Read Ntcham Ecclésiaste 5 Bible Online

Ecclésiaste 5 - Ntcham bible

Ecclésiaste 5

¹Á dàkafì tiŋan kí wàatī kí nín sòoǹ, kí taa jìkì kí pòon̄ Unimbɔti ipoon. Di sá yii Unimbɔti bí yilpu ní sii bí kitiŋ pu. An puee á taa nín̄ sòoǹ tikpil.

²Unil yaa dàkafī tikpilee, u dámintí tidamintiil ní, ní un sòoǹ tikpilee sòoǹ tibɔfan[10].

³A yaa pōoǹ Unimbɔti ipoonee, taa tàan̄ kí ŋá tin a pōoǹ-uee. Di sá yii Unimbɔti kaa gèetíǹ bin ŋáań tibɔti kaa dàkafēe. An puee a yaa pōoǹ-u puee, á ŋá míǹ.

⁴An sɔ́ á taa pōoǹ Unimbɔti ipoon ki jítiǹ á pòon̄-u ní kí taa ŋmā kí ŋá tin a pōoǹee.

⁵Taa yàntī a-nyɔkɔ ń ŋmátí-si á ŋá ikpiti ki dāa gíti cá ki tùkù usaraaŋal yii: «M sòon̄ ki yīntì ní.» An yaa sá fám, Unimbɔti làá gíí a-pu diŋuul tin a sòon̄ee pu, ní kí nàan̄ a-tuuŋŋi kɔkɔ.

⁶Unil yaa dámintí tikpilee, u sòoǹ tikpil ní an kaa cáá taapu. Míǹ puee fàŋkì Unimbɔti.

⁷A yaa ká kitiŋ kiban bi bí ki wɔ́b̀ unandaan, kaa nóó marab nì ibaamɔn saŋŋuee, án taa ŋá-si bitii. Di sá yii ukàlinjakpaan ubɔ yaa bí yilpuee, ukpil ubɔ di bí ki wúń u-pu, ní bi-liitil cáá bikpikpaambi bin mun wúń bi mun puee.

⁸Ama kitiŋ kíǹ kèetī báà ŋma ní. Tikpaal kèetī ki kpáaǹ ubɔti.

⁹Unil un néeń animbilee kaa díkì animbil, míǹ ní un néeń tigaajatee, tin u cááyee kaa fáatiǹ-u. Tinee mun sá kii bi nín jì kubuŋu puee ní.

¹⁰Unil yaa cáá tigaajati tikpilee, binib bin jīǹ-tèe mun wīikí ní. Mimmee ipaati ilai ní udaan cáá, an yaa kaa sá ú nīn cáa kɔ̀ntī u-nimbiliŋ?

¹¹Utɔntɔnli yaa cáá tikpil kí jāaa, u yaa cáá fiii kí jāaa, u gèeǹ mmɔntiim ní. Ama ugaaja úǹ kaa ŋūǹ kí gèeǹ, kun puee u cáá tigaajawan tikpil.

¹²M dáań ki ká dinimbinaamandi bɔti tiba kitiŋ pu doo. Kijapaai kiba di kpáafì tigaajati ki yóoǹ, ní tigaajatee dāa cáań-u nnaabu.

¹³U dū tigaajatee ki túń ditundi diba ní ki lítì. U dāa màl̄ kibininjabikee, waa ti cáá báà tiba nì tiba.

¹⁴Kii u nín nyánní u-na poon dicancaŋgbeel puee, míǹ ní u làá fàtīí gítí. Waa pée páatì u-tundi pu, kaa làá ŋmā kí kpáaǹ báà tiba.

¹⁵An sá nnaabukpaan ní ki tīī-u. U làá yīkì kitiŋ nee pu kii u nín dɔ́miń puee. U túń ditundi ki tīī kubuŋu dee[11].

¹⁶Kí kūtèe, u-maŋfal wiiŋyi poonee, u ká agìń tikpil nì kunimbaau nì diŋuul nì diwuŋyɔtil.

¹⁷An puee man nín dàkafī puee di sá yii tin ŋān̄ ki tīī unilee di sá ú jī, kí nyɔ̀ ní kí jī u-tundi pu u-maŋfal wiiŋyi in Unimbɔti tīī-uee. Unil gìńdi paatii dee.

¹⁸Unimbɔti yaa pú unil diyimɔɔl ú nīn cáá animbil nì tigaajawanee, ú jī tin Unimbɔti tīī-uee pu, an dàkà yii u-tundi paati. Unimbɔti di pú-u.

¹⁹Niinee ní ú súntí yii u-maŋfal wiiŋyi kaa náaǹ, kun puee Unimbɔti tīī-u dipɔɔpindi.