Read Ntcham Proverbes 7 Bible Online

Proverbes 7 - Ntcham bible

Proverbes 7

¹M-biki, taa súntí m-nyɔɔbuŋŋi pu, kpāafì m-marab tiŋan.

²A yaa là kí nīn bí dimaŋfalinee, á nīn ŋúb́ m-marab nì tin m dàkā-see kii a nín ŋúb́ a-nimbibul puee.

³Taa yàntī an wantee ń ŋmátí a-ŋaan, dū-tì kí ŋá a-pɔbilin.

⁴Yàntī iciin ń nīn sá a-niisal, kí yàntī dinyil ń nīn sá a-bɔɔmɔnti.

⁵Tì làá fīī-si ubɔ nimpuu ŋaan, uninjamɔnnil un cáá nyɔɔmálmalee ŋaan.

⁶Dalba m nìn yú m-tɔkɔlau caŋin ní ki kpèé mmɔŋki.

⁷M nìn ká binaacimpɔmbi bin kaa nyí tibee, ní bi-kansikinee m dáań ki ká ubɔ, úǹ kaa pée cáá nlandɔkɔ báà fiii.

⁸U nìn bíi còom̄ didandi pu laakin uninjamɔnnil ubɔ kóòyee, ní u pāatì unimpuee dumpu saŋŋu.

⁹An nìn sá kujoou ní, ŋyunti ŋun ní kunyeeu bíi móotí an bíi bɔ̀ntēe.

¹⁰Niinee ní unimpuee nyánní ki túŋkì-u nsan, ki pēē kii kinimpulaakpaayee ki cáá biibii pɔbil.

¹¹U gbí kufuu kaa cáá icoo, ní u-mul kaa cōontí u-dumpu.

¹²An yaa sá adan pueeee, an yaa sá laakin binib kpáfí ki wīikéeyeeee, u pée nyàab̀ un làá mɔ̀nnì-uee ní.

¹³U tú unaacimpɔɔnee nsanee ní ki kpàl̄-u ní ki sòon̄ nì dilambil yii:

¹⁴«M nìn pōoǹ Unimbɔti yii m làá ŋá ijaam saraau kí tīī-u, ní m ŋá saraa gbanti díǹ nee.

¹⁵An pu ní m bàà nyáń kí nyàab̀-si ní ki dūu ká-si nee.

¹⁶M dū satakpaambi nì Eejipiti tiŋkin satamɔntiibi ki páaǹ m-dooŋu pu.

¹⁷M yāaǹ-ŋu nì miiri nì disaaweendi nì siinamoom talaalub.

¹⁸Dāan̄ tí cùú dòon̄ kí jī mmɔn áli kutaa nì ku-wuntil.

¹⁹Di sá yii m-cal kaa bí mmɔŋki, u búntì nsandandati ŋubɔ.

²⁰U gbéeǹ u-nimbifɔŋki animbil ní ki yōoǹ ki nín cá, waa làá fàtīí gítiń malaa.»

²¹U kíil̀ unaacimpɔɔnee míǹ ní úǹ dāa kíí, u yōoǹ nyɔɔmálmal ní ki ŋúń-u.

²²Ní u kùl̄ ki páaǹ u-boon dicilpu niin kii unaa ní bi dàtī ki cáǹ kí kpɔ̀ee, a lì kii uwaati ní bi bóob́ ki cáǹ kí tɔ̄ ditafadaaldinee,

²³áli mpiin ń dāá sāā kí kɔ́ u-pɔɔl. Kii kinɔmbiki nín ŋàaǹ malaa malaa pu kí cáá ki-ba kí tɔ̄ kulaaŋŋun puee, waa nyí yii u-maŋfal ní u làá dūú pà tin u bíi ŋáańee pu.

²⁴Kɔŋkɔnnee, m-biyaamu, pīlifìmaan-mi ní kí kpòon̄ ni-tafal tiŋan kí pīlifì anyɔɔbun ŋin nyēē m-nyɔkɔnee.

²⁵Ní taa yàntī an nimpuu juti ń ŋmàtiǹ-ni. Ní taa nóó u-sàmbiyaamu kí wāŋkì.

²⁶U tīī binib tikpil tiweendi ní ki kūū-bi, u kūū ki kpáaǹ bipɔɔbi gba.

²⁷U-dumpu di sá nsan ŋun cá bitaŋkpiibi kɔŋkooŋŋunee, ŋu sìntī ditaŋkpiilin ní cáaa.