Read Ntcham Ecclésiaste 6 Bible Online

Ecclésiaste 6 - Ntcham bible

Ecclésiaste 6

¹M gíti tí dáań ki ká nnaabu ŋubɔ mun kitiŋ pu doo, an sá nnaabukpaan ní ki tīī unil.

²Unil di bí ní Unimbɔti tīī-u tigaajati nì tigaajawan nì tinyool. Tin kɔkɔ pée kā unil gbanti naŋki puee, u cáá-tì. Ama ní Unimbɔti kaa pú-u ú jī an wantee pu, ní unifantanti ubɔ ń dāá jī-tì. Tíǹ gbanti mun sá kii unil nín jì kubuŋu puee ní, ki sá falaakpaan.

³Unil ŋūǹ kí màal̀ mbiyaamu dilaataal, kí kàl̄ kitiŋ pu kí yúntí. U nín kāl̀ ki yúntì mimmee, u yaa kaa jíń nnaam ní baa kpáàa síb́-u mmɔntiimee, u páatì ba? Man ká yii kibiki kin bi màl̄ kaa yōoǹee sɔ́ǹ udaan.

⁴Di sá yii kíǹ dɔ́miń fám ní, ki fātìi gítì dibɔmbɔndin ní dibɔmbɔndi bīiǹ ki-yindi pu.

⁵Kí kūtèe, kàa pée ká ŋwìiń gba ní kaa nín béè-ŋu. An puee kíǹ cáá diŋuŋfil ki jítiǹ un kāl̀ ki yúntì kitiŋ pu doo fámee.

⁶Báà udaan yaa kāl̀ kitiŋ pu doo abin kutukub bili, ama ní kaa jíń mmɔnee, u páatì ba? Di sá yii kufoou kamaa làá kúntíǹ ŋkúm ní.

⁷Unil tūǹ ditundi u-pool pu ní, ama ní kaa díkì dalba dalba.

⁸Kin ba ní uciŋfiti cáá ki jítiǹ ugbaan? Unandaan un còom̄ disaŋkimmɔntiil binifoobi kansikinee úǹ páatì ba?

⁹Tiwan tin a cáá a-nimbil wāĺee sɔ́ǹ tin a là kí nīn cááyee. Niin mun pée sá fám ní, a lì kii unil nín jì kubuŋu puee.

¹⁰Tin kɔkɔ pée bée, bi nìn pée nyí-tì dooooyee ní, ní ti nyí kun unil sée. Waa ŋūǹ kí yíiń un pɔ̄ɔǹ-uee ibeeyiin.

¹¹A yaa sòoǹ tikpilee, a sòoǹ tibɔti tin kaa cáá taapuee mun tikpil ní. Ipaati ilai di bí poon.

¹²Unil maŋfal jītí malaa kii mboonee ní. Ŋma di nyí tin ŋān̄ ki tīī unil u-maŋfal wiiŋyi in kaa kpáàa náaǹ nee poon? Ubɔ kaa làá ŋmā kí tùkù-u tin làá bàń kitiŋ nee pu u-kpátam boonee.