Read Ntcham Ecclésiaste 11 Bible Online

Ecclésiaste 11 - Ntcham bible

Ecclésiaste 11

¹Dū a-kpɔnɔu kí tɔ̄ nnyimin, di sá yii a làá dāá fàtīí ká-u iwiin iba boon.

²Dū a-gaajati kí yóoń binib biluli kii binii cee, di sá yii aa nyí mbusu un di ŋūǹ kí dāá bàń kitiŋ puee.

³Atagban yaa nyùn̄ nnyim ki díkée ní utaa ń kíĺ kí nīn bíi nì. Busubu ŋūǹ kí lítí ŋgiil pú àá ŋgan pú. Báà laakin ní bu yaa lítèe, niin ní bu làá nīn dɔ̄.

⁴Ukpaal un fàŋkí kubuŋuee kaa kù kí bɔ̄l̀. Un fàŋkí utaayee kaa dāa kāntí kí cā.

⁵Aa ŋūǹ kí béé an nín ŋáań pu ní kibiki ń náań ki-na poonee, kaa tí nyí laakin kufoou nyēeńee. Míǹ mbaantiim ní aa làá ŋmā kí gbìl̄ Unimbɔti nín tūǹ u-tundi puee taapu, úǹ un náań tikɔkɔee.

⁶An puee á kíĺ kutaafaau kí kpɔ̀ kí bɔ̄l̀ a-wamboolii kí tɔ̄ ditundi kí jóotí-ku. Di sá yii aa nyí a-tuuŋŋi kansikin din làá bútí-see. An yaa yíì a ŋūǹ kí páatí a-tuuŋŋi kɔkɔ pu.

⁷Ŋwalifi mɔ̄ dikpeel, ní an ŋān̄ unil ń nīn bí dimaŋfalin.

⁸Unil yaa kāl̀ kitiŋ pu ki yúntèe, u máaǹ kí jī abin gbanti kɔkɔ pu. Tí téetí tin bí nee pu: dinimbinaamandi wiiŋyi di làá nīn wīikí, ní tin kɔkɔ dòońee sá kii kubuŋuee.

⁹Unaacimpɔɔn, jī a-naacimpɔnti kí nīn bí mmɔnni ŋyunti gbanti poon. Pée ŋá tin a lèe nì tin fáatiǹ-see. Ama á nīn nyí ŋwindal Unimbɔti làá dāá sòoǹ a-bɔti ki nóó nì tin kɔkɔ a ŋée.

¹⁰Gɔ́ntí tin kamaa ŋūǹ kí yàntī á kɔ́ kunimbaaunee, kí kàkatī tin kɔkɔ pée ŋūǹ kí cáań-si igbaŋweenee. Di sá yii tinaacimpɔn nì tiyikpibɔn yuntiŋu jītí malaa ní[20].