ucaŋkpalim nín ŋmátí ukpan ŋaan puee, àá kii unoon nín ŋmátí kí nyā kutaliŋŋun puee.

⁶Uwutijoodaan, cùú kpèè unaanyanti. Cùú kpèè u-bimbim kí kpántí uciŋfiti[16].

⁷Unaanyanti kaa cáá un kpèé-u ní u tūǹ ditundee, kaa cáá un ŋmà ditundi din u túń ŋwiinee, kaa cáá ukpil un fōō-u ditundee.

⁸Nì míǹ kɔkɔee, dipeel puee u kōontí tijin ní kí yóoń, u kpáafí tijikaal ŋyunti ŋun bi cēē tikpaajinee ní.

⁹Uwutijoodaan, kí cáá sāā ŋyunti ŋulɔŋu ní a làá nīn pée dɔ̄ ki gèeǹ ní? Ŋyunti ŋulɔŋu ní a làá fìntī ŋgeem pu ní?

¹⁰A là kí gèeǹ fiii, a là kí dáb́ fiii, a là kí dòon̄ fiii kí kpàl̄ iŋal.

¹¹A dɔ̄ mimmee ní disool ń cíliń a-pu kii unaayuuyee, ní falaa ń cúú-si kii bin fúkuĺ binibee.

¹²Unikpiti sá un kaa bí tibanee, u yìiǹ ní ki mɔ́ntí inyimɔn.

¹³U wàb̀ u-nimbil ki cáá u-taaŋi nì u-ŋambiyaamu ki dàkà tidaandi kí ŋmā kí mɔ̄ntì u-nyimɔŋyi.

¹⁴Ikpiti diŋál di kā u-pɔbilin. U pée dàkafī tin kaa ŋān̄ee ŋma pu ní, ki jāantí binib.

¹⁵An pu ní nnaabu làá jēetí u-pu dicilpu dicilpu. Dibɔbilin niin ní án làá nàan̄-u nnyɔkɔ kpá!

¹⁶Tiwan tiluu ní ti-Dindaan pée ná, ní kululuútiiu ní u-nimbil kaa là kí ká:

¹⁷Unil un dàkà u-bee, unil un mɔ́ntí inyimɔnee, unil un kù maanyiibabee,

¹⁸unil un bɔ́ntí kí ŋá atuŋkpitee, unil un yáb̀ kí ŋá tin kaa ŋān̄ee,

¹⁹Unil un lèekī nnyimɔn seerauee. Kuwanluluútiiu di sá unil un jāantí nnabiyaamuee.

²⁰M-biki, nín̄ ŋúb́ tin a-baa kpáafì-see, taa fàtī a-boon kí tīī tin a-na dàkā-see.

²¹Tí nīn pée kā a-pɔbilin, yàntī tí nīn sá tiléeŋkaal á dūú léeń a-neen.

²²Tì làá nīn kpòotī-si a-saŋkindi poon, ki làá nīn cí-si a-geem poon ní a yaa fīntèe í sāŋkì-si.

²³Di sá yii tibɔkpaafikaal sá kii fitilee ní, ní didàkal sá kii ŋwalifee, ní iwoon sá kii dimaŋfal saŋŋuee.

²⁴An wantee làá wúń a-pu kí nyāntí-si unimpu un saŋkindi kaa ŋān̄ee, nì ubɔ nimpuu nyɔɔmálmaluu ŋaan.

²⁵Taa nín̄ là an nimpuuee u-nyaaŋku pu, taa yàntī u-nimbikpeeŋu ń dáaĺ-si kí kɔ́ǹ u-taliŋkun.

²⁶Di sá yii a yaa mɔ̄nnì kinimpulaakpaayee, kalaa[17] nimbiliŋ ní a làá dūú pà, ama a yaa mɔ̄nnì ubɔ nimpuuee, a-maŋfal kɔkɔ ní a dūú pà.

²⁷Ŋma dù ŋŋmi kí ŋá u-bɔkutilookun an kaa fōō?

²⁸Ŋma còom̄ amɔsiŋkoon pu u-taal kaa wùn̄?

²⁹Míǹ ní an sá ki tīī un di yaa mɔ̄nnì u-juti nimpuuee. Un di yaa gbēē-uee, see ú fōō ditafadaaldi.

³⁰Baa wòoǹ unaayuu un yùn̄ kí jī kí kpɔ̀ ŋkùm u-poonee.

³¹Ama ní bi yaa cúú-uee, see ú téeǹ tin u yùn̄ee miluli pu, see ú kóoǹ tin kɔkɔ u cáá u-dumpuee kí dūú pà dipɔndi.

³²Uninja un di yaa ŋá tilaakpaal nì ubɔ nimpuuee kaa cáá diyil. Un di ŋáań mimmee bíiĺ u-ba ní.

³³U làá fōō tiweendi, bí kpèè-u fám ní u-cooi kpá kí kúntí jaanjaan.

³⁴Di sá yii ipoompoon làá yàntī unimpuee cal ń fōō mbum ní ŋwiin ŋun u làá dāá tɔ̀ ipɔntoonee, disaasɔl dāa kpá.

³⁵Tiba kaa bí bí tīī-u án sɔ̀ŋkì u-pɔbil. Báà a yaa tīī-u tiwampɔkaal tikpil, waa làá fōō.