Read Ntcham Proverbes 8 Bible Online

Proverbes 8 - Ntcham bible

Proverbes 8

¹Iciin bí ki tátí ki yíì, dinyil bí ki kūuntí ki yíì. Naa gbìl̀aaa?

²Ŋgbantamu mun bí didandi caŋinee, isampuyakati ní iciin yú.

³Kitiŋ punyɔkɔ caŋin, laakin binib dìŋfī ki kóòyee, iciin yú ki tátí mpɔn yii:

⁴«Nimbi binib ní m yíì. Nimbi binifoobi ní m lì.

⁵Nimbi bin kaa nyí tibee, ní bīfì kí nīn cáá nlandɔkɔmɔnti. Nimbi bin sá bigbaambee, bīfìmaan kí nīn cáá dinyil.

⁶Ní pīlifìmaan, tibɔti tin páb́ee ní m làá sòoǹ, deedee bɔti di làá nyānní m-nyɔkɔn.

⁷Kun puee m-nyɔkɔ sòoǹ ibaamɔn ní, m-nyɔkɔ ń sòoǹ tibɔkpitilee, m kòó.

⁸Deedee bɔti ŋma ní man pée sòoǹ, maa sòoǹ tinyimɔmbɔti àá biibii bɔti.

⁹Tì sá ibaamɔn bɔti uciŋfiti cee, ní ki sá deedee bɔti unyil cee.

¹⁰Ní fōō tin man dàkèe kí yàntī animbil kúti, kí fōō dinyil kí yàntī sindaariyamɔnti.

¹¹Man Iciin pɔ̄ɔ̄ kudaau ki jítiǹ abeedimbil kpataaa. Tin ni bìǹ ki nyàab̀ee, tiba kaa bàn̄-mi.»

¹²«Man di sá Iciin, m baasii wálifì ní. M ŋáań tikɔkɔ nì nlandɔkɔ ní.

¹³Kí fàŋkì ti-Dindaanee, a ná ikpiti dee. Man ná dibadakal nì dilambil nì atuŋkpiti nì inyimɔn.

¹⁴Man tundi di sá ḿ nīn sáŋkí binib kí nīn kpáafí-bi. Man di baasii sá dinyil. Man di yì mpɔn.

¹⁵Man pu ní bibɔtiibi jīǹ dibeel, ní biyidambi yōontí bimarabaamɔmbi.

¹⁶Man pu ní bibɔtiibi ŋúb́ bi-timmu, bi nì abɔtibil nì bibɔsoonliibi kɔkɔ.

¹⁷Man néeń bin néeń-mee ní. Bin yaa nyàab̀-mee kāntí-mi ní.

¹⁸Man di tìì tigaajati nì tinyool, nì tigaajawan tin yúntée nì dibútil.

¹⁹Tiwan tin m pūǹee ŋān̄ ki jítiǹ sindaariyamɔmmɔnti, tin m tììyee jítiǹ animbil kúti timɔntiil.

²⁰M còom̄ deedee saŋŋu pu ní, ibaamɔn sàmbiyaamu pu ní m còom̄.

²¹M tìì bin néeń-mee tigaajati, ki gbēentí bi-dumpui tigaajawammɔntiil.

²²Ti-Dindaan péé péé ki náań-mi ki wāatì ní ki nín náań tin kɔkɔ kíǹee.

²³M nìn pée bí doooo jaanjaan, ki wāatì ní duulinya nín kíĺ kí nīn bí.

²⁴Bi nín màl̄-mee, tiŋkub kaa nìn bí, inyimbul in jàkà nnyimee kaa nìn bí.

²⁵Kí wàatī ajoon ń nyā kí nīn bée, kí wàatī ŋgbantamu ń nīn bée, man nìn pée bí ní.

²⁶Ti-Dindaan kaa nìn dá láá náań kitiŋ nì ipaan. Waa nìn dá láá náań duulinya tampeepeekaam.

²⁷M nìn bí ŋyunti ŋun u nìn dū kutagbɔŋu ki báaǹee, ŋyunti ŋun u nìn lūtì nloon ki māntìi tú tiŋkuee.

²⁸M nìn bí ŋyunti ŋun u nìn kpátì atagban ki bīiǹ kutaa puee, nì ŋyunti ŋun tiŋku nyimbulii nìn tòoń nì mpɔnee.

²⁹U nìn yóoǹ tiŋku kikpaanyɔkɔ kin nnyim kaa máaǹ kí gbí kí lákatée. U nìn bíl̀ dinyeel din pu kitiŋ làá nīn tɔ́kɔ́ee.

³⁰Ŋyunti gbantee, m nìn bí u-cee kii utammakpilee. Kutaa kamaayee m-bɔti nìn mɔ̄ǹ-u, ní ŋyunti kamaa m nìn fàal̀ u-nimbiin.

³¹M nìn fàal̀ kitiŋ kin u náańee pu, ní an nìn mɔ̄ǹ-mi ḿ nīn bí binib kansikin.»

³²«Kɔŋkɔnnee, m-biyaamu, pīlifìmaan-mi, bin fōō m-saŋkiiyee bí mmɔnneeee!

³³Ní pīlifìmaan tibɔti tin m dàkà-nee kí kpántí biciŋfitiibi, ní taa dū-tì kí fá.

³⁴Unil un pílifí m-bɔti, ki pée bí m-punyɔkɔpu baabadal, ki cí m-diiku punyɔkɔki nyɔkɔpuee bí mmɔnneeee!

³⁵Di sá yii un yaa ká-mee ká dimaŋfal, ní ti-Dindaan dàkà udaan u-ŋanti.

³⁶Ama unil un yaa kaa ká-mee tìì u-ba ní tiweendi. Bin kɔkɔ ná-mee néeń ŋkúm ní.»