Read Ntcham Ecclésiaste 2 Bible Online

Ecclésiaste 2 - Ntcham bible

Ecclésiaste 2

¹M lī m-ban yii: «Toooo! M làá jī mmɔn kí jī nnaam.» Ama m ká yii niin mun sá fám ní.

²Mmɔn sá digbaandi, ní ifaal mun kaa bí tiban.

³M lēē m-pɔbil poon yii m làá nīn kíǹ ki nyù ndaam kí nīn ŋáań kii bigbaambi nín ŋáań puee, kí nīn gbíntìi yì m-ba. M nìn là kí ká kun unil ŋūǹ kí ŋá án nīn sá tiŋan u-maŋfal wiiŋyi poon duulinya nee poonee ní.

⁴M túń atuŋkpaan tikpil, ki máń m-ba adiin, ki kùn̄ fiinyi sufii kpaaŋŋi.

⁵M kùn̄ poojab nì isufi kpaaŋŋi ki cóoǹ isufi in lòoǹ abilee kɔkɔ nì i-bulifi.

⁶M gbìn̄ anyimbɔbil bí nīn lúù nnyim ki yàantí isufi in ní m cóoǹ cóoǹee.

⁷M dá iyumbu bininjab nì binimpoobi, ki cáá bitɔntɔnliibi tikpil. M cáá inaa nì ipii nì iŋoobu ki jítiǹ bibɔtiibi bin nìn péeǹ-mi ki kāl̀ dibeel Jeerusaleem tiŋkinee kɔkɔ.

⁸M nìn kóoǹ ntimu mun kɔkɔ bí m-taapuee nì mu-bɔtiibi gaajati nì bi-nimbiliŋ kúti nì bi-sindaariyab ki kpúkuǹ m-cee. Bilaŋgaaliibi bininjab nì binimpoobi nìn dòoń ki gà ilan ki kɔ̀ntī m-nimbiliŋ. M nìn cáá kun unifoo kamaa pée lèe, an dàkà yii kunimpupaau.

⁹M kpántì unikpaan ki jítiǹ bibɔtiibi binib bin kɔkɔ kāl̀ Jeerusaleem tiŋkinee[1]. Ama nì míǹ kɔkɔee, m-ciiŋyi dáá gbíntìi bí m-cee.

¹⁰Kun kamaa ní m-nimbil yaa wál̀ ní ku fáatiǹ-mee, maa nìn yíití kudɔŋu. Maa ŋmīntì m-pɔbil mmɔn báà ŋubɔ. Tiŋman, m jíń m-tuuŋŋi paati ní ki páatì m nín gīī ki túń ditundi diŋyee kɔkɔ pu.

¹¹M kāl̀ ki kpēē atuun ŋin m túńee kɔkɔ nì digìńdi din m gīī ní ki túń an tuuŋŋee. M dáań ki ká yii tíǹ gbanti kɔkɔ mun sá kii kubuŋuee ní[2].

¹²M nyàab̄ kí gbìl̄ iciin nì kuwaatiiu nì digbaandi taapu. M bālifì m-ba yii unil un làá dāá kàl̄ dibeel m-boonee làá dāá ŋá kii bin līntiǹ-ueeee?

¹³Mama m-ba dáań ki ká yii iciin sɔ́ǹ digbaandi, kii ŋwalifi nín sɔ́ǹ dibɔmbɔndi puee ní.

¹⁴Di sá yii uciŋfiti wāĺ laakin u còom̄ ki cée, ama ní ugbaan úǹ pée bí ki tìliŋkī dibɔmbɔndin ní ki cá, kaa wāĺ. Ama m nyí mun yii bi-liitil làá dāá pée kúntí mbaantiim ní.

¹⁵Niinee ní m lī m-pɔbil poon yii: «Tin dɔ̄ ki cí ugbaanee di dɔ̄ ki cí ma mun. Mimmee m nín sá uciŋfiti ki jítiǹ-u nee, m páatì ba? M lī m-ban yii tíǹ kɔkɔ mun sá kubuŋu ní.»

¹⁶Baa téetí uciŋfiti àá ugbaan pu kí nīn cá jaanjaan. Ugbaan kúù ní uciŋfiti mun kúù, ama iwiŋkaaŋkaa boonee binib súntì uciŋfiti puɔɔɔ, ki súntì ugbaan mun pu. Ba pu ní an bí míǹ ní?

¹⁷Niin ní m-naŋki nyáń nì dimaŋfal din poon ti bí nee, kun puee m ká yii tin binib ŋáań kitiŋ pu dooyee kaa fáatiǹ-mi. Di sá yii tíǹ gbanti kɔkɔ kaa bí tiban, an bí kii unil nín jì kubuŋu puee ní.

¹⁸M ná ditundi din m gīī digìńdi ki túń kitiŋ pu dooyee kɔkɔ. Di sá yii un làá dāá fōō m-yil m-kpátam boonee di làá dāá jī tin kɔkɔ ní m ŋá ki yóoǹee.

¹⁹Udaan yaa làá dāá nīn sá uciŋfiti àá ugbaanaaa, ubɔ kaa nyí. Ama úǹ di làá dāá jī tiwan tin kɔkɔ ní m gīī digìńdi ki dàkā iciin ki ká kitiŋ pu dooyee. Niin mun sá kii unil nín jì kubuŋu puee ní.

²⁰M nín ká digìńdi din m gīī kitiŋ pu dooyee, ní m-wunti yɔ̄tì.

²¹Á kpèè yii unil ń dū iciin nì dinyil kí tɔ̄ ditundi ní án bútí-u tiŋan, kí dāá dū tin kɔkɔ u gīī digìńdi ki ká gbantee kí tīī ubɔ un kaa pée ŋá tibee. Niin gbanti mun sá kii kubuŋuee ní, ki wù tikpil.

²²Di sá yii unil nín tūǹ ditundi kí gbá kí gīī kitiŋ nee puee, ba ní u páatí ní?

²³Tiŋman, unil maŋfal wiiŋyi kɔkɔ poonee, u pɔ̄ɔntí kí jī falaa kí tɔ̄ ditundi. Kunyeeu gbee, waa ŋūǹ kí ŋùŋfì[3]. Niin mun sá kubuŋu fám ní.

²⁴Kun pée sá binifoobi naamee di sá bí jī kí nyɔ̀ ní kí fàal̀ digìńdi din bi gīīyee pu. M dáań ki ká yii Unimbɔti di tīī nnaam gbanti.

²⁵Di sá yii ŋma di ŋūǹ kí jī kí nīn bí mmɔnni an yaa kaa nyánní Unimbɔti cee.

²⁶Unil un bɔti fáatì Unimbɔtee, udaan ní u tìì iciin nì dinyil nì dipɔɔpindi. Ama unil un ŋáań ikpitee, u yàntī u kōontí tigaajawan ki kpáafí un fáatiǹ-uee ní[4]. An mun kaa cáá taapu ní ki bí kii unil nín jì kubuŋu puee.