Read Ntcham Ecclésiaste 4 Bible Online

Ecclésiaste 4 - Ntcham bible

Ecclésiaste 4

¹M gíti dáań ki ká mun yii diwɔ́bil bí kitiŋ pu doo tikpil. Bin bi wɔ́b̀ee bí ki gbòoǹ pɔ̀ɔɔɔ, ama ní báà ubɔ kaa bí kí ŋméeǹ-bi. Mpɔn kā bin sàantí-bee ŋaan, ní ubɔ kaa bí kí ŋméeǹ-bi.

²Niinee m ká yii bin kpíìyee bí mmɔnni ki jítiǹ binifoobi.

³Ama un baa láá màl̄ee úǹ gíti bí mmɔnni ki jítiǹ bitaŋkpiibi nì binifoobi. Di sá yii úǹ kaa ká atuŋkpiti ŋin bi tūǹ kitiŋ nee puee[8].

⁴M ká mun yii unil gì ki là án bútí-u u-tuuŋŋi poon, kun puee u là kí jītíǹ u-juti ní. An mun kaa cáá taapu, an bí kii unil nín jì kubuŋu puee ní.

⁵Ugbaan di kā ki kpàl̄ iŋal ní ŋkùm ń kpɔ̀-u.

⁶Ama unil ń ká diŋuŋfil fiii sɔ́ ki jítiǹ á tɔ̄ ditundi din di sá kii bi nín jì kubuŋu puee kí gīī kí tin kpáàa lákatí a-ba puee.

⁷M gíti dáań ki ká yii tibɔti tiba bí kitiŋ pu doo ki sá kii unil nín jì kubuŋu puee:

⁸Unil di bí u-baba nì u-baba, kaa cáá ubɔɔtaaa, kaa cáá kibikaaa, kaa cáá kinabiki mun. An niliuee tūǹ ditundi kaa gbèentí kí mɔ̀tīí ká tigaajati. Ama ní u bàlifī u-ba yii: «Ŋma ní m tūǹ ditundi ki tìì ní? Ŋma pu ní m ŋmìntī m-ba mmɔn ní?» An mun bí kii unil nín jì kubuŋu puee ní. An sá dituŋfandi ní.

⁹An sɔ́ binib ń nīn bí bili ki jítiǹ unil ń nīn bí u-baba, kun puee binib bili tundi nyēē nnyim ki jítiǹ unibaanti.

¹⁰Di sá yii bi-kansikin ubɔ yaa lítèe, un kíǹee làá yòon̄-u. Ama unil un bí u-babee bɔti gbí isaa, kun puee úǹ yaa lítèe, ubɔ kaa bí kí yòon̄-u.

¹¹Míǹ mbaantiim, binib bili yaa kpáfì ki dɔ̄ee, an tùm̀ bi-pu ní, ama unil yaa dɔ̄ u-babee, u làá ŋá mana ní án nīn tùm̀ u-pu?

¹²Bi ŋūǹ kí já kí pɔ̄ɔkiǹ unibaanti sɔkɔmii, ama an yaa sá binib bilee, an pɔ̄ɔ̄. Dipal din bi dū iŋmii ita ki pàal̄ee kaa tìfī sɔkɔmii.

¹³Campɔnti un sá usoodaan ki cáá iciinee sɔ́ǹ ubɔtigbaan un púĺ kaa ti kíikí bí sāŋkì-uee.

¹⁴Báà campɔnti gbanti yaa nyánní sarkan ki kpántì ubɔti àá u yaa mèé u-beelin ki kāntí ki jīǹ,

¹⁵m ká yii kitiŋ nee puee, binib kɔkɔ làá nīn bí campɔnti gbanti jaaŋŋu pú ní ú dāá fōō ubɔtikpikee yil kí kàl̄ dibeel.

¹⁶U làá kpántí dinibukpaandi bɔtiu ní. Ama bin làá dāá páań u-boonee kaa dāa gíti bí dipɔɔpindin u-pu. Di sá yii tíǹ gbanti kɔkɔ sá fám ní ki bí kii bi nín jì kubuŋu puee.

¹⁷A yaa cá Unimbɔti diikunee, á nīn nyí nì a-ba. Á nīn cáá nlandɔkɔ yii a cá niin kí pīlifì ní. Míǹ sɔ́ǹ á cù niin kí ŋá bigbaambi saraau. Di sá yii bíǹ kaa nyí yii bi bíi ŋáań tin kaa ŋān̄ee[9].