Read Ntcham Ecclésiaste 3 Bible Online

Ecclésiaste 3 - Ntcham bible

Ecclésiaste 3

¹Kitiŋ nee puee, tiwan kamaa cáá ti-yuntiŋu, ní ŋyunti kamaa cáá ti-wanti.

²Ŋyunti bí bí màal̀ unil ní ŋyunti bí ú kpú, ŋyunti bí bí cóoń busubu, ní ŋyunti bí bí fùkù-bu.

³Ŋyunti bí bí kpɔ̀ ní ŋyunti bí bí cáaǹ, ŋyunti bí bí nàan̄ ní ŋyunti bí bí mā.

⁴Ŋyunti bí bí sɔ̄ ní ŋyunti bí bí lā, ŋyunti bí bí yāliŋkì ní ŋyunti bí bí ŋɔ̄.

⁵Ŋyunti bí bí tɔ̄ ataŋkpee ní ŋyunti bí bí tòò-ŋi, ŋyunti bí bí kpàl̄ tɔb, ní ŋyunti bí bí kpàtī.

⁶Ŋyunti bí bí nyàab̀ ní ŋyunti bí bí fá.

⁷Ŋyunti bí bí cátí ní ŋyunti bí bí ŋáĺ, ŋyunti bí bí nīn ŋmí ní ŋyunti bí bí nīn sòoǹ.

⁸Ŋyunti bí bí nīn néeń ní ŋyunti bí bí nīn ná. Kujaau yuntiŋu bí ní ŋgbansɔŋfi yuntiŋu bí.

⁹Ba paatii ní un tūǹ ditundee kāntí u-tundi gìńdi poon?

¹⁰M kpēē atuun ŋin ní Unimbɔti dūu túǹ unil puee.

¹¹Unimbɔti yàntī tikɔkɔ bàń ti-yuntiŋu ní. U gíti tí tīī binifoobi nlandɔkɔ bí béé tin jítèe nì tin bí ki dòońee. Nì míǹ kɔkɔee, baa ŋūǹ kí béé tin kɔkɔ Unimbɔti ŋée.

¹²M nyí mun yii nnaam min pée bí ki tīī-bee di sá bí jī mmɔn bi-maŋfal wiiŋyi poon kí fàal̀.

¹³Unil yaa ká kí jī, kí nyɔ̀ ní ki bíi jīǹ u-tundi puee, an sá Unimbɔti pɔl ní.

¹⁴M nyí mun yii tin kɔkɔ ní Unimbɔti ŋáańee làá nīn pée bí kí nīn cá jaanjaan, tiba kaa kútí tin u ŋée puɔɔɔ, tiba kaa bàtī mun. Unimbɔti ŋáań míǹ yii unil ń nīn fàŋkí-u ní[5].

¹⁵Tibɔti tin bíi jītí kɔŋkɔnnee nìn pée jítì dooooyee. Tin bí ki làá jītí fool boonee mun nìn pée jítì dooooyee ní. Unimbɔti yàntī tin kɔkɔ pée jītée fàtīi kífí mpɔm ní.

¹⁶Kpèè tin m gíti dáań ki ká kitiŋ pu dooyee: laakin marab bàà máaǹ kí tɔ̄ ditundee, tin kaa bí deedeeyee di bí, laakin ibaamɔn bàà máaǹ kí nīn bée, tin kaa bí deedeeyee di bí niin.

¹⁷Niinee ní m lī m-ban yii Unimbɔti làá sòoǹ deedeedaan nì unikpiti bɔti. Di sá yii tiwan kɔkɔ cáá ti-yuntiŋu, ní u làá sòoǹ ti-tuuŋŋi kɔkɔ bɔti.

¹⁸M lī m-pɔbilin binifoobi pu yii: Unimbɔti là kí ká bi nín cáá kudapɔɔu kuŋyee ní kí dàkà-bi yii bi bí kii tiwaŋkutee ní.

¹⁹Di sá yii unil nín kúntíǹ puee, míǹ mbaantiim ní kuwaŋkuluu mun kúntíǹ. Unil kúù ní kuwaŋkuluu mun kúù. Bi-kɔkɔ pée cáá kufoobaantiiuee ní. Unil kaa jítiǹ kuwaŋkuluu, kun puee tikɔkɔ pée sá kii kubuŋuee ní[6].

²⁰Tin kɔkɔ pée cáá kufoouee nín kúntíǹ puee dee. Kufoou kamaa nyánní ntamin ní ki làá fàtīí gítí ntamin[7].

²¹Ubɔ kaa ŋūǹ kí lì yii unil fooku kúǹ jɔ́ḿ yilpu yilpu, ama ní kuwaŋkuluu kúǹ yɔkɔ sìntī kitiŋ taapu taapu.

²²An pu ní man ká yii tin pée ŋān̄ ki tīī unilee di sá ú jī u-tuuŋŋi ŋin u túńee pu, kun puee u paatii dee. Di sá yii ubɔ kaa ti làá gíiǹní-u ú ká u-kpátam nín làá dāá nīn bí puee.