Read Ntcham Ecclésiaste 1 Bible Online

Ecclésiaste 1 - Ntcham bible

Ecclésiaste 1

¹Daafiidi jipɔɔn Uciŋfiti un sá ubɔti Jeerusaleem tiŋkinee nyɔɔbuŋŋi sèé.

²Uciŋfiti di lī yii: Kubuŋu fám, kubuŋu fám, tikɔkɔ pée sá kii kubuŋuee ní.

³Nisaal bìǹ kitiŋ pu doo, ama ipaati ilai ní u cáá?

⁴Biba kúù ní bi màal̀ biba, ama ní kitiŋ kíǹ pée bí ki-laŋki.

⁵Ŋwìiń nyēē, ŋwìiń jēetí, ní kí ŋá malaa kí fàtīí gítí ŋu-nyalaŋki.

⁶Kubuŋu jītí kí cù ŋgan pú, ní kí màntī ki gítí ŋgiil pú. Ku màntī ní kí màntī ní kí fàtīí màntī, ní kí fàtīí gítí laakin ku kílińee.

⁷Ibun kɔkɔ pùub̀ ki kóò tiŋku poon, ama tiŋku kaa pée gbéè dalba dalba. Laakin ní ibun pùub̀ ki kóòyee, niin ní i gbíntìi pùub̀ ki kóò kaa gbèentí.

⁸Anyɔɔbun kɔkɔ sátì an kaa cáá bí lì. An kaa cáá yii ditafal pílifì tibɔti ki bál̀, ní dinimbil mun kaa kpèé kí núutí.

⁹Tin nìn pée bée di làá nīn pée bí. Tin bi nìn pée ŋée ní bi làá fàtīí ŋá. Tiba kaa bí ki sá tipɔn kitiŋ pu doo.

¹⁰Ti kāntí tiwan tibee ní kí lì yii: «Kpèè, tiwan nee sá tiwampɔn ní!» Ama an wantee nìn pée bí dooooyee ki wāatì ní timbi nín nyáń.

¹¹Timbee, ti súntí tin nìn jítì doooodooooyee pu. Bin mun làá dāá páannée làá dāá súntí tin làá dāá jītí timbi boonee pu.

¹²Man Uciŋfiti jíń Isirayeel nibul pu dibeel Jeerusaleem tiŋkin.

¹³M dū m-ciiŋyi kɔkɔ kí béé tin kɔkɔ bíi jītí kitiŋ puee kí gbìl̄ ti-taapu. An sá digìŋ́kpaandi ní Unimbɔti dūu túǹ nisaalib.

¹⁴M ká tin kɔkɔ ní binib ŋáań kitiŋ pu dooyee. Ama tíǹ kɔkɔ sá fám ní, an bí kii unil nín jì kubuŋu puee ní.

¹⁵Tiwan tin pɔ́ĺee, baa ŋūǹ kí tàntī-tì. Tin kaa bée, baa ŋūǹ kí kàaǹ-tì.

¹⁶M lī m-ban yii: «M béè iciin ki yāntì i cūtì nyɔkɔpu ki jítiǹ bibɔtiibi bin kɔkɔ péeǹ-mi ki kāl̀ dibeel Jeerusaleem tiŋkinee.» M béè iciin tikpilku, ki ká dinyil tiŋan pu.

¹⁷M bífì ki béè tin di sá iciinee nì tin kaa sée, tin sá dinyil nì tin sá digbaandee. M dáań ki ká yii tíǹ kɔkɔ sá kii unil nín jì kubuŋu puee ní.

¹⁸Iciin tikpil cāabìń agìń tikpil mun ní, míǹ ní dinyil tikpil mun cāabìń diwumpildi.