Read Ntcham Ecclésiaste 10 Bible Online

Ecclésiaste 10 - Ntcham bible

Ecclésiaste 10

¹Isii yaa jéetì talaalu kpam poonee, i yàntī mí nūukì ní kí bīil̀. Míǹ ní digbaandi fiii bíiĺ iciin nì tinyool.

²Uciŋfiti dàkafī tiŋan ní, ama ugbaan úǹ kaa gbìl̀ tibɔti taapu.

³Ugbaan yaa bíi còom̄ didandi puee, kii nlandɔkɔmɔnti nín kaa bí u-yilin puee, un kamaa yaa ká-uee béetí yii u sá ugbaan ní.

⁴A-kpiliu yaa gíí a-pu diŋuulee, taa dū a-tundi kí fá. A yaa cúú a-ba, an yàntī á taa kɔ́ diyintikpaandi poon.

⁵Ubɔti mun ŋūǹ kí yìntī. Míǹ ní m dáań ki ká dimuuldi kitiŋ nee pu.

⁶Ŋyunti ŋubɔee, bi dù ugbaan ní kí kàan̄ mpaaŋkpaan pu, ní kí dū ntuŋwaamu kí ŋúbíǹ biniŋmambi.

⁷M ká iyumbu kā itaamu pu ama ní binikpaambi còom̄ ataa pu fám kii iyumbuee.

⁸Unil yaa bíi gbì mbòóyee, u ŋūǹ kí dāá jēetí ŋu-poon, ukoobu ŋūǹ kí jú un bíi wìil̄ digundee[19].

⁹Unil yaa bíi kpìkitī ataŋkpeeyee, ŋi ŋūǹ kí tīī-u tiweendi, míǹ ní un bíi látí idɔee, an ŋūǹ ki cáań-u in bí iwa.

¹⁰Kicɔkɔ yaa gbītì ní baa lōoǹ-kì, ní a cáa bíi tūǹ ditundee, asee á mɔ̀tīí dàkà dikpabil ní kí ŋmā kí dūú gāā tiba. Di sá yii iciin di yàntī tin unil bíi ŋáańee ń nyā nnyim.

¹¹Un cáá nnyɔkɔ ki cútí ikoobuee yaa yāntì ukoobu péé-u dijulee, u páatì u-nyɔkɔŋuee pu ba?

¹²Uciŋfiti yaa sòoǹee, an mɔ̄ dipilifil ní. Ama ugbaan nyɔɔbuŋŋi yàntī u wáŋkí ní.

¹³U kífí kí sòoǹ tigbaambɔti ní kí dāá kúntíǹ tinifambɔti tin kaa cáá taapuee.

¹⁴Ugbaan di sòoǹ ki sòoǹ kaa ŋmīlifí. Ama unil úǹ kaa nyí tin bí ki dòońee. Ŋma ŋūǹ kí tùkù u-juti tin bí ki dòoń udaan kpátam boonee?

¹⁵Ugbaan di gì digìńdi fám. Waa kpáàa nyí gba u nín làá túĺ pu kí cù kitiŋinee.

¹⁶Mbusu dɔ̄ ki cí kitiŋ kin bɔtiu sá campɔnti ní ki-kàliŋkpilib nyēē ki jīǹ jiŋaalib baabadalee!

¹⁷Án nīn mɔ̄ǹ kitiŋ kin bɔtiu nyánní dibeecindin àá akpambal dicaŋkunee, ki-kàliŋkpilib jīǹ bi-jinti ŋyunti ŋun ní an máaǹ bí jēe ní. Bi jīǹ kí ká mpɔn ní, kaa sá kí nyɔ̀ kí gbí.

¹⁸Uwutijoodaan diiku bɔ̀b̀ ní. Unil un kpàl̄ iŋal kaa tūǹ dibee, utaa nì u-diikun ní.

¹⁹Bigaajab jīǹ jiŋaal kí kɔ̀ntī bi-nimbiliŋ ní. Ndaam tìì-bi mmɔn, ní animbil yàntī bí ká tin kɔkɔ bí lèe.

²⁰Á taa tɔ̄ ubɔti mbusu, báà a-pɔbilin. Á taa kpákáǹ binikpaambi, báà a-didooŋkaakun. Unoon ŋūǹ kí yòon̄ tin a sòon̄ee, kí dū tin a lēe kí māafì.